«Արցախն Ադրբեջանի կազմում չի լինելու»․ Լեռնային Ղարաբաղի նախագահ

Լեռնային Ղարաբաղի նախագահ Արայիկ Հարությունյանը առաջին մեծ ասուլիսն է տվել ռազմական գործողությունների մեկնարկից հետո։ Նրա հանդիպումը լրագրողների հետ նախատեսված էր հոկտեմբերի 10-ի առավոտյան, սակայն այն հետաձգվել է․ ընթանում էին հումանիտար հրադադարի նախապատրաստական աշխատանքներ։

Նախօրեին հրադադարի ռեժիմ հաստատելու շուրջ պայմանավորվել էին Հայաստանի և Ադրբեջանի արտգործնախարարները Ռուսաստանի մասնակցությամբ և միջնորդությամբ։ Եվ իր ասուլիսի սկզբում Արայիկ Հարությունյանը շնորհակալություն էր հայտնել Ռուսաստանի նախագահ Վլադիմիր Պուտինին հրադադարի ռեժիմի հաստատմանն ուղղված ջանքերի համար։

Ադրբեջանն ու Հայաստանը պայմանավորվել են հրադադարի մասին. ի՞նչ պայմաններով

Մոսկվայում կայացած բանակցություններում ՌԴ, Հայաստանի և Ադրբեջանի ԱԳՆ նախարարները համաձայնության եկան Ղարաբաղում ռազմական գործողությունների ​​գոտում հրադադարի ռեժիմի մասին: Բանակցությունները կվերսկսվեն նախկին ձևաչափով

Ստորև՝ Լեռնային Ղարաբաղի նախագահ Արայիկ Հարությունյանի ելույթի գլխավոր թեզերը․

• Ղարաբաղն իրացնում է ինքնապաշտպանության իր իրավունքը։

• Արցախն Ադրբեջանի մաս չի լինելու։

• Ադրբեջանը Թուրքիայի և միջազգային ահաբեկչության աջակցությամբ ցեղասպանություն է իրականացնում մի ժողովրդի, որը 1988 թ-ին հայտարարել է իր հայրենիքում ազատ ապրելու իրավունքի մասին:

• Ղարաբաղն ակնկալում է համաշխարհային հանրության աջակցությունը միջազգային ահաբեկչության դեմ այստեղ մղվող պայքարին՝ ոչ միայն իրադարձությունների լուսաբանմամբ, այլև ավելի առարկայական արձագանքով։

• Ղարաբաղի ժողովրդի դեմ պայքարում միջազգային ահաբեկչության մասնակցության փաստը հաստատվել է տարբեր ձևաչափերով՝ ռուսական, ամերիկյան, ֆրանսիական իշխանությունների կողմից։

• Ղարաբաղի խաղաղ բնակչության դեմ Ադրբեջանը կասետային ռումբեր, հարվածային ԱԹՍ-ներ է կիրառում, ոչնչացնում քաղաքացիական ենթակառուցվածքները։ Ստեփանակերտում գրեթե թաղամաս չի մնացել, որը հրատակոծված չլինի։

• Իսրայելի իշխանությունները պատասխանատվություն են կրում ցեղասպանության համար, որն այժմ իրականացվում է Ղարաբաղի հայերի նկատմամբ, քանի որ նրանք ադրբեջանական կողմին մատակարարում են ոչ միայն հարվածային ԱԹՍ-ներ, այլև մասնագետներ, որոնք կառավարում են այդ մահաբեր զենքը։

• Ղարաբաղի իշխանությունները մշտապես կապի մեջ են Հայաստանի վարչապետի հետ, նրան են փոխանցում իրավիճակի և քաղաքացիների բոլոր խնդիրների մասին տեղեկությունները, և չկա հարց, որ տեղում չլուծվի։

• Եթե այդպիսի անհրաժեշտություն լինի, ապա ԼՂ նախագահը կդիմի Հայաստանի իշխանություններին՝ Ղարաբաղի անկախությունը ճանաչելու խնդրանքով։

• Այս պահին հրադադարի ռեժիմը հիմնականում պահպանվում է։ Սակայն երեկ հրադադարը խախտվում էր, և այժմ հայտնի չէ, թե որքան այն կտևի։

• Եթե Մոսկվայում ձեռք բերված պայմանավորվածությունները Բաքուն չկատարի, «դա կնշանակի, որ Ադրբեջանը ստիպված կլինի հաշտություն խնդրել։ Երկարատև պատերա՞զմ են ուզում, կստանան»։

• Ղարաբաղի բնակավայրերի հրետակոծության ժամանակ օգտագործվել են «Սմերչ», «Պոլոնեզ» հրթիռներ և կասետային ռումբեր։

• Հարությունյանը շնորհակալություն է հայտնել լրագրողներին, «որոնց աշխատանքի շնորհիվ քաղաքակիրթ աշխարհն իմանում է Արցախի իրադարձությունների մասին»։

• Եթե այս երկու օրում չկատարվեն պայմանավորվածությունները, որոնք ձեռք են բերվել Հայաստանի և Ադրբեջանի ԱԳ ղեկավարների միջև Ռուսաստանի նախագահի և ԵԱՀԿ Մինսկի խմբի միջնորդությամբ, դա կնշանակի, որ Ադրբեջանը չի հարգում միջազգային իրավունքը։

«Այդ դեպքում Ստեփանակերտը կդիմի Հայաստանի իշխանութուններին և միջազգային հանրությանն՝ Արցախի Հանրապետության անկախությունը ճանաչելու կոչով։ Ես հայրենական պատերազմ կհայտարարեմ և բոլոր հայերին կոչ կանեմ մասնակցել ոչ միայն նյութապես, այլև ֆիզիկապես։ Մենք չենք հրաժարվելու մեզ պարտադրված պատերազմից»։