Վրաստանի Սուրբ Սինոդն ընտրել է պատրիարքական գահի 3 թեկնածուներին
Վրաստանի պատրիարքական գահի երեք թեկնածուները
Վրաց ուղղափառ եկեղեցու Սուրբ Սինոդի որոշմամբ՝ պատրիարքական գահի թեկնածուներ են ընտրվել Սենակիի և Չխորոծկուի մետրոպոլիտ Շիո Մուջիրին, Ռուիս-Ուրբնիսի մետրոպոլիտ Հոբ Ակիաշվիլին և Փոթիի ու Խոբի մետրոպոլիտ Գրիգորի Բերբիչաշվիլին:
Սինոդի նիստից հետո Վրաստանի պատրիարքարանի հասարակայնության հետ կապերի ծառայության ղեկավար, ավագ քահանա Անդրիա Ջագմայիձեն հայտարարել է, որ մետրոպոլիտ Շիոն քվեարկության առաջին փուլի արդյունքում ստացել է 20 ձայն, իսկ մյուս երկու թեկնածուները՝ Հոբն ու Գրիգորին՝ 7-ական ձայն։
Նրա խոսքով՝ վերջնական որոշումը կկայացվի ընդլայնված կազմով նիստում, կկայանա երեք թեկնածուների միջև վերջնական ընտրությունը։ Նիստի ամսաթիվը դեռևս որոշված չէ։
Ջագմայիձեն նաև նշել է, որ որպես թեկնածու են դիտարկվել նաև այլ հոգևորականներ, այդ թվում՝ եպիսկոպոս Գրիգոլ Կացիան, եպիսկոպոս Դոսիֆեյն ու եպիսկոպոս Մելքիսեդեկը։ Նա նշել է, որ Սինոդն իր որոշումը կայացրել է Եկեղեցու կառավարման և վարչարարության մասին կանոնադրությանը համապատասխան։
Սինոդի որոշումն արդեն քննադատության է արժանացել եկեղեցու ներսում: Ախալքալաքի, Կումուրդոյի և Կարսի մետրոպոլիտ Նիկոլոզը հայտարարել է՝ ակնկալվում է, որ մետրոպոլիտ Շիոն կպահպանի ամուր աջակցությունը նաև ընդլայնված կազմով նիստում, հնարավոր է՝ նույնիսկ ավելացնի այն։
Նա նշել է, որ քիչ հավանական է, որ մյուս թեկնածուները կարողանան ստանալ այն մակարդակի աջակցություն, ինչ Շիոն ստացավ առաջին փուլում։
«Բացառված չէ, որ եպիսկոպոս Շիոն ստանա ավելի մեծ աջակցություն… Այժմ էլ իրավիճակը բավականին հստակ է»,- նշել է նա՝ հավելելով, որ վերջնարդյունքը մնում է անորոշ։
Ընդլայնված կազմով նիստը, որը, ի վերջո, կորոշի Վրաց ուղղափառ եկեղեցու ապագա պատրիարքին, նախատեսվում է անցկացնել շուտով։
Վրաստանի նախորդ պատրիարք Իլյա II-ը մահացավ հիվանդանոցում 2026 թ․-ի մարտի 17-ի ուշ երեկոյան՝ 93 տարեկան հասակում։ Նա 48 տարի ղեկավարել էր Վրաց ուղղափառ եկեղեցին։
Պատրիարքը հուղարկավորվել է Սիոնի տաճարում՝ խորանի ձախ կողմում՝ պատմական վայրում, որը Վրաց եկեղեցու պատրիարքների վերջին հանգրվանն է։
Չնայած լայն տարածում գտած սպասումներին, որ պատրիարքը կթաղվի Սուրբ Երրորդություն տաճարում, վերջնական խոսքը հենց Իլյա II-ինն էր. նա ցանկություն էր հայտնել թաղվել Սիոնի տաճարում։
Հետևեք մեզ — Facebook | Youtube
Վրաստանի պատրիարքական գահի երեք թեկնածուները
