Սանկտ Պետերբուրգի ահաբեկչության զոհերից մեկը երիտասարդ ադրբեջանցի կին է

Երեկ Սանկտ Պետերբուրգում տեղի ունեցած պայթյունի 11 զոհերից մեկը 21-ամյա ադրբեջանցի ուսանողուհի Դիլբարա Սամանդարովնա Ալիևան է:

Ռուսական «Էխո Մոսկվի» պարբերականի հրապարակած ցուցակում նրա անունը սկզբում նշված էր որպես Թամարա Ալիևա: Երիտասարդ աղջիկը ծանր վիճակում ապրիլի 3-ին տեղափոխվել է Ջանելիձեի անվան շտապօգնության հիվանդանոց, այնտեղ էլ, գիտակցության չգալով, մահացել է ապրիլի 4-ի առավոտյան:

Պետերբուրգում ադրբեջանական սփյուռքի ակտիվիստ Օրհան Մեջիդովը հաղորդել է, որ աղջիկը կհուղարկավորվի այսօր Սանկտ Պետերբուրգում:

Սանկտ Պետերբուրգում Ադրբեջանի գլխավոր հյուպատոս Սուլթան Գասիմովը հաստատել է տեղեկատվությունը: «Ալիևայի մահվան մասին տեղեկատվությունը ստացել ենք այսօր վաղ առավոտյան: Ներկա պահին մեր աշխատակիցները հիվանդանոցում են», — Գասիմովին է մեջբերում ԱՊԱ-ի ռուսական գործակալությունը:

Գլխավոր հյուպատոսը հավելել է, որ մետրոյի պայթյունի հետևանքով վիրավորների թվում ևս մեկ ադրբեջանցի կա՝ Զաուր Վելիևը: Ներկա պահին նրա վիճակը կայուն է, նա հիվանդանոցում է:

• Ապրիլի 3-ին պայթյունի արդյունքում Պետերբուրգի մետրոյում 11 մարդ է զոհվել, 45 տուժածներ հիվանդանոցներում են: