Մարտեր Արցախում։ 2020 թ-ի հոկտեմբերի 13-ի ռեպորտաժները, տեսանյութերը, լուսանկարները

Ադրբեջանը վաղ առավոտից լայնամասշտաբ գործողություններ է սկսել առաջնագծի ողջ երկայնքով, ֆեյսբուքյան իր էջում գրել է Լեռնային Ղարաբաղի նախագահի մամուլի քարտուղար Վահրամ Պողոսյանը․

«Հրետանային զինատեսակներից գնդակոծվում են նաև խաղաղ բնակավայրերը: Բանակային ստորաբաժանումների հետ ակտիվ ռազմագործողություններին ադրբեջանական կողմից մասնակցում են մի քանի հազար վարձկան-ահաբեկիչներ: Պաշտպանության բանակը ծանր մարտեր է մղում՝ փորձելով կասեցնել թշնամու նախահարձակ գործողությունները»։

Առավոտյան հարավային, հյուսիսային, հյուսիս-արևելյան և արևելյան ուղղություններով հակառակորդը վերսկսել է հրթիռահրետանային ակտիվ կրակով ուղեկցվող գործողություններ: ՊՆ մամուլի խոսնակ Շուշան Ստեփանյանը հայտնում է, որ հատկապես ակտիվ է ճակատային գծի հյուսիս-արևելյան հատվածում: Նրա խոսքով, ՊԲ ստորաբաժանումները հակառակորդի կրակը լռեցնելու և վերջինիս պլանները ձախողելու համար բոլոր ուղղություններում ձեռնարկում են համարժեք գործողություններ:

Հայաստանի պաշտպանության նախարարությունը հիմնովին հերքում է նաև Ադրբեջանի կողմից իրեն ուղղված մեղադրանքն՝ իբր Թարթառի և Աղջաբեդի շրջանների ուղղությամբ կրակ է վարվում:

«Այս բացարձակ սուտ տեղեկատվությամբ ադրբեջանական կողմը հող է նախապատրաստում խաղաղ բնակավայրերի նկատմամբ ագրեսիվ գործողությունների համար․․․ Հայկական կողմը պահպանում է հումանիտար հրադադարի ռեժիմը և կասեցնում է այն խախտող Ադրբեջանի հարձակողական գործողությունները», — գրում է Շուշան Ստեփանյանը Facebook-ի իր էջում։

France 24 ֆրանսիական հեռուստաալիքի լրագրողը (միջազգային մամուլի ընդամենը մի քանի ներկայացուցիչներից մեկը, որին Ադրբեջանը թույլ է տվել աշխատել), զգուշացնում է հեռուստադիտողին, որ իրենք չեն կարողանում լուսաբանել հակամարտությունն, ինչպես իրենք են ուզում։

Լրագրողը պատմում է, որ իրենց հետ անընդհատ «դայակ» կա Ադրբեջանի կառավարությունից, որն իրենց ասում է, թե ինչ և որտեղ նկարահանել։ Այդ պատճառով «շատ դժվար է» ճշմարիտ պատկերացում կազմել, թե ինչ է կատարվում։

Արցախում մարտերի 17-րդ օրը

• Չնայած հոկտեմբերի լույս 10-ի գիշերը ստորագրված հրադադարին՝ շարունակվել է բնակավայրերի հրետակոծությունը երկու կողմից։

• Հայկական կողմից հաղորդվում է, որ սեպտեմբերի 27-ին մարտերի մեկնարկից ի վեր զոհվել է 532 զինվորական և 31 խաղաղ բնակիչ։ Վիրավորների մասին հստակ տվյալներ չկան։

• Ադրբեջանական կողմից տեղեկություններ են հաղորդվում միայն խաղաղ բնակչության շրջանում զոհերի մասին՝ 42 զոհ, 206 վիրավոր՝ սեպտեմբերի 27-ից ի վեր։

• Փորձագետները կարծում են, որ երկու կողմից էլ խաղաղ բնակչության և զինվորականների շրջանում զոհերի թիվը շատ մեծ է՝ հաշվի առնելով, որ մասշտաբային մարտերն ու հրետակոծությունը շարունակվում են արդեն երրորդ շաբաթը։

• Շարունակվում են կողմերի հակասական հաղորդագրություններն այն մասին, թե ով է վերահսկում Ղարաբաղի Հադրութ քաղաքը։ Հայկական կողմը հաղորդել է քաղաքի մասշտաբային հրետակոծության մասին ողջ օրվա ընթացքում։

• Հայաստանի արտգործնախարարը Մոսկվայում հանդիպել է Ռուսաստանի ԱԳՆ ղեկավարին։ Զոհրաբ Մնացականյանը հանդիպման ավարտից հետո հայտարարել է․ «Հայաստանը եղել է և շարունակում է Լեռնային Ղարաբաղի անվտանգության երաշխավորը լինել, որի համար այսօր կատարվող իրադարձությունները գոյության հարց են»։

• Ադրբեջանի նախագահ Իլհամ Ալիևը թուրքական Haber Global հեռուստաալիքին տված հարցազրույցում Հայաստանին մեղադրել է «գարշելի փիառի» համար և ասել, որ չի կարող հստակ ասել, թե երբ կսկսվեն բանակցությունները։

• Մարտեր Արցախում։ 2020 թ-ի հոկտեմբերի 12-ի ռեպորտաժները, տեսանյութերը, լուսանկարները