Պարետի որոշմամբ, Հայաստանում որոշ սահմանափակումներ հանվել են

Օգոստոսի 3-ի դրությամբ Հայաստանում կորոնավիրուսով վարակվածների թիվն ավելացել է 52-ով և դարձել 39 102:

Մահացել է ևս 8 մարդ: Մահացածների ընդհանուր թիվը հասավ 762-ի։

Առողջացել է ևս 111 պացիենտ, նրանց ընդհանուր թիվը կազմում է 29 861։

Ընդհանուր առմամբ, կատարվել է 167 095 թեստավորում, անցած օրվա ընթացքում՝ ընդամենը 394:

● Հայաստանը չի բացի սահմանները մինչև զբոսաշրջային սեզոնի ավարտը

● Կորոնավիրուսը կարող է օդով փոխանցվել։ Սա հայտարարվել է պաշտոնապես և փոխում է համավարակի դեմ պայքարի ողջ համատեքստը

● Կարանտին կամ ինքնամեկուսացում Վրաստան ժամանելուց հետո․ ինչպե՞ս պաշտպանել սեփական իրավունքները

Պարետ Տիգրան Ավինյանի նոր որոշմամբ, օգոստոսի 1-ից Հայաստանում գործող որոշ հակահամաճարակաբանական սահմանափակումներ հանվել են կամ փոխարինվել այլ պահանջներով։

Ուժը կորցրած է ճանաչվել պահանջը, ըստ որի յուրաքանչյուր օր ժամը 10։00-12։00-ը խանութները պետք է սպասարկեին միայն կենսաթոշակային տարիքի անձանց:

Չեղարկվել է նաև այն կետը, որով հանրային սննդի օբյեկտներում աշխատանքից հետո պետք է կազմակերպվեր սրբիչների և հիգիենայի այլ պարագաների ամենօրյա լվացք մասնագիտացված կազմակերպությունների կողմից։

Դրա փոխարեն յուրաքանչյուր հաճախորդի սպասարկելուց առաջ նրա ներկայությամբ պետք է իրականացվի սեղանի մակերեսի ախտահանում:

Նոր կանոններ են սահմանվել նաև մարմնամարզական օբյեկտների համար։

Այսուհետ յուրաքանչյուր մարզասարքի կողքին, տեսանելի վայրում անհրաժեշտ է ապահովել ալկոհոլային հիմքով ախտահանիչների առկայություն: Իսկ լողավազանի շուրջ նստարանները պետք է տեղադրվեն միմյանցից առնվազն մեկուկես մետր հեռավորության վրա։

Յուրաքանչյուր այցելուից հետո լոգախցիկը, հանդերձարանի պահարանը և նստարանները պետք է ախտահանվեն 70-90% սպիրտով կամ քլորի հիմքով ախտահանիչ միջոցով։

Հանվել է նաև պահանջը, ըստ որի այցելուները պետք է մարզումների ներկայանային արդեն մարզահագուստը հագած։ Չեղարկվել է մարզվելուց առաջ և հետո ցնցուղի ընդունումը տանն իրականացնելու մասին պահանջը։