Ցույց Թբիլիսիում՝ հատուկ գործողությունից և ընդդիմության առաջնորդի կալանավորումից հետո։ Ֆոտոռեպորտաժ
Հազարավոր մարդիկ են փետրվարի 23-ին Թբիլիսիի կենտրոնում հավաքվել՝ բողոքի ակցիայի։ Դրա մասին հայտարարել էր միավորված ընդդիմությունն այն բանից հետո, երբ վաղ առավոտյան հատուկ գործողություն էր իրականացվել և կալանավորվել էր «Միասնական ազգային շարժման» առաջնորդ Նիկա Մելիան։
Փետրվարի 23-ին առավոտյան 7-ին հատուկ նշանակության ջոկատը գրոհել էր ընդդիմադիր կուսակցության գրասենյակը, որտեղ մոտ երկու տասնյակ մարդ էր հավաքվել։ Մելիայի կալանավորումը տեղի էր ունենում հատուկ սարքավորումների և արցունքաբեր գազի կիրառմամբ։ Գործողության ընթացքում ձերբակալվել է ավելի քան 20 ակտիվիստ։ Առգրավվել են նաև «Միասնական ազգային շարժման» գրասենյակի սերվերները։
![Протест в Тбилиси, фоторепортаж. Фото JAMnews/Давид Пипиа](https://jam-news.net/app/uploads/2021/02/151779340_785491638766617_7457456533881317634_n.jpg)
Բողոքի ցույցը սկսվել է Վրաստանի կառավարության շենքի մոտ երկրի պետական հիմնի կատարումով։ Ընդդիության առաջնորդները հայտարարել են կառավարությանն ուղղված երկու հիմնական պահանջի մասին․ ազատ արձակել Նիկա Մելիային և արտահերթ ընտրություններ նշանակել։
Այնուհետև ցույցի մասնակիցները տեղափոխվել են Ռուսթավելու պողոտա՝ խորհրդարանի շենքի մոտ։ «Գլխավոր չարիքը միամանդատ խորհրդարանն է», — հայտարարվել է ակցիայի ժամանակ։
Ընդդիմության պատգամավորների բացարձակ մեծամասնությունը բոյկոտում է խորհրդարանը՝ 2020 թ-ի հոկտեմբերի 31-ին անցկացված ընտրությունները կեղծված համարելով։ Այդ պատճառով էլ նոր խորհրդարանն իր աշխատանքը սկսել է դեկտեմբերի 11-ին որպես միակուսակցական (միայն իշխող «Վրացական երազանքի» պատգամավորների մասնակցությամբ)։ 2021 թ-ի փետրվարին խորհրդարանում սկսել է աշխատել ընդդիմության չորս պատգամավոր։
![](https://jam-news.net/app/uploads/2021/02/151317094_538703597072795_5649022219603661294_n.jpg)
Ցուցարարները պարզել են «Վրաստանը Խորհրդային Միություն չի վերադառնալու» գրառմամբ պաստառներ։
![](https://jam-news.net/app/uploads/2021/02/151785021_468685397621113_5433751647105961719_n-1024x576.jpg)
«Սրացման տրամաբանությունը գերիշում է, քաղաքական ճգնաժամը խորանում է։ Բոլոր կողմերը պետք է պատասխանատվություն ստանձնեն և գործեն ի շահ երկրի և Վրաստանի ժողովրդի։ Չարժե հրաժարվել ընդհանուր լեզու գտնելու փորձերից», — հայտարարել է Վրաստանում Եվրամիության դեսպան Կարլ Հարթցելը Վրաստանում քաղաքական ճգնաժամի առնչությամբ։
![](https://jam-news.net/app/uploads/2021/02/151608457_127648692593174_7550384294941726348_n-1024x576.jpg)
Նիկա Մելիային այցելել են օմբուդսմենի ներկայացուցիչները։ Հաղորդվում է, որ նրա առողջական վիճակը նորմալ է։
«Նախնական կալանքը չի կարող օգտագործվել որպես պատժի ձև, այն պետք է կիրառել միայն, եթե հիմնավոր կասկածներ կան, որ մեղադրյալը թաքցնում կամ ոչնչացնում է ապացույցները։ Միջազգային գործընկերները կառավարությանը զգուշացրել են, որ իրադարձությունների նման զարգացումը հեռացնում է երկիրը միջազգային գործընկերներից և տանում դեպի փակուղի։ Իշխանություններին կոչ եմ անում անհապաղ միջոցներ ձեռնարկել իրավիճակի հանդարտեցման համար։ Նման քայլերից մեկը կարող էր Նիկա Մելիայի ազատ արձակումը լինել», — ասել է ժողովրդական պաշտպան Նինո Լոմջարիան։
![](https://jam-news.net/app/uploads/2021/02/153383956_189486596307236_7411401460705516821_n-1024x576.jpg)
«Կառավարությունը պետք է հնարավորինս արագ իրավական գործիքներ գտնի և ազատ արձակի Նիկա Մելիային։ Այնուհետև արդյունավետ քայլեր ձեռնարկի՝ թույլ չտալու համար, որ երկիրն առճակատման բարդագույն շրջապտույտի մեջ մտնի», — ասել է Վրաստանի նախկին վարչապետ Գիորգի Կվիրիկաշվիլին։
![](https://jam-news.net/app/uploads/2021/02/151608605_4013698161982087_5717229907430279472_n-1024x576.jpg)
Ակտիվիստները սկսել են խորհրդարանի մոտ վրաններ տեղադրել և մտադիր են անժամկետ ցույց իրականացնել մինչև իրենց պահանջները բավարարվեն։
![](https://jam-news.net/app/uploads/2021/02/153316017_728570251169854_4707021858573750137_n-1024x576.jpg)