Բաքվում մտադիր են տաքսի ծառայության միասնական սակագին ներմուծել․ ինչո՞ւ դա լավ չէ ուղևորների համար

Հանգստյան օրերին Բաքվում կարանտինի պատճառով արգելված է հանրային տրանսպորտի երթևեկությունը, հունիսից քաղաքում չի աշխատում մետրոն։ Այս օրերին երթևեկության միակ միջոցը տաքսին է, և պետությունն առաջարկում է տրանսպորտի այդ տեսակի համար միասնական սակագին սահմանել։ Սոցցանցերում քաղաքի բնակիչները վրդովվում են այդ կապակցությամբ։

• Ադրբեջանում առաջին վճարովի ճանապարհն է կառուցում՝ գոյություն ունեցող անվճարին զուգահեռ

• «Աշխատիր Վրաստանից»․ Վրաստանի կառավարությունն արտասամանցիների ներգրավման նոր նախագիծ է գործարկել

Բաքվի տրանսպորտային գործակալության նախաձեռնությամբ տեսակոնֆերանս է անցկացվել Ադրբեջանի մայրաքաղաքում տաքսի ծառայության աշխատանքի զարգացման վերաբերյալ։

«Գործակալությունը հայեցակարգ է մշակել թերությունների վերացման, տաքսիների աշխատանքի կարգավորման, այդ ոլորտում օրենսդրության կատարելագործման և վերահսկողության արդյունավետ մեխանիզմների ստեղծման համար։ Հայեցակարգը նախատեսում է միասնական դիսպետչերական կենտրոնի ստեղծում, ինչպես նաև սակագնային համակարգի և քվոտաների կիրառում», — ասված է հաղորդագրությունում։

Այս նորությունն ամենաքննարկվողն է սոցցանցերի ադրբեջանական սեգմենտում։ Որոշ օգտատերերի կարծիքով՝ այդ որոշմամբ պետությունը մոնոպոլիզացնում է մայրաքաղաքի մասնավոր բիզնեսի գրեթե միակ տեսակը։

Ձեր ուշադրությանն ենք ներկայացնում մի քանի բնորոշ մեկնաբանություն․

«Իշխանությունները մոտավորապես այսպես են մտածում․ «Երկրում ոչ մի ազատ բան չպետք է մնա։ Մենք փակել ենք մետրոն, կրճատում ենք հանրային տրանսպորտը։ Իսկ դուք տաքսիներով ցածր գներով երթևեկում եք»։ Հիմա էլ կսկսեն խոսել այն մասին, թե մենք նրանց սխալ ենք հասկացել»։

«Այս ոլորտում խնդիրները քիչ չեն։ Փոփոխություններ են անհրաժեշտ։ Դեռ կտեսնենք, թե ինչ նպատակ ունեն այդ բարեփոխումները։ Սակայն ես անձամբ չեմ հավատում, որ կառավարոթյունը կարող է այդ համակարգը կառավարել առաջադեմ մեթոդներով և ազնվորեն»։

«Միասնական սակագնի հասկացությունն անգամ հակասում է շուկայական տնտեսության օրենքներին»։