Ռուս քաղաքական գործիչ Նավալնիին թունավորել են «Նովիչոկով»։ Գերմանիայի իշխանությունների պաշտոնական եզրակացությունը
Ռուս քաղաքական գործիչ Ալեքսեյ Նավալնին, որը բուժվում է բեռլինյան հիվանդանոցում, թունավորվել է «Նովիչոկ» խմբի մարտական թունավոր նյութով։ Այս մասին հայտարարել է Գերմանիայի կառավարությունը՝ վկայակոչելով անալիզների արդյունքները, որոնք արել են գերմանացի զինվորականները։ Գերմանիայի իշխանությունները Ռուսաստանից սպասում են ընդդիմադիր գործչի նկատմամբ մահափորձի վերաբերյալ «անհապաղ բացատրություն»։
«Բեռլինի «Շարիտե» համալսարանական հիվանդանոցի առաջադրանքով՝ Բունդեսվերի (Գերմանիայի Զինված ուժեր) լաբորատորիան Ալեքսեյ Նավալնու անալիզների թունաբանական հետազոտություն է անցկացրել։ Այդպես մասնագետները «Նովիչոկ» խմբի նյարդապարալիտիկ մարտական նյութի կիրառման միանշանակ հետքեր են հայտնաբերել», — Գերմանիայի կառավարության պաշտոնական հայտարարությունն է մեջբերում ռուսական «Նովայա գազետան»։
Գերմանիայի կանցլեր Մերկելն ու կառավարության անդամներն այսօր այդ առթիվ արդեն հանդիպում են անցկացրել և պայմանավորվել հետագա քայլերի մասին, ասված է հաղորդագրությունում։
«Այն, որ Ալեքսեյ Նավալնին Ռուսաստանում մարտական քիմիական նյութերի զոհ է դարձել, շոկային լուր է։ Գերմանիայի դաշնային կառավարությունը խստագույնս դատապարտում է այդ հարձակումը։ Ռուսաստանի կառավարությունը պետք է անհապաղ պարզաբանումներ ներկայացնի կատարվածի առնչությամբ», — հայտարարել է Գերմանիայի կառավարությունը։
Երկրի ԱԳՆ–ն հետազոտությունների արդյունքների մասին նաև տեղյակ է պահել Ռուսաստանի դեսպանին, ԵՄ–ում և ՆԱՏՕ–ում իր գործընկերներին։ Գերմանիան մտադիր է գործընկերների հետ միասին համապատասխան արձագանք մշակել։
• Նավալնու նկատմամբ մահափորձը․ կասկածելի համընկնումներ
Ի՞նչ է «Նովիչոկը»
2018 թ–ի մարտին անգլիական Սոլսբերի քաղաքում մահափորձ է կատարվել ռուս նախկին հետախույզ Սերգեյ Սկրիպալի և նրա դուստր Յուլյայի նկատմամբ։ Բժիշկների օպերատիվ միջամտության շնորհիվ՝ նրանց հաջողվել է փրկել։ Տուժել է նաև դեպքի վայր ժամանած ոստիկանը։
Ինչպես պարզել է հետաքննությունը, մահափորձի ժամանակ կիրառվել է «Նովիչոկ» նյարդապարալիտիկ միջոցը, որը մշակվել և արտադրվել է Խորհրդային Միությունում։
Երեք շաբաթ անց Սոլսբերիում մահացել է մի կին, տուժել է նրա զուգընկերը։ Դա տեղի է ունեցել այն բանից հետո, երբ զույգն աղբամանում օծանելիքի սրվակ է հայտնաբերել, որում էլ եղել է «Նովիչոկը»։
Ըստ անգլիական ոստիկանության՝ Սկրիպալների նկատմամբ մահափորձին մասնակից են Ռուսաստանի Գլխավոր հետախուզական վարչության աշխատակիցներ Ռուսլան Բոշիրովն ու Ալեքսանդր Պետրովը։
![](https://jam-news.net/app/uploads/2020/09/RTX7R2C7-1024x650.jpg)
Նավալնու թունավորումը
Օգոստոսի 20–ի առավոտյան Ալեքսանդր Նավալնիի ինքնազգացողությունը վատթարացել է ինքնաթիռում։ Նա հոսպիտալացվել է Օմսկի օդանավակայանում ծանր թունավորման ախտանիշներով։ Ըստ քաղաքական գործչի մամուլի քարտուղարի՝ այդ առավոտյան Նավալնին միայն թեյ է խմել Տոմսկի օդանավակայանում, դրանից բացի ոչինչ չի կերել և չի խմել։
Հետազոտությունից հետո Օմսկի հիվանդանոցի բժիշկները հայտարարել են, որ թույն չեն գտել քաղաքական գործչի արյան մեջ, սակայն միաժամանակ հստակ ախտորոշում չեն կարողացել դնել։
Քաղաքական գործչի հարազատներն ու ընկերները կարողացել են նրան Գերմանիա տեղափոխել։ Օգոստոսի 22–ին նա ինքնաթիռով Բեռլին է տեղափոխվել՝ Շարիտե հիվանդանոց։
Նա դեռևս արհեստական կոմայի մեջ է։ Բժիշկների խոսքով՝ նրա կյանքին ոչինչ չի սպառնում, սակայն դեռևս դժվար է խոսել թունավորման հետևանքների մասին։
Արձագանքը․ «Բոլորը գիտեն, որ դա Պուտինն է»
Ռուս ընդդիմադիր գործիչ և Նավալնու համախոհ Վլադիմիր Միլովը կարծում է, որ, ի տարբերություն Պուտինի հակառակորդների թունավորման նախորդ դեպքերի, այս անգամ ոչ ոքի մոտ կասկածներ չկան, թե ով է մահափորձի պատվիրատուն։
«Նավալնու թունավորման հետ կապված իրավիճակի բնորոշ տարբերությունը․ այս անգամ աշխարհում գրեթե բոլորը՝ քաղաքական գործիչները, մամուլը, մեկնաբանները, միաձայն ասում են, որ թունավորողը Պուտինն է։ Ոչ մի կասկած չկա։ Սրա տակից նա այսքանից հետո չի կարող դուրս գալ», — գրում է քաղաքական գործիչը Facebook–ում։