Հայաստանի՝ կորոնավիրուսով վարակված վարչապետը ճեպազրույցի է մասնակցել
Հունիսի մեկին՝ իր ծննդյան օրը, Հայաստանի վարչապետ Նիկոլ Փաշինյանն ինքն է հայտարարել այն մասին, որ կորոնավիրուսով է վարակվել, սոցցանցի իր էջում ուղիղ եթերի միջոցով։ Իսկ մի քանի ժամ անց նա արդեն մասնակցում էր երկրում տիրող իրավիճակի և կորոնավիրուսի դեմ պայքարի մասին առցանց ճեպազրույցին։
Այն կայացել է պարետատան նիստից անմիջապես հետո, որը ևս այս անգամ առցանց է անցկացվել։
Փաշինյանի հետ միասին իրավիճակի մասին «հաշվետվություն» են ներկայացրել պարետ, փոխվարչապետ Տիգրան Ավինյանն ու առողջապահության նախարար Արսեն Թորոսյանը։
Ճեպազրույցի բոլոր մասնակիցները դիմակներով էին և սոցիալական հեռավորություն էին պահում։
- Հայաստան։ Երեք կանանց պատմություն, որոնք փրկում են իրենց բիզնեսը կորոնավիրուսից
- Հայաստանում կասեցվել է ավելի քան հազար ընկերությունների աշխատանք պարետատան սահմանած կանոնների խախտման համար
Կարանտինի խիստ միջոցներ չեն նախատեսվում
Վարչապետը հաղորդել է, որ ճեպազրույցից առաջ չափել է ջերմությունն, այն նորմայի սահմաններում է եղել։ Եվ հունիսի երկուսից նա վերադառնալու է իր սովորական աշխատանքային ռիթմին, քանի որ իրեն լավ է զգում։
Փաշինյանն ընդգծել է, որ ինքը հիվանդության ոչ մի ախտանշան չի ունեցել նաև թեստ հանձնելուց առաջ։ Դա սովորական ստուգում էր ակնկալվող այցից առաջ, նա պատրաստվում էր մեկնել Լեռնային Ղարաբաղ։
Այդ համատեքստում վարչապետը հայտարարել է, որ Հայաստանում, հնարավոր է, 18–20 հազար մարդ կա, որոնց մոտ հիվանդությունն առանց սիմպտոմների է ընթանում․
«Այսինքն՝ նրանք, ինչպես և ես, չեն կասկածում վարակված լինելու մասին»։
Պատասխանելով խիստ սահմանափակումների վերադառնալու մասին հարցին՝ Փաշինյանն ասել է․
«Քանի դեռ հնարավորություն կա չվերադառնալու խիստ սահմանափակումների, այսինքն՝ համատարած արգելափակումների, մենք գնալու ենք այդ ճանապարհով»։
Իսկ երկիրն այժմ գնում է պարետատան սահմանած նոր վարքականոնների և գործունեության տարբեր ոլորտներում աշխատանքային նոր նորմերի պահպանման վերահսկման ճանապարհով։ Ոստիկանությունը հետևում է, որ բնակիչները դիմակներ կրեն և սոցիալական հեռավորություն պահպանեն։ Հատուկ տեսչական մարմինն անսպասելի ստուգայցեր է իրականացնում տարբեր ձեռնարկություններ։
Հայաստանում արտակարգ դրություն է հայտարարվել մարտի 16–ին և երկու անգամ երկարաձգվել է, վերջին անգամ՝ մինչև հունիսի 13–ը։ Սակայն մինչև ապրիլի վերջ սկսվել է կարանտինային միջոցների մեղմացման գործընթացը, մայիսի 5–ից հանվել է տեղաշարժի սահմանափակումն, իսկ մայիսի 18–ից սկսել է աշխատել ողջ բիզնեսը, տրանսպորտն ու անգամ մանկապարտեզները։
Օդային սահմանները բացվելու են հուլիսի կեսերից
Փոխվարչապետ և պարետ Տիգրան Ավինյանը հայտարարել է, որ վերջին հինգ ամիսների ընթացքում Հայաստանի կառավարությունը պարբերաբար փոխում է գործողությունների ռազմավարությունը։ Խիստ սահմանափակումների փուլին հետևել է ձեռնարկությունների աշխատանքի փուլը։ Հենց դրանից հետո է նոր բռնկում սկսվել, վարակվածների թիվն օրական ավելանում է հարյուրներով։
«Մենք սրան սպասում էինք և պատրաստ էինք։ Սակայն խիստ միջոցների վերադառնալը մեզ համար ծայրահեղ միջոց է։ Մենք ուշադիր հետևում ենք մեր արտասահմանյան գործընկերների բոլոր գործողություններին՝ նրանց դրական փորձը կիրառելու նպատակով», — ասել է պարետը։
Տիգրան Ավինյանը հաղորդել է, որ արդեն պատրաստ է կորոնավիրուսի՝ Հայաստանում արտադրված թեստերի նոր խմբաքանակը։ Եվ հունիսի երկուսից 350 թեստ է ուղարկվելու լաբորատորիաներ՝ անալիզներ անցկացնելու համար։
Նրա խոսքով՝ պարետատան վերջին նիստի հիմնական թեմաներից մեկը զբոսաշրջության ոլորտն էր․
«Մոտավորապես հուլիսի կեսերից պատրատսվում ենք բացել Հայաստանի օդային սահմանները՝ պահպանելով բոլոր նորմերն ու զգուշավորություն։ Հույս ունենք, որ դա թույլ կտա կարգավորել զբոսաշրջության ոլորտի խնդիրները»։
Հիվանդների վիճակի մասին
Առողջապահության նախարար Արսեն Թորոսյանը հաղորդել է, որ 440 մարդ, որոնց մոտ կորոնավիրուս է հայտնաբերվել, ծանր վիճակում է․
«55 քաղաքացի ծայրահեղ ծանր վիճակում է, նրանցից 16–ը միացված են թոքերի արհեստական օդափոխման սարքերի»։
Արսեն Թորոսյանը ևս մեկ անգամ ընդգծել է, որ ձեռնարկվում են բոլոր միջոցները՝ տարբեր հիվանդանոցների վերակենդանացման բաժանմունքներում տեղերի ավելացման համար։ Սակայն այս խնդիրը դեռ արդիական է առողջապահական համակարգի համար։
Հայաստանում վարակվածների թվի կտրուկ աճի պատճառով որոշվել է այլևս չմեկուսացնել կորոնավիրուսով վարակված անախտանիշ հիվանդներին։ Վարակվածների առողջությանը տնային պայմաններում հետևում են պոլիկլինիկաների, գյուղական ամբուլատորիաների և առողջության կենտրոնների բժիշկները։
Նախարարը հաղորդել է, որ նրանց համար կազմակերպվում են «վերապատրաստման դասընթացներ, քանի որ հաճախ են լսվում բողոքներ այն մասին, որ պոլիկլինիկաների աշխատակիցների՝ տնային պայմաններում հիվանդություն վարելու հմտությունները լավը չեն»։
![ճեպազրույց, վարչապետի ծննդյան օր, վարչապետը կորոնավիրուսով է վարակվել, պարետ, առողջապահության նախարար, Նիկոլ Փաշինյան, Տիգրան Ավինյան, Արսեն Թորոսյան](https://jam-news.net/app/uploads/2020/06/Screenshot_1-1024x480.jpg)