Սաակաշվիլիի դեմ գործերը։ Ինչո՞ւ են բանտում պահում Վրաստանի նախկին նախագահին
Ինչի՞ համար են Սաակաշվիլիին բանտ նստեցրել։
Վրաստանի նախկին նախագահ (2004-2013 թթ․) Միխեիլ Սաակաշվիլին այսօր գտնվում է Վրաստանի բանտային հիվանդանոցում՝ որպես բանտարկյալ։ Նա չի ընդունում իր մեղքն ու հացադուլ է անում ավելի քան 45 օր՝ պահանջելով իրեն ազատ արձակել։ Սաակաշվիլին ձերբակալվել է հոկտեմբերի 1-ին, այն բանից հետո, երբ ապօրինի կերպով Վրաստան է վերադարձել ութամյա բացակայությունից հետո։
Ինչի՞ համար է նա մեղադրվում և պատիժ կրում։
Հինգ գործ Սաակաշվիլիի դեմ
Այն պահի դրությամբ, երբ Սաակաշվիլին 2021 թ․ հոկտեմբերին Վրաստան է վերադարձել, նրա դեմ քրեական գործեր են հարուցվել չորս փաստերի առթիվ․
1. Լիազորությունների չարաշահում 2006 թ․ հունվարին բանկի աշխատակից Սանդրո Գիրգվլիանիի սպանության առնչությամբ։ 28-ամյա Գիրգվլիանին մահացած է հայտնաբերվել Թբիլիսիի ծայրամասում, ՆԳՆ բարձրաստիճան պաշտոնյաների հետ ռեստորանում վիճաբանելուց հետո։ Այս գործով դատապարտվել է ՆԳՆ չորս աշխատակից, սակայն երկու տարուց նախագահը նրանց ներում է շնորհել։ Հետաքննությունը համարում է, որ Սաակաշվիլիի կողմից դատապարտյալներին ներում շնորհելը հանցագործների հետ նախնական դավադրության մաս է եղել։
2. Ծառայողական լիազորությունների չարաշահում 2007 թ․ նոյեմբերի 7-ի ցույցը ցրելիս և ներխուժում «Իմեդի» հեռուստաընկերություն։
3. Ծառայողական լիազորությունների չարաշահում ընդդիմադիր պատգամավոր Վալերի Գելաշվիլիի ծեծի առնչությամբ։ Հարձակվածները դիմակներով են եղել, հետաքննությունը Սաակաշվիլիի կառավարման ընթացքում մեղավորներին չի գտել։
4. Բյուջետային միջոցների վատնում, այսպես կոչված «պիջակների գործ»։ Այս գործի առաջին մանրամասները, որոնք հայտնի են դարձել հանրությանը, վերաբերել են պետության հաշվին նախագահի համար վեց պիջակ գնելուն, ինչպես նաև սուշի-բարում ճաշելուն։
Ավելի ուշ գործին ավելացել է թանկարժեք հյուրանոցներում պետության հաշվին հանգստանալը, կոսմետոլոգիական կլինիկաներ այցելություններն ու հագուստ գնելը։
Ընդհանուր առմամբ, ծախսերի գումարը կազմել է 8,8 մլն լարի [մոտ $3,3 մլն]։ Այս գործի առնչությամբ կալանք է դրվել Վրաստանում Սաակաշվիլիի ընտանիքի ունեցվածքի՝ Կախեթիում նրա ամառանոցի, Սաակաշվիլիի տիկնոջը՝ Սանդրա Ռուլոֆսին պատկանող բնակարանի, ինչպես նաև նախկին նախագահի տատին պատկանող 12-ամյա «Հոնդա» ավտոմեքենայի վրա։
Սաակաշվիլիի Վրաստան վերադառնալուց հետո նրա դեմ ևս մեկ գործ է հարուցվել․
5. Սահմանի ապօրինի հատում։
![](https://jam-news.net/app/uploads/2021/11/244428979_405654134263523_3805153686096473438_n-1024x768.jpeg)
Ինչի՞ համար է արդեն դատապարտվել Սաակաշվիլին
Վրացական դատարանը հեռակա կարգով վճիռ է կայացրել նախկին նախագահի դեմ երկու գործով՝ Գիրգվլիանիի մարդասպաններին ներում շնորհելու և պատգամավոր Գելաշվիլիին ծեծելու գործերով։
Պատգամավորի ծեծի գործով Սաակաշվիլին դատապարտվել է վեց տարվա ազատազրկման։ Ներում շնորհելու գործով՝ երեք տարվա։ Քանի որ Վրաստանի օրենքներով տարբեր հանցագործությունների համար դատապարտյալի պատժի ժամկետները չեն գումարվում, Սաակաշվիլին այժմ, օրենքի համաձայն, կրում է առավելագույն վեցամյա ժամկետը, որի վերաբերյալ դատավճիռը կայացվել է Գելաշվիլիի ծեծի գործով։
Արդյո՞ք արդար են մեղադրանքները
Լրագրողների համար իրենց մեկնաբանություններում Սաակաշվիլիի փաստաբանները, որոնք մասնակցում են դատավարությանը, հայտարարում են, որ գործերում, որոնցով դատապարտվել է Սաակաշվիլին, նրա մեղքի ուղիղ ապացույցներ չկան։
Մասնավորապես, պատգամավորի ծեծի գործում ապացույցներ չկան, որ Սաակաշվիլին անձամբ է հրահանգել ծեծել նրան, մեղադրող կողմը հիմնվում է նախկին պաշտոնյաների, հետագայում արդեն՝ Սաակաշվիլիի քաղաքական ախոյանների անուղղակի ցուցմունքների վրա, որոնք հանցագործության անմիջական վկան չեն եղել։
Ինչ վերաբերում է ներման գործին, ապա, ըստ փաստաբանների և անկախ իրավաբանների, նախագահի անվերապահ իրավունք համարվող ներման ակտի համար լիազորությունների չարաշահման մեղադրանքն իրավական տեսակետից անթույլատրելի է։
Երկու գործերն էլ, որոնցով դատապարտվել է նախկին նախագահը, փաստաբանները բողոքարկել են Մարդու իրավունքների եվրոպական դատարանում։
Սաակաշվիլիի կուսակցության անդամներն ու նրա համախոհները հայտարարում են, որ Սաակաշվիլին անմեղ է, և Վրաստանի նոր իշխանության կողմից նրա դեմ հարուցված բոլոր գործերը քաղաքական նպատակներ են հետապնդում։