Վրաստանի ՆԳՆ նախկին ամենակարող ղեկավարն ազատ է արձակվել գրեթե յոթ տարվա ազատազրկումից հետո
Գրեթե յոթ տարվա ազատազրկումից հետո ազատ է արձակվել 52-ամյա Վանո Մերաբիշվիլին՝ Վրաստանի ներքին գործերի նախկին ամենակարող նախարարը, Միխեիլ Սաակաշվիլիի կառավարության նախկին վարչապետը։
Բանտը լքելուն պես Մերաբիշվիլին քաղաքական հայտարարություն է արել։
Նա չի հստակեցրել, թե որ կուսակցությանն ու քաղաքական թիմին է միանալու կամ թե ինչ քաղաքական պլաններ ունի, նա ասել է, որ Իվանիշվիլիի կառավարումն ավարտվելու է մեկ տարուց, ինքն էլ անձամբ իր ավանդն է ունենալու դրանում։ Նա հայտնել է, որ վերադառնալու է քաղաքականություն, սակայն հստակ պլաններով չի կիսվել։
Վանո Մերաբիշվիլիին բանտի մոտ դիմավորում էին հարյուրավոր մարդիկ, այդ թվում՝ տասնյակ լրագրողներ։
«Ուրախ եմ, որ փոխզիջման չեմ գնացել և ողջ ժամկետը մինչև վերջ նստել եմ։ Ցանկանում եմ շնորհակալություն հայտնել այստեղ հավաքված երկրպագուներին և այն մարդկանց, որոնք սրա երկրպագուն էին հեռվից։ Այդ աջակցության շնորհիվ՝ ես պահպանել եմ ուժերս, էներգիաս և այն ռեժիմի տապալման համար պայքարը շարունակելու համոզվածությունը, որը ղեկավարում է Վրաստանն, արդեն այս տարի։
2013 թ–ի մայիսի 21–ին Մերաբիշվիլին կալանավորվել էր բյուջետային միջոցների մսխման մեղադրանքով։
Ավելի ուշ ավելացել էին պատգամավոր Վալերի Գելաշվիլիի վրա ֆիզիկական հարձակման և թբիլիսցի ակտիվիստ Սանդրո Գիրգվլիանիի սպանության հետ կապված իշխանության չարաշահման մեղադրանքները։
•Սանդրո Գիրգվլիանիի գործը․ ինչո՞ւ Թբիլիսիում սպանեցին 28–ամյա տղային
•Վեց բան Միխեիլ Սաակաշվիլիի մասին, որ ցանկացել եք հարցնել վրացիներին
2014 թ–ին դատարանը նրան մեղավոր էր ճանաչել այս բոլոր գործերով։
Վանո Մերաբիշվիլին դատապարտվել էր 6 տարվա և 9 ամսվա ազատազրկման և ամբողջությամբ կրել է իր պատիժը մեկուսի բանտարկության պայմաններում։
Վանո Մերաբիշվիլին համարվում էր «վարդերի հեղափոխության» հետևանքով իշխանության եկած Միխեիլ Սաակաշվիլիի կառավարման տարիներին իշխանությունում գտնվող ամենահաջողակ նախարարներից մեկը։ Նրա անվան հետ է կապված Վրաստանի ոստիկանության արմատական բարեփոխումը, որը հարևան շատ երկրներ մինչ այսօր համարում են բարեփոխումների ամենահաջողված օրինակը։ Միաժամանակ շատերը խոսում են այն մասին, որ նա մասշտաբային կերպով չարաշահում էր իր իշխանությունը ներքին գործերի նախարար և վարչապետ լինելու ժամանակահատվածներում։
