Բիշքեկում ավիավթարի հետևանքով 32 մարդ է զոհվել
Ղրղըզստանի մայրաքաղաք Բիշքեկում կործանվել է թուրքական Turkish Airlines ավիաընկերության կողմից վարձակալված Boeing-747- 400 բեռնատար օդանավը, ինչի հետևանքով զոհվել է շուրջ 32 մարդ: Հոնկոնգից Բիշքեկ թռչող օդանավն ընկել է Դաչա-Սու թաղամասի բնակելի տների վրա՝ «Մանաս» օդանավակայանի թռիչքուղուց 1.5-2կմ հեռավորության վրա: Զոհերի մեծ մասը թաղամասի բնակիչներ են:
Ղըրղըզստանի ԱԻՆ-ից «Ինտերֆաքսին» հայտնել են, որ աղետի հետևանքով զոհվել է 32 մարդ, այդ թվում՝ 10 տղամարդ, 9 կին և 13 երեխա: Եվս 12 մարդ վիրավորվել է: Պարզվել է, որ Boing-ի օդաչուն աղետից հետո ողջ է մնացել, սակայն ստացած վերքերից մահացել է հիվանդանոցի ճանապարհին:
Ղըրղըզստանի քաղաքացիական ավիացիայի գործակալությունից հստակեցրել են, որ կործանված օդանավը պատկանել է ACT Airlines ավիաընկերությանը և վարձակալվել էր Turkish Airlines ավիաընկերության կողմից:
Ղըրղըզստանի տրանսպորտի և ճանապարհների նախարար Ժամշիթբեկ Կալիլովի խոսքով՝ կործանված օդանավը չի կարողացել տեղավորվել «Մանասի» թռիչքուղու վրա: Իր հերթին օդանավակայանի աղբյուրն «Ինտերֆաքսին» հայտնել է, որ դրա պատճառը, հնարավոր է, եղել է մառախուղի հետևանքով վատ տեսանելիությունը:
