«Ռուսաստանը հեռանում է Հարավային Կովկասից»․ Թոֆիկ Զուլֆուգարով
Ադրբեջանի նախկին արտգործնախարար Թոֆիկ Զուլֆուգարովի կարծիքով՝ Ռուսաստանը հեռանում է Հարավային Կովկասից, և այդ ելքն անխուսափելի է։ «Որովհետև այն պետք չէ նրան», — պնդում է ադրբեջանցի դիվանագետը։
- «Բաքուն պետք է հայտարարի, որ փակում է Լաչինի միջանցքը»․ Ադրբեջանի նախկին արտգործնախարար
- Ինչո՞ւ են մարտեր տեղի ունենում հայ-ադրբեջանական սահմանին։ Պատասխաններ Երևանից
- Յոթ երկիր Ռուսաստանին կոչ է արել հրաժարվել Աբխազիայի և Հարավային Օսիայի ճանաչումից
Ադրբեջանի նախկին արտգործնախարար Թոֆիկ Զուլֆուգարովի խոսքով՝ Ադրբեջանը փորձ ունի, թե ինչպես են ռուսական զորքերը լքել երկրի տարածքը։ «Բոլորովին վերջերս է եղել, երբ Գաբալայի ռադիոլոկացիոն կայանից, ըստ էության, շուրջ հազար զինծառայող է հեռացել։ Մենք չպետք է վախենանք մեզ պատմվող սարսափներից», — հիշեցրել է նա։
«Ռուսաստանի հեռանալը Կովկասից բնական գործընթաց է»
«Ինչ վերաբերում է Ռուսաստանի հեռանալուն, ապա դա տեղի է ունենում դե ֆակտո։ Որպես օրինակ վերցնենք այն փաստը, որ Ադրբեջանի տարածքում F-16 կործանիչներ կան։ Դրանք պատրաստ են մարտի մեջ մտնել ցանկացածի հետ, ով կհատի երկրի սահմանը։ Նման բան հետխորհրդային տարածքում երբեք և ոչ մի տեղ չի եղել։
![](https://jam-news.net/app/uploads/2021/08/108258575_tofiq.jpg)
Այո, Ղրղզստանի օրինակը կա, որտեղ ամերիկյան ռազմաբազա կար, սակայն միևնույն ժամանակահատվածում այնտեղ էր տեղակայված նաև ռուսական բազան, և նրանք միմյանց չէին դիմակայում», — հայտարարել է Ադրբեջանի նախկին արտգործնախարարը։
«Դրանից ելնելով, — նշել է Զուլֆուգարովը, — Ռուսաստանի հեռանալը Կովկասից բնական գործընթաց է, ես կասեի՝ պատմական»։
«Ռուսական պետությունը ոչ հնարավորություն ունի, ոչ ցանկություն»
Ադրբեջանցի դիվանագետը նշել է, որ ռուսական պետությունը «պարզապես հնարավորություն չունի սատարելու XIX դարի կայսերական նախագծերը։ Չկա ո՛չ տնտեսական, ո՛չ ֆիզիկական հնարավորություն։ Այսօր նաև այդպիսի ցանկություն չկա»։
«Մարտահրավերները, որոնք այսօր կանգնած են Ռուսաստանի առջև, ավելի արդիական են Ուկրաինայի համատեքստում։ Եվս մեկ մարտահրավեր է Սիբիրի ամայացումը։ Այնտեղ այդ պետությունը հստակ խնդիրներ ունի», — հավելել է նա։
Հայաստանում ՌԴ ռազմաբազայի մասին
Զուլֆուգարովն անդրադարձել է նաև Հայաստանում Ռուսաստանի ռազմական ներկայության հարցին, որտեղ գտնվում է ՌԴ միակ ռազմաբազան տարածաշրջանում․
«Իսկ ի՞նչ է իրենից ներկայացնում Հայաստանում գտնվող ռազմաբազան։ Ոչինչ։ Դա մի կղզյակ է, կովկասյան Նեպալ, որտեղ չորս հազարանոց անհասկանալի անձնակազմը պահպանում է տեխնիկան, որը մնացել է թևային սահմանափակումների ուղղությամբ իրականացրած կրճատումներից հետո։ Ընդամենը։
Անկասկած է, որ նման անպետք բազաները փակվելու են։ Դա նույն բանն է, որ նախորդ փուլում փակվում էին ռազմաբազաները Վիետնամում, Կուբայում և այլն»։
«Կովկասում մենք մեր մասին մեծ կարծիքի ենք»
«Մենք Կովկասում երբեմն մեծ կարծիքի ենք մեր մասին։ Կարծում ենք, որ բոլորին հետաքրքրում ենք։ Դա բնավ այդպես չէ։ Կարծում եմ, որ Կրեմլում էլ են սովորել տեսնել, թե ինչն ինչոց է կամ ով ով է։
Եկեք անկեղծ լինենք, Հայաստանում Ռուսաստանը պարզապես անելիք չունի։ Կարծում եմ, որ բան չի մնացել․ պետք է հասարակությանը բացատրել, և Ռուսաստանը քիչ-քիչ կհեռանա», — ասել է Թոֆիկ Զուլֆուգարովը Ռազմավարական վերլուծության վրացական կենտրոնին տված հարցազրույցում։