Հայաստանում 12 տարվա ազատազրկման դատապարտված պաշտոնյան ազատ է արձակվել

Հայաստանի պետական բյուջեից 300 միլիոն դրամ յուրացնելու համար 12 տարվա ազատազրկման դատապարտված Սոցիալական ապահովության պետական ծառայության նախկին պետ Վազգեն Խաչիկյանն ազատ է արձակվել:

Կենսաթոշակների նշանակման և վճարման գործընթացում հայտնաբերված չարաշահումների դեպքերի առիթով դատապարտված պաշտոնյային ներում է շնորհել նախագահ Սերժ Սարգսյանը:

Խաչիկյանը կալանավորվել էր 2012 թ.-ին, 2014 թ.-ին դատապարտվել 12 տարվա ազատազրկման: Պաշտոնյան ազատվել է սահմանված պատիժը կրելու ժամկետից ավելի վաղ: Հայաստանի քրեակատարողական վարչության հանրային կապերի բաժնից ասել են, որ նա ազատվել է «պատժի լրիվ կրումով» և չեն մեկնաբանել, թե ինչպես է ստացվել, որ 12 տարվա պատիժը հիմա է ավարտվել:

Նախագահի մամուլի խոսնակը ևս հրաժարվել է մեկնաբանել, թե ինչու է Սերժ Սարգսյանը նրան ներում շնորհել՝ նշելով, որ այդ հրամանագրի բովանդակությունը գաղտնի է: Արդարադատության նախարար Դավիթ Հարությունյանն էլ մեկնաբանել է, որ ներում շնորհելու խնդիրը կարգավորվում է սահմանադրությամբ է, ներում հայցելն էլ՝ մարդու իրավունքն է։ Հարությունյանի խոսքով՝ ազատ արձակելուց առաջ բազում գործոններ են հաշվի առնվում:

Իրավապաշտպաններն ասում են, որ Վազգեն Խաչիկյանը Հայաստանում կոռուպցիայի համար մեղադրված այն պաշտոնյան էր,  ում կատարած հանցագործությունն այլևս հնարավոր չէր կոծկել: Այդ պատճառով վերջինս դատապարտվեց ազատազրկման:

Իրավապաշտպան Ժաննա Ալեքսանյանի համոզմամբ, նրան ազատ արձակելով, «Սերժ Սարգսյանը ցույց տվեց, որ Վազգեն Խաչիկյանը իր թիմի անդամն է, և նրան ներվում է ամեն ինչ, այսինքն գործում է ընտրովիության սկզբունքը, այսինքն ով իրենց մերձավոր միջավայրից է, կարող է նաև երեք տարի անցկացնել բանտում, իսկ մնացած կալանավորները պետք է ոչ համաներման, ոչ էլ ներման արժանանան»: