Մասնակցիր ընտրություններին և շահիր TESLA։ Վրացական ընդդիմադիր կուսակցության նախաձեռնությունը
Վրաստանի «Գիրչի» (‘կոն’) ընդդիմադիր կուսակցությունը TESLA ավտոմեքենաներ է խաղարկելու ընտրություններին մասնակցած քաղաքացիների շրջանում։ Կուսակցությունը մտադիր է ավտոմեքենաներ ձեռք բերել այն դեպքում, եթե խորհրդարան անցնի և պետական ֆինանսավորում ստանա։
«Գիրչին» չի պատրաստվում փող վերցնել հարկատուներից։ Մենք շատ ենք մտածել, թե ինչպես վարվել այդ գումարի հետ, ու որոշել ենք այն օգտագործել ընտրություններին մասնակցելու համար քաղաքացիներին մոտիվացնելու վրա։ Կուսակցությանը հատկացվելիք բյուջետային փողերով մենք TESLA ավտոմեքենաներ կգնենք, որոնք կխաղարկենք ընտրողների շրջանում։ Որքան շատ ձայն հավաքի «Գիրչին», այդքան բյուջետային ֆինանսավորումն ավելի շատ կլինի, այդքան ավելի շատ TESLA ավտոմեքենա կկարողանանք ձեռք բերել», — ասել է կուսակցության առաջնորդ Զուրաբ Ջափարիձեն։
- Ինչո՞ւ է կարևոր պայքարել Վրաստանի համամասնական ընտրական համակարգի համար
- Վրաստանի խորհրդարանն ընտրական համակարգի վերաբերյալ սահմանադրական փոփոխություններ է հաստատել
Ըստ գործող օրենսդրության՝ առաջին 50 հազար ձայնի համար կուսակցությունը բյուջեից կստանա 15–ական լարի [մոտ $5] յուրաքանչյուր ձայնի և հնգական լարի [մոտ $1,5]՝ յուրաքանչյուր հաջորդ ձայների համար։
Ըստ «Գիրչիի» առաջնորդի՝ եթե կուսակցությունը հաղթահարի մեկ տոկոս շեմը 2020 թ–ի խորհրդարանական ընտրություններում և խորհրդարան անցնի, ապա կպահանջի պետական բյուջեից կուսակցությունների ֆինանսավորման չեղարկում։
Խաղարկությանը կարող է մասնակցել ցանկացած ոք, սակայն մի քանի պայման կա, որոնք անհրաժեշտ է կատարել․ ցանկացողները պետք է գրանցվեն կուսակցության կայքում, ընտրությունների օրը լուսանկարվեն ընտրատեղամասում այնպես, որ երևա ընտրատեղամասի համարն, այնուհետև լուսանկարը հրապարակեն ֆեյսբուքյան իրենց էջում։
Կուսակցությունն ասում է, որ նշանակություն չունի, թե որ կուսակցության կամ թեկնածուի օգտին է քվեարկելու ընտրողը։ Կուսակցության համար գլխավորն այն է, որ ընտրողներն ընտրություններին մասնակցեն։
«Գիրչին» ազատական ոչ խորհրդարանական կուսակցություն է, որի ուղղվածությունը երիտասարդությունն է։ Կուսակցությունը հայտնի է մարիխուանայի ապաքրեականացման համար և պարտադիր զինվորական ծառայության դեմ իր պայքարով։ Նրա ամենահայտնի նախաձեռնություններից մեկը նոր եկեղեցի ստեղծելն էր, որը երիտասարդներին հոգևորական է դարձնում և օրինականորեն ազատում բանակում ծառայելուց։ Ինչպես նաև «Շմաքսի» այլընտրանքային ծառայության ստեծումն այն բանից հետո, երբ Թբիլիսիում տաքսիների պարտադիր լիցենզավորում էր սահմանվել։
2018 թ–ի նախագահական ընտրություններում կուսակցության առաջնորդ Զուրաբ Ջափարիձեն ստացել էր ընտրողների ձայների երկու տոկոսը։
