Հայաստանում արդեն կա կորոնավիրուսով 20 հիվանդ: Ինքնամեկուսացվել և կորոնավիրուսի թեստ են հանձնել վարչապետն ու նրա կինը

Հայաստանում օր օրի ավելանում է կորոնավիրուսով վարակվածների թիվը: Մարտի 11-ից արդեն 20 դեպք է գրանցվել, վարակվածներից մեկի մոտ զարգացել է թոքաբորբ: Կարանտինում են գտնվում շուրջ 200 մարդ:

Կորոնավիրուսի թեստ են հանձնել վարչապետ Նիկոլ Փաշինյանն ու նրա կինը՝ Աննա Հակոբյանը: Բանն այն է, որ Բրազիլիա կատարած իր վերջին այցի ընթացքում Աննա Հակոբյանը գրկախառնվել է այդ երկրի նախագահի կնոջ հետ: Հանդիպումից հետո O Dia թերթը, հղում անելով կառավարության աղբյուրներին, հաղորդել է, որ Բրազիլիայի նախագահը կորոնավիրուսի թեստ է հանձնել, և արդյունքը դրական է եղել:

Ավելի ուշ տեղեկություն հայտնվեց, որ թեստը բացասական էր: Սակայն Նիկոլ Փաշինյանը և Աննա Հակոբյանը որոշեցին անցնել բոլոր անհրաժեշտ ընթացակարգերը և ինքնամեկուսացվեցին մինչև թեստի արդյունքները ստանալը:

Մարտի 14-ի երեկոյան հաղորդվեց, որ նրանք առողջ են:

• Հայաստանում կորոնավիրուսը դուրս է գալիս մայրաքաղաքի սահմաններից

• Կորոնավիրուս․ պանդեմիա է հայտարարվել։ Ի՞նչ է դա նշանակում և ի՞նչ սպասել

• Վրաստանում կորոնավիրուսով հիվանդների թիվը հասել է 30-ի

Վերջին թվերը      

Մարտի 14-ին վարակվածների վերաբերյալ թվերը փոփոխվել են ողջ օրվա ընթացքում:

Սկզբում առողջապահության նախարար Արսեն Թորոսյանը հաղորդեց, որ վարակվածների ընդհանուր թիվը հասել է 15-ի, կարանտինի մեջ են 200 մարդ.

«Մենք հենց նոր վերջացրինք ևս 38 հետազոտություն, որոնցից 36-ը բացասական դուրս եկան, իսկ երկուսը՝ դրական: Դրական թեստով պացիենտները համաճարակաբանորեն կապված են Էջմիածին քաղաքում տեղի ունեցած դեպքի հետ և ի սկզբանե մեկուսացվել են»:

Էջմիածնում տեղի ունեցած դեպքի մասին խոսելով՝ նախարարը նկատի ուներ վարակվածներից մեկի հետ կապված պատմությունը։ Այն հայտնի դարձավ մարտի 11-ին: Կինը վերադարձել է Հայաստան Իտալիայից և չի պահպանել տնային կարանտինը: 10 օրվա ընթացքում, մինչ նրա մոտ վիրուսը հայտնաբերելը, կինը հասցրել է մասնակցել մի շարք մարդաշատ միջոցառումների, այդ թվում նշանադրության արարողության:

Այժմ այդ տոնակատարությանը հրավիրված մի քանի տասնյակ մարդ գտնվում են կարանտինի մեջ, մի քանիսը, պարզվում է, վարակված են:

Առողջապահության նախարարի խոսքերով՝ նոր վարակվածների հիմնական մասը Էջմիածնում նշանադրության մասնակիցներն են:

Վերջին մի քանի օրվա ընթացքում այդ քաղաքը համարվում է վարակի տարածման օջախ: Քաղաքապետ Դիանա Գասպարյանը հանդես է եկել կոչով.

«Կոչ եմ անում զերծ մնալ Էջմիածին-Երևան (և հակառակը) անկանոն ուղևորափոխադրումներ իրականացնող մասնավոր տաքսիների ծառայություններից օգտվելուց: Առհասարակ, խնդրում եմ բոլորին տանը մնալ, դուրս գալ քաղաքից ծայրահեղ անհրաժեշտության դեպքում և սեփական մեքենաներով, իսկ եթե դա հնարավոր չէ, ապա հասարակական տրանսպորտով, քանի որ այն պարբերաբար ախտահանվում է»:

Մինչև մարտի 11-ը Հայաստանում կար Իրանից ժամանած միայն մեկ վարակված, կարանտինի մեջ էին միայն նրանք, ովքեր նրա հետ շփման մեջ էին եղել: Իսկ հիմա վարակվածների թիվը աճում է օր օրի:

Մարտի 14-ի երեկոյան Հայաստանում հիվանդությունը հաստատվել է արդեն 20 մարդու մոտ:

 Արդյոք կորոնավիրուսը կազդի հանրաքվեի անցկացման վրա

Վարակվածների թվի աճի հետ՝ Հայաստանում սկսեցին խոսել ապրիլի 5-ին նշանակված սահմանադրական հանրաքվեն չեղարկելու կամ հետաձգելու հնարավորության մասին:

Գործող օրենսդրության համաձայն՝ հանրաքվեն կարող է չեղարկվել կամ հետաձգվել երկրում արտակարգ կամ ռազմական դրություն մտցնելու դեպքում: Ինչպես վարվել վիրուսի դեպքում՝ դեռ պարզ չէ:

Ինքնաթիռներն ավելի քիչ են թռչելու Հայաստան

Կորոնավիրուսի պատճառով որոշ ավիաընկերություններ չեղարկել են դեպի Երևան իրենց չվերթները, հաղորդել է «Զվարթնոց» օդանավակայանի հասարակայնության հետ կապերի բաժնի ղեկավար Սաթենիկ Հովհաննիսյանը.

«Չեղարկված են «Ryanair» ավիաընկերության Երևան – Միլան, Երևան – Հռոմ, «Armenia Airlines» ավիաընկերության Երևան – Լիոն, Երևան – Թելավիվ, «Qatar Airways»-ի Դոհա – Երևան, «Բելավիա»-ի Մինսկ – Երևան, «Fly Dubai»-ի Դուբայ – Երևան չվերթները, «Pegas Fly»-ը ծրագրում է չեղարկել Սոչի – Երևան չվերթները»: