Մարտեր Արցախում։ 2020 թ-ի հոկտեմբերի 8-ի ռեպորտաժները, տեսանյութերը, լուսանկարները

Ադրբեջանի պաշտպանության նախարարության մամուլի ծառայությունը հակառակորդից գրաված ռազմավարով հերթական տեսանյութն է հրապարակել։

Լեռնային Ղարաբաղի օմբուդսմեն Արտակ Բեգլարյանը հաղորդում է, որ այսօրվա ընթացքում Ղազանչեցոց եկեղեցուն հասցված արդեն երկրորդ հարվածի հետևանքով լրագրողներ են վիրավորվել։ Նրանք նկարահանում էին նախորդ հարվածի հետևանքները։

«Սա միտումնավոր և նպատակաուղղված գրոհ է եկեղեցու և լրագրողների վրա, քանի որ նրանց հետևել են անօդաչու թռչող սարքերով», — գրել է օմբուդսմենը Twitter-ում։

Հայկական լրատվամիջոցները հաղորդում են, որ ռուս լրագրողներ են վիրավորվել։

«Հակառակորդի մարտական տեխնիկան, որը ցերեկային ժամերին վերադիրքավորվելու փորձ էր ուզում անել, ոչնչացվել է հրետակոծության հետևանքով։ Հակառակորդի ռազմական շարասյունը ոչնչացվել է», — հաղորդում է Ադրբեջանի պաշտպանության նախարարության մամուլի ծառայությունը։

Ռուսաստանի ԱԳՆ պաշտոնական ներկայացուցիչ Մարիա Զախարովան հաղորդել է, որ Զոհրաբ Մնացականյանը Մոսկվայում է գտնվելու հոկտեմբերի 11-13-ը և իր ռուս գործընկեր Սերգեյ Լավրովի հետ քննարկելու է իրավիճակը ղարաբաղյան հակամարտության գոտում։

«Ռուսաստանն ինչպես ազգային առումով, այնպես էլ ԵԱՀԿ Մինսկի խմբի շրջանակում հետևողականորեն գործադրում է բոլոր ջանքերն՝ ուղղված կրակի անհապաղ դադարեցմանն ու բանակցային գործընթացի վերսկսման համար պայմանների ստեղծմանը», — հայտարարել է Զախարովան շաբաթական ճեպազրույցի ժամանակ։

Նա ընդգծել է, որ Հայաստանի և Ռուսաստանի երկկողմ հարաբերությունները դաշնակցային բնույթ են կրում, և Մոսկվայում հույս ունեն, որ Հայաստանի արտգործնախարարի այցը Մոսկվա «նպաստելու է Անդրկովկասում կայունության և անվտանգության ամրապնդմանը»

«Շուշայի եկեղեցու ավերումը ռազմական գործողությունների ընթացքում ոչ մի ընդհանրություն չունի ադրբեջանական բանակի գործունեության հետ», — ասված է Ադրբեջանի պաշտպանության նախարարության մամուլի ծառայության հաղորդագրությունում։

Ժնևում մեկնարկել են ղարաբաղյան սրացման շուրջ բանակությունները ԵԱՀԿ Մինսկի խմբի հովանու ներքո։ Այս պահին հայտնի է հետևյալը (ՌԻԱ Նովոստիի հաղորդմամբ)․

«Լեռնային Ղարաբաղի շուրջ բանակցություններ են տարվում հինգշաբթի, Ժնևում, ԵԱՀԿ Մինսկի խմբի (Ռուսաստան, Ֆրանսիա, ԱՄՆ) համանախագահների և Ադրբեջանի ներկայացուցիչների մասնակցությամբ։

Հանդիպումն անցկացվում է ՄԱԿ սահմաններից դուրս, գաղտնի վայրում և փակ ձևաչափով։ Դրան մասնակցում են ԵԱՀԿ համանախագահները Ռուսաստանից, Ֆրանսիայից և ԱՄՆ-ից»։

Ի պատասխան Բաքվից իր դեսպանին խորհրդատվության համար հետ կանչելու Հունաստանի ԱԳՆ որոշման՝ Աթենքում Ադրբեջանի դեսպանը հետ է կանչվել Բաքու խորհրդատվության համար,- ասված է Ադրբեջանի ԱԳՆ մամուլի ծառայության հաղորդագրությունում։

Հայաստանի պաշտպանության նախարարությունը տեսանյութ է հրապարակել ղարաբաղյան հակամարտության գոտում ռազմական գործողություններին Սիրիայից բերված վարձկանների մասնակցության մասին։ «Զինուժ» հաղորդման մեջ տեսանյութ է հրապարակվել, որն արվել է Աֆրին քաղաքում։ Տեսանյութում տղամարդը դիմում է հավաքվածներին՝ հայտարարելով, որ Ադրբեջանում այժմ իսլամի պայքար է ընթանում։

«Հայկական զինված ուժերի կողմից Ադրբեջանի բնակավայրերի հրետակոծման հետևանքով հոկտեմբերի 8-ի առավոտվա դրությամբ զոհվել է 31 խաղաղ բնակիչ, ևս 154 մարդ տարբեր աստիճանի ծանրության մարմնական վնասվածքներ է ստացել», — հաղորդում է Ադրբեջանի գլխավոր դատախազության մամուլի ծառայությունը։

Հրետակոծման հետևանքով շարքից դուրս է եկել 133 քաղաքացիական օբյեկտ, 928 տուն և 45 բնակելի շենք,- նշված է հաղորդագրությունում։

Ադրբեջանական զինված ուժերի հրետակոծման հետևանքով տուժել է Սբ․ Ղազանչեցոց եկեղեցին (Սուրբ Ամենափրկիչ եկեղեցի), որը տեղացիները համարում են Շուշիի խորհրդանիշներից մեկը։ Ավերածության մասին է հաղորդել Լեռնային Ղարաբաղի Տեղեկատվական շտաբը։

Հայկական լրատվամիջոցների լրագրողները հաղորդում են, որ հրետակոծման պահին եկեղեցում երեխաներ են եղել, որոնք մինչ այժմ ուժեղ սթրեսի մեջ են։

«Հայկական զինված ուժերը հարված են հասցրել Բարդայի շրջանի տարածքին «Տոչկա Ու» մարտավարական հրթիռային համալիրներից», — ասված է Ադրբեջանի պաշտպանության նախարարության մամուլի ծառայության հաղորդագրությունում։

Երևանում ձերբակալվել է Ստեփանակերտի բնակիչ, որը Հայաստանի ղեկավարությանը մեղադրում էր տարածքներ հանձնելու նպատակով Ադրբեջանի հետ համաձայնության մեջ լինելու համար։ Այս մասին հաղորդել է Հայաստանի վարչապետ Նիկոլ Փաշինյանը ֆեյսբուքյան իր էջում։

Վարչապետը մի քանի օր առաջ իմացել է, որ «առաջնագծի հատվածներից մեկում ինչ-որ մարդիկ գնացել կռվող զինվորներին համոզել են, թե «Նիկոլը հողերը ծախել է»»։ Ըստ Փաշինյանի՝ զինվորներին համոզել են, թե Հայաստանի և Ադրբեջանի իշխանությունները պայմանավորվածություն ունեն այս պատերազմի մասին, այնպես որ, դիրքերը պահելը իմաստ չունի։

«Իմ հանձնարարությամբ ԱԱԾ-ում սկսվել է հետաքննություն և գործող գլխավոր անձանցից մեկը, որ Ստեփանակերտի բնակիչ է, հայտնաբերվել և ձերբակալվել է Երևանում: Հարուցված քրեական գործի շրջանակներում տեղի է ունենում քննություն», — հաղորդել է Նիկոլ Փաշինյանը։

Նա կոչ է արել բոլորին, ովքեր ունեն նման տեղեկություններ, դիմել Ազգային անվտանգության ծառայություն։

«Հայկական զինված ուժերն առավոտից հրետակոծում են Գերանբոյի, Տերտերի և Աղդամի շրջանների գյուղերը։ Կան զոհեր և վիրավորներ», — հաղորդում է Ադրբեջանի պաշտպանության նախարարության մամուլի ծառայությունը։

Գիշերվա ընթացքում իրավիճակն էականորեն չի փոխվել, իրադրությունը եղել է կայուն-լարված, հայտնում է Արցախի պաշտպանության նախարարությունը․
«Առանձին հատվածներում շարունակվել են փոխհրաձգություններ, հրթիռա-հրետանային հարվածներ: Ներկա պահին հյուսիսային և հարավային ուղղություններում վերսկսվել են մարտական գործողությունները»:
Հոկտեմբերի 8-ի վաղ առավոտյան հարավային ուղղությամբ հակառակորդը գրոհի փորձ է ձեռնարկել, սակայն Ջաբրայիլի մատույցներից հետ է շպրտվել։

«Հայկական զինված ուժերը հրետակոծում են Բարդայի և Աղջաբեդի շրջանների գյուղերը։ Ադրբեջանական բանակը համապատասխան միջոցներ է ձեռնարկում», — ասված է Ադրբեջանի պաշտպանության նախարարության մամուլի ծառայության հաղորդագրությունում։

• Հայկական կողմից սեպտեմբերի 27-ին մարտերի մեկնարկից ի վեր, ըստ պաշտոնական տվյալների, զոհվել է ավելի քան 320 զինծառայող, խաղաղ բնաչության շրջանում սպանվել է 21 մարդ, վիրավորվել 80-ը։ Ադրբեջանական կողմից զոհվել է 30 խաղաղ բնակիչ, 143-ը վիրավորվել է։ Թե քանի ադրբեջանցի զինծառայող է զոհվել, չի հաղորդվում։ Փորձագետները ենթադրում են, որ զոհերի և վիրավորների թիվը երկու կողմից հսկայական է՝ հաշվի առնելով մարտերի ինտենսիվությունը, որոնք շարունակվում են արդեն 12-րդ օրը։
• Ըստ կողմերի հաղորդագրությունների՝ մարտերը շարունակվել են ճակատի ողջ երկայնքով։
• Շարունակվել է Ստեփանակերտի, Ադրբեջանի տարածքում գտնվող բնակավայրերի հրետակոծությունը։
• Հայաստանի պաշտպանության նախարարությունը հաղորդել է, որ հայ զինծառայողները վերադարձրել են Վարանգաթաղ (Լուլասազ) բարձունքն ու բարելավել դիրքերը։ Ադրբեջանի պաշտպանության նախարարությունը հերքել է այս տեղեկությունը։
• Ռուսաստանի նախագահը մեկնաբանել է մարտերը Ղարաբաղում և ասել, որ «շատ է անհանգստանում», քանի որ «և՛ Ադրբեջանում, և՛ Հայաստանում, և՛ Ղարաբաղում բնակվող մարդիկ մեզ համար օտար չեն»։ Պուտինը նաև ասել է, որ Հայաստանի տարածքում մարտեր չեն ընթանում, և «Երևանը Մոսկվայի կողմից իր դաշնակցային պարտավորությունների կատարման վերաբերյալ հարցեր չունի»։
• Լսումներ են անցկացվել Եվրախորհրդարանում, մտահոգություններ են հնչել, որ տարածաշրջանի երկրները կարող են ներքաշվել ղարաբաղյան սրացման մեջ։
• Հոկտեմբերի 8-ին Ֆրանսիայի, Ռուսաստանի և ԱՄՆ ներկայացուցիչները, որպես ԵԱՀԿ Մինսկի խմբի համանախագահներ (համակարգում է ղարաբաղյան հակամարտության բանակցային գործընթացը), Ժնևում հանդիպելու են Ադրբեջանի և Հայաստանի արտգործնախարարների հետ։ Նույնատիպ հանդիպում է պլանավորված նաև Մոսկվայում, հոկտեմբերի 12-ին։

Մարտեր Արցախում։ 2020 թ-ի հոկտեմբերի 7-ի ռեպորտաժները, տեսանյութերը, լուսանկարները