Ո՞վ և ինչո՞ւ է «գրոհում» Վլադիմիր Պուտինին և նրա ազգականներին
Ռուսաստանում մեկը մյուսի հետևից սկանդալային հրապարակումներ են արվում նախագահ Վլադիմիր Պուտինի ընտանեկան կյանքի մասին։ Փորձագետները դա կապում են այն բանի հետ, որ Պուտինը պատրաստվում է հեռանալ և սկսում է իրեն փոխարինող փնտրել։
Ո՞ւմ է պահպանում Ռուսաստանի ռազմական նավատորմը
2020 թ․ նոյեմբերի կեսերին «Պրոյեկտ» պարբերականը հետաքննություն էր հրապարակել, որը նվիրված էր Սանկտ Պետերբուրգի բնակիչ Սվետլանա Կրիվոնոգիխին։
![](https://jam-news.net/app/uploads/2020/12/sveta-1.jpg)
Մինչև 2000 թվականը Կրիվոնոգիխն, ինչպես գրում է «Պրոյեկտը», մոր հետ բնակվում էր կոմունալ բնակարանում:
Իսկ այժմ նրա ունեցվածքի արժեքը՝ էլիտար անշարժ գույք, մասնաբաժին լեռնադահուկային հանգստավայրում և «Ռոսիա» բանկի բաժնետոմսեր, հասնում է 100 մլն դոլարի։
Կրիվոնոգիխին է պատկանում նաև բիզնես դասի զբոսանավ։ Սև ծովով այն երթևեկում է ռուսական ռազմական նավատորմի նորագույն նավի ուղեկցությամբ, որը նախատեսված է ստորջրյա դիվերսանտների դեմ պայքարի համար։
«Պրոյեկտի» աղբյուրները պնդում են, որ Սվետլանա Կրիվոնոգիխի անսպասելի հարստացման պատճառը Վլադիմիր Պուտինի հետ մոտ հարաբերություններն են։
2003 թ-ին Սվետլանա Կրիվոնոգիխն աղջիկ է ունեցել։ Հայրը փաստաթղթերում նշված չէ, սակայն հայրանունը կա՝ Վլադիմիրի։
Ինստագրամում կրտսեր Կրիվոնոգիխի լուսանկարները վկայում են Ռուսաստանի գործող նախագահի հետ ապշեցնող արտաքին նմանության մասին։
![](https://jam-news.net/app/uploads/2020/12/putin-inoguration.jpg)
380 միլիոն դոլար արժողությամբ օժիտ
Դեկտեմբերի սկզբին «Կարևոր պատություններ» պարբերականը հետաքննություն է հրապարակել, որը նվիրված է Կիրիլ Շամալովին՝ ամենաերիտասարդ ռուս միլիարդատիրոջը։
Պնդում են, որ նա Վլադիմիր Պուտինի մոտ ընկեր Նիկոլայ Շամալովի որդին է և Ռուսաստանի նախագահի կրտսեր դուստր Կատերինա Տիխոնովայի ամուսինը։ Շամալովի և Տիխոնովայի հարսանեկան լուսանկարները հաստատում են դա, թեև Վլադիմիր Պուտինը երբեք չի ընդունել այդ ազգակցական կապը։
Հետաքննության համար հիմք է դարձել Կիրիլ Շամալովի կոտրված էլեկտրոնային փոստը։ Դրանից կարելի է տեղեկանալ, որ նա մշտապես օգտվել է Պուտինի ընտանիքի հետ մտերմությունից՝ ի շահ իր բիզնեսի և ընկերների։
Սակայն ամենասկանդալային դրվագը կապված է այն բանի հետ, որ Տիխոնովայի հետ ամուսնությունից հետո Շամալովը ձեռք է բերել «Սիբուր» ռուսական խոշորագույն նավթաքիմիական ընկերության 380 մլն դոլար արժողությամբ բաժնետոմսերի փաթեթը։ Սակայն դրա համար վճարել է 100 դոլար։
«Կարևոր պատմություններն» այդ բաժնետոմսերն անվանում է «Կատերինա Տիխոնովայի օժիտ»։
Տիխոնովայի հետ ապահարզանից հետո 2017 թ-ին Շամալովը վաճառել է «Սիբուրի» բաժնետոմսերը։
Ընտանիքը Վլադիմիր Պուտինի խոցելի տեղն է, որը պատրաստվում է թոշակի անցնել
Նախագահ Պուտինը երբեք մանրամասներ չի հաղորդել իր անձնական կյանքի մասին։ Ստույգ հայտնի է միայն այն, որ 2013 թ-ին նա ամուսնալուծվել է իր տիկին Լյուդմիլայի հետ, որից երկու դուստր ունի՝ Մարիան և Կատերինան։
![](https://jam-news.net/app/uploads/2020/12/Screen-Shot-2020-12-08-at-21.44.02.png)
Դրանից հետո ժամանակ առ ժամանակ տեղեկություններ են հայտնվել Պուտինի և սպորտային մարմնամարզության աշխարհի չեմպիոն Ալինա Կաբաևայի մտերիմ հարաբերությունների մասին։
Կրեմլը միշտ հրաժարվել է մեկնաբանություններից՝ դա բացատրելով Պուտինի ազգականների անվտանգության մասին հոգածությամբ։
Այժմ, երկու շաբաթվա ընթացքում միանգամից երկու հետաքննություն է հայտնվել մի շարք փաստացի ապացույցներով, որոնք նվիրված են նախագահի մոտ ազգականներին։
Ի՞նչ կարող է սա նշանակել
Ռուսական մեդիայում և սոցիալական ցանցերում գրում են, որ, ըստ ամենայնի, Վլադիմիր Պուտինը սկսում է աստիճանաբար պատրաստվել Ռուսաստանի նախագահի պաշտոնը լքելուն և այլ պաշտոն զբաղեցնելուն։
Այս մասին վկայում են սահմանադրության տենդային փոփոխություններն ու օրենքների ընդունումը, որոնք երաշխավորում են նախկին նախագահի ցմահ անձեռնմխելիությունը։
Եվ այս առնչությամբ նրա շրջապատում դաժան պայքար է սկսվել այն բանի համար, թե ով է հաջորդելու Պուտինին։ Օլիգարխներից և ուժայիններից կազմված տարբեր խմբավորումներ այս առթիվ տարբեր կարծիքներ ունեն։
Վերջին ժամանակների սկանդալային հրապարակումներն այս պայքարի արձագանքն են։ Թե ով ում է փորձում դրանցով վարկաբեկել և ինչ է ուզում ցույց տալ Վլադիմիր Պուտինին, ըստ ամենայնի, պարզ կդառնա որոշ ժամանակ անց։