«Ամենակարևոր ճակատի» ղեկավարը․ աշխատակազմին ներկայացվեց նոր արտգործնախարարը

Վարչապետ Նիկոլ Փաշինյանն այսօր ներկայացրել է նորանշանակ արտգործնախարար Արա Այվազյանին՝ շեշտադրելով, որ դիվանագիտական ճակատն այժմ ամենակարևորն է երկրի համար: Եվ արտգործնախարարի վրա է դրվում պատասխանատվությունը՝ համախմբել դիվանագիտական համակարգը ազգային ու պետական խնդիրները լուծելու համար:

Արա Այվազյանի խոսքով՝ «Արցախի հերոսական գոյամարտի շարունակությունը ռազմադաշտից հետզհետե տեղափոխվում է դիվանագիտական դաշտ, և բոլորը լավ հասկանում են այն հսկայական պատասխանատվությունը, որ ունեն պետության, ժողովրդի և պատմության առաջ: Վստահ եմ, որ այս փուլում էլ  ձգտելու ենք անել անհնարինը»:

Վարչապետը շնորհակալություն է հայտնել նախկին նախարար Զոհրաբ Մնացականյանին աշխատանքի համար և հույս հայտնել, որ նա կաջակցի դիվանագիտական համակարգին՝ հաղթահարել խնդիրներն այս «չափազանց բարդ և ծանր ժամանակահատվածում»։

Զոհրաբ Մնացականյանի խոսքով՝ նորանշանակ նախարարն «ունի անհրաժեշտ ներուժ՝ ղեկավարելու ԱԳՆ-ն և առաջ տանելու մեր ազգային օրակարգն արտաքին քաղաքական ոլորտում»: