Պատերազմ ջրի համար։ Ղրղզստանի և Տաջիկստանի սահմանին առնվազն 13 մարդ է զոհվել
Սահմանային կոնֆլիկտը Ղրղզստանի և Տաջիկստանի միջև բռնկվել է ապրիլի 29-ին։ Իսկական մարտական գործողություններ են ծավալվել երկու երկրների միջև։ Կողմերը կարողացել են պայմանավորվել հրադադարի մասին։ Կոնֆլիկտն առաջացել է ջրի պատճառով․ դա սուր հարց է, որի շուրջ պարբերաբար կոնֆլիկտներ են առաջանում սահմանին։
Ղրղզստանի կողմից կոնֆլիկտի հետևանքով ապրիլի 30-ի առավոտվա դրությամբ զոհվել է 13 մարդ, այդ թվում՝ 12-ամյա աղջիկ։ Տուժածների թիվը հասնում է 134-ի։ Ղրղզստանի առողջապահության նախարարության այս տվյալներն է նշում տեղի Kloop պարբերականը։
Հարյուրավոր մարդիկ են տարհանվել հակամարտության գոտուց։
Օզոդի ռադիոն պաշտոնական տվյալներ է նշում տաջիկական կողմից․ Ղրղզստանի հետ սահմանին հրաձգության հետևանքով վիրավորվել է երկու խաղաղ բնակիչ, նրանցից մեկը ծանր վիճակում է։
- Ղրղզստանի ընդդիմությունը, որը բողոքում է ընտրությունների արդյունքների դեմ, գրավել է կառավարական շենքերը
- Ո՞վ է տապալում Արցախի շուրջ պայմանավորվածությունները։ Հայաստանի և Ադրբեջանի կարծիքները կիսվում են
Ավելի վաղ հաղորդվում էր, որ Տաջիկստանի յոթ քաղաքացի է տուժել քարերից երկու երկրների քաղաքացիների միջև բախման ժամանակ, որը նախորդել է զինված հակամարտությանը։
Ղրղզ-տաջիկական սահմանին հակամարտությունը սկսվել է ապրիլի 28-ին, երկու երկրների սահմանին գտնվող ջրամբարի և ջրաբաշխման կետի պատճառով։ Ջրամբարի ջուրը, պայմանավորվածության համաձայն, նախանշված քվոտաներով օգտագործում են երկու երկրները։
![Սահմանային կոնֆլիկտ Ղրղզստանի և Տաջիկստանի միջև](https://jam-news.net/app/uploads/2021/04/111-1024x768.jpeg)
Ջրաբաշխման կետը վերահսկում է Ղրղզստանը, սակայն Տաջիկստանը հայտարարում է, որ դա իր տարածքն է, որն ապօրինի կերպով օկուպացրել է հարևան պետությունը։
Ամեն ինչ սկսվել է նրանից, որ տաջիկական կողմը փորձել է ջրաբաշխման կետի վրա տեսախցիկներ տեղադրել՝ ջրի բաշխումը վերահսկելու համար։ Սա կոնֆլիկտ է առաջացրել, որի ընթացքում երկու երկրների շուրջ 100-150 քաղաքացիներ քարկոծել են միմյանց։
Ապրիլի 29-ին կոնֆլիկտը սաստկացել է․ սահմանային տարածքներում զենք է կիրառվել երկու երկրների զինվորականների կողմից՝ ինքնաձիգներ, գնդացիրներ և ականանետներ։ Գնդակոծության հետևանքով փլվել է ղրղզական սահմանային ուղեկալը, իսկ Ղրղզստանն, ի պատասխան, գրավել է տաջիկական սահմանային դիրքը։ Երկու կողմերը սկսել են զորքեր կուտակել սահմանին։
Կողմերը հրադադարի և զորքերը հետ քաշելու շուրջ պայմանավորել են ապրիլի 29-ի երեկոյան։ Կողմերը մտադիր են նաև իրավիճակի դեէսկալացիայի վերաբերյալ բանակցություններ սկսել։
Ջուրը սուր խնդիր է երկու երկրների սահմանին ոռոգման սեզոնի ընթացքում, որը բազմիցս կոնֆլիկտների է բերել։ Տաջիկստանն ու Ղրղզստանը կիսում են ավելի քան 900 կմ պետական սահման, որի կեսը սահմանազատված չէ։