Վրաստանի երրորդ նախագահ Միխեիլ Սաակաշվիլիի խոսքով՝ ինքը երբեք իր փաստաբաններին չի հայտնել թունավորման կասկածի մասին, և նման շահարկումները տեղին չեն։ Նախկին նախագահը ֆեյսբուքյան իր էջում հայտարարություն է տարածել։
Մինչ այդ Սաակաշվիլիի մայրը՝ Գիուլի Ալասանիան հայտարարել էր, որ նախկին նախագահի արյան մեջ սնդիկ է հայտնաբերվել։ Նույն օրը Սաակաշվիլիի փաստաբան Վալերի Գելբախիանին տեղեկություն էր հրապարակել Միխեիլ Սաակաշվիլիի թունավորման մասին։
Հայտարարությամբ է հանդես եկել նաև արդարադատության նախարար Ռատի Բրեգաձեն։ Նրա խոսքով՝ գերատեսչությունը կդիմի Փորձաքննությունների ազգային բյուրո՝ թունաբանական փորձաքննության իրականացման համար։
«Էմպաթիա» կենտրոնը, որն իրականացնում է Սաակաշվիլիի առողջության անկախ մոնիթորինգ, շուտով կհրապարակի հերթական զեկույցը, որտեղ կներառվեն օտարերկրյա բժիշկների կողմից արված հետազոտության արդյունքները։
Միխեիլ Սաակաշվիլիի հայտարարությունը
«Ուզում եմ հայտարարել, որ երբեք իմ փաստաբաններից ոչ մեկին չեմ ասել, որ թունավորման կասկած ունեմ։ Այս թեմայով շահարկումներն անտեղի են:
Ուզում եմ շնորհակալություն հայտնել բժշկական հանրությանը աջակցության համար։ Բարձր եմ գնահատում նրանց մասնագիտական օգնությունը: Առողջական վիճակս իսկապես վատանում է, և այն վատացել է վերջին երկու ամսում։ «Վիվամեդի» [մասնավոր կլինիկա] բժիշկները շարունակում են հոգ տանել իմ մասին։ Կարևոր է վստահել մասնագետներին, և պետք չէ չափից շատ քաղաքականացնել այս հարցը։
Կրկին շնորհակալություն բոլորին»,- գրել է նախկին նախագահը։
Փաստաբան Վալերի Գելբախիանին, ով ավելի վաղ հայտարարել էր, որ Սաակաշվիլին թունավորվել է, այսօր ասել է՝ Սաակաշվիլիի պաշտպանները համաձայնել են այլևս չմեկնաբանել թունավորումը։
«Փորձագետներն ուղղակիորեն նշում են, որ բիոպսիայի արդյունքում Միխեիլ Սաակաշվիլիի մարմնում հայտնաբերված տարրերը թունավորումը բնութագրող նշաններ են։ Առողջության վատթարացման առումով նրա հիվանդությունների դինամիկան թունավորման մասին խոսելու առիթ է, այլապես ոչ մի հիվանդություն այս կերպ չէր զարգանա։
Եթե տևողությունը համընկնի «Վիվամեդ» կլինիկայում գտնվելու տևողության հետ, բնականաբար, դրա պատասխանատվությունը կրելու է կլինիկան: Կամ այն վայրը, որտեղ նա մինչ այդ գտնվում էր»,- նոյեմբերի 19-ին «TV-Pirveli»-ին ասել է Վալերի Գելբախիանին:
Սակայն, ինչպես երևում է, Սաակաշվիլիի այսօրվա հայտարարությունից հետո թեմայի շուրջ քննարկումներն ամբողջությամբ կդադարեցվեն։
Կառավարության ներկայացուցչի հայտարարությունը
Արդարադատության նախարար Ռատի Բրեգաձեն ասում է՝ Միխեիլ Սաակաշվիլիի փաստաբանն է հայտարարել Սաակաշվիլիի հնարավոր թունավորման մասին։ Նրա խոսքով՝ գերատեսչությունը խրախուսում է նման տեղեկություն տարածող «ցանկացած անձի» նախ ճշտել այն և ներկայացնել համապատասխան ապացույցներ։
Բրեգաձեի խոսքով՝ ոչ ոք նման եզրակացություն չի ներկայացրել Հատուկ ծառայությանը։
«Որպեսզի հասարակության մեջ հարցականներ չմնան, պետությունն էլ անի ամեն հնարավորը, վաղն առավոտյան մենք կդիմենք Սամխարաուլիի անվան փորձաքննությունների ազգային բյուրո և կանցկացնենք թունաբանական փորձաքննություն։ Հասարակությունը պետք է ստանա ամբողջական և համապարփակ տեղեկատվություն Միխեիլ Սաակաշվիլիի առողջական վիճակի մասին»,- ասում է արդարադատության նախարարը։
Սաակաշվիլիի առողջության զգալի վատթարացման մասին կրկին խոսվեց 2022 թվականի հոկտեմբերին։ Հոկտեմբերի 6-ին Սաակաշվիլիին այցելել էր Պետական անվտանգության ծառայության ղեկավար Թեմուր Ջանաշիան։ Դրանից հետո նա լրագրողներին ասել էր, որ նախկին նախագահն իրեն շատ վատ է զգում. «Միխեիլ Սաակաշվիլին իրականում այլևս մարդ չէ, նրա ջերմությունը 38 է, ճնշումը՝ 170, նա չի կարող ուտել և դեղորայք ընդունել, անընդհատ անկողնում է»։
Ամերիկացի փորձագետ Շահեն Լահանը Վրաստանի երրորդ նախագահին այցելելուց հետո պարզաբանել է, որ ուսումնասիրությունները ցույց են տվել բոլոր «կենսական ցուցանիշների սուր անբավարարություն, որն առողջ մարդը նորմալ առողջապահության պայմաններում չպետք է ունենա»։
Սաակաշվիլիին կլինիկայում այցելել է նաև նրա օտարերկրյա փաստաբան Մասիմո Դանջելոն։ Նրա խոսքով՝ Սաակաշվիլիի առողջական վիճակը զգալիորեն վատացել է։ Ինչպես բացատրում է փաստաբանը, եթե Սաակաշվիլիի կենսական նշանները չսկսեն լավանալ, դա կարող է նրա կյանքն արժենալ։
Վրաստանի օմբուդսմենի նախաձեռնած անկախ բժշկական խորհրդի գնահատմամբ՝ 2022 թվականի ապրիլին Վրաստանի նախկին նախագահ Միխեիլ Սաակաշվիլիի առողջական վիճակը զգալիորեն վատացել է։ Այդ ժամանակ ընտանիքը խնդրել էր նրան տեղափոխել արտերկիր՝ բուժման նպատակով։
Վրաստանում ԱՄՆ դեսպան Քելի Դեգնանը Վրաստանի կառավարությանը կոչ էր արել լրջորեն վերաբերվել Վրաստանի երրորդ նախագահ Միխեիլ Սաակաշվիլիի առողջության վերաբերյալ Հանրային պաշտպանի առաջարկություններին։
Մեկ տարուց ավելի է, ինչ Սաակաշվիլին բանտում է։ Նախկին նախագահը ձերբակալվել է այն բանից հետո, երբ նա գաղտնի վերադարձել է Վրաստան 2021 թվականի հոկտեմբերի 1-ին։
Վրաստանի նախկին նախագահը գտնվել է Ռուսթավիի 12-րդ քրեակատարողական գաղութում։ Նա իրեն համարում է քաղբանտարկյալ, ի նշան բողոքի երկու անգամ հացադուլ է հայտարարել։ Առաջին հացադուլը տևել է 51 օր։
Դրանից հետո Միխեիլ Սաակաշվիլիի առողջական վիճակն այնքան է վատացել, որ նա բուժման կարիք է ունեցել։ Սկզբում նրան տեղափոխել են Գլդանիի բանտային հիվանդանոց, ապա Գորիի զինվորական հոսպիտալ, իսկ վերջում՝ «Վիվամեդ» կլինիկա, որտեղ նա բուժում է ստանում մինչ օրս։
Եղել է նաև Ստրասբուրգի Մարդու իրավունքների դատարանի նոյեմբերի 10-ի որոշումը։ Դատարանը Միխեիլ Սաակաշվիլիին կոչ է արել դադարեցնել հացադուլը, իսկ պետությանը հանձնարարել է ապահովել բանտարկյալի անվտանգությունն ու նրա նկատմամբ պատշաճ վերաբերմունքը։
