«Վրաստանը ներքաշում են ՆԱՏՕ-ի մեջ՝ բնակչության կամքին հակառակ»․ Սերգեյ Լավրով
Ռուսաստանը Վրաստանին թույլ չի տա անդամակցել ՆԱՏՕ-ին
«Նրանք [Արևմուտքը] փորձում են «Վրաստանին պարտադրել անդամակցել ՆԱՏՕ-ին՝ բնակչության զգալի մասի կամքին հակառակ», — հայտարարել է Ռուսաստանի արտգործնախարար Սերգեյ Լավրովը դեկտեմբերի 21-ին Մոսկվայում Աբխազիայի և Հարավային Օսիայի դե ֆակտո արտգործնախարարների հանդիպմանը հաջորդած մամուլի ասուլիսին։
«ՆԱՏՕ-ի ընդլայնման վերաբերյալ մեր դիրքորոշումը պարզ է․ կարմիր գիծ կլինի այն, եթե դաշինքը շարունակի մոտենալ Ռուսաստանի Դաշնության սահմաններին», — ասել է Լավրովը։
ԱՄՆ Պետդեպարտամենտի ներկայացուցիչ Նեդ Փրայսը նույնպես մեկնաբանել է իրավիճակը դեկտեմբերի 21-ին։
«Միջազգային իրավունքի հիմնարար սկզբունքն այն է, որ ոչ մի երկիր իրավունք չունի որոշելու մյուս երկրի սահմաններն ու վախեցնելու փոքր պետություններին։ Կապ չունի, թե որքան մեծ է այն և ազդեցիկ, որքան հզոր է նրա զենքը, անգամ եթե նա միջուկային զենք ունի։
Ոչ ԱՄՆ-ն, ոչ էլ մեր գործընկերներն ու դաշնակիցները դա թույլ չեն տա, լինի դա Եվրոպայում, Հնդկական-Խաղաղօվկիանոսյան տարածաշրջանում, թե աշխարհի ցանկացած այլ կետում», — ասել է Նեդ Փրայսը։
- «Աշխարհն էլ չի սիրում ժողովրդավարությունը և ձգտում է բռնապետության»։ Ռուսաստանցի նոբելյան մրցանակակրի ելույթը
- Վրաստանի և Ռուսաստանի տնտեսական կապերն աճում են, սակայն «3+3» տարածաշրջանային ձևաչափով աշխատանք չի լինելու
Բուխարեստի 2008 թ-ի գագաթնաժողովին ՆԱՏՕ-ն սատարել է դաշինքին անդամակցելու հնարավորության մասին որոշումը Վրաստանի և Ուկրաինայի մասով։
2021 թ-ի դեկտեմբերի 9-ին Ռուսաստանի ԱԳՆ-ն ՆԱՏՕ-ից պահանջել է չեղարկել Հյուսիսատլանտյան դաշինքին Վրաստանի և Ուկրաինայի ապագա անդամակցության մասին որոշումը։
«Եվրոպական անվտանգության հիմնարար շահերից պետք է բխի Բուխարեստի 2008 թ-ի գագաթնաժողովի որոշման չեղարկումն այն մասին, որ Վրաստանը և Ուկրաինան ՆԱՏՕ-ի անդամ են դառնալու։ Դա հակասում է ԵԱՀԿ անդամ երկրների պարտավորությանը՝ չավելացնելու սեփական անվտանգությունը մյուսների անվտանգության հաշվին», — հայտարարել է Ռուսաստանի ԱԳՆ-ն։
Վրաստանի ԱԳՆ հայտարարության համաձայն՝ ՆԱՏՕ-ի անդամ դառնալու ցանկությունն արտացոլված է երկրի սահմանադրությունում։ Բուխարեստի գագաթնաժողովին ընդունված որոշումը կրկնվել է ՆԱՏՕ-ի բոլոր գագաթնաժողովներում, որոնք անցկացվել են 2008 թ-ից հետո։
2021 թ-ին Բրյուսելում ՆԱՏՕ-ի գագաթնաժողովին ընդունված կոմյունիկեում ընդգծվում է, որ դաշնակիցներն անընդունելի են համարում որևէ երրորդ երկրի միջամտությունն այլ երկրների արտաքին առաջնահերթությունների որոշմանը։