Ադրբեջանը իսրայելական անօդաչու սարքեր է փորձարկում հայկական դիրքերի ուղղությամբ

Հայաստանում հետևում են իսրայելական անօդաչու սարքերը հայկական դիրքերի վրա փորձարկելու հետ կապված տեղեկատվությանը, որը հրապարակվել է վերջերս իսրայելական մամուլում: ՀՀ արտաքին գործերի նախարարի մամուլի խոսնակ Տիգրան Բալայանը ասել է, որ իրենք հետևում են միջադեպի հետ կապված զարգացումներին:

Haaretz պարբերական-ը օրերս հրապարակել է տեղեկություն այն մասին, որ Իսրայելի պաշտպանության նախարարությունը հետաքննություն է սկսել Ադրբեջանին հարվածային անօդաչու թռչող սարքեր մատակարարող Aeronautics Defence System ընկերության գործողությունների առնչությամբ: Մոտ մեկ ամիս առաջ այս ընկերության աշխատակիցները մեկնել են Ադրբեջան՝ իրենց արտադրության Orbiter 1K անօդաչուի վաճառքի վերաբերյալ պայմանագիրը կնքելու համար, և նրանց խնդրել են կիրառել պայթուցիկներով զինված սարքը հայկական բանակի ռազմական թիրախի ուղղությամբ՝ որպես փորձարկում պատվերի ընդունումից առաջ:

Aeronautics Defense Systems ընկերությունը հայտարարում է, որ փորձարկումն իրականացվել է անօդաչուն գնողի կողմից:

«Aeronautics-ը վաճառում է իր արտադրանքը մոտ 50 տարբեր երկրի և միայն Պաշտպանության արտահանման վերահսկողության գործակալության հաստատման դեպքում: Կիրառման գործողությունն իրականացրել է միայն գնորդը և իր պատասխանատվությամբ: Aeronautics-ը երբեք չի իրականացրել կենդանի թիրախների նկատմամբ ցուցադրություններ, և դա այդպես է եղել նաև տվյալ դեպքում»,- մամուլի փոխանցմամբ հայտարարել է ընկերությունը:

Ւսրաելական մամուլը հաղորդում է նաև այսպիսի մանրամասներ միջադեպի առնչությամբ. ընկերության մասնագետները հրաժարվել են գործարկումից անգամ իրենց դեմ ուղղված սպառնալիքներից հետո, քանի որ դա կարող էր հանգեցնել զոհերի: Սակայն ընկերության երկու բարձրաստիճան աշխատակից փորձել են գործարկել իրենց արտադրության սարքերը: Եվ գուցե միայն դրանց կիրառման փորձի պակասի պատճառով երկու անօդաչուն էլ թիրախին չեն հարվածել, և հայկական կողմին ոչ մի վնաս չի հասցվել՝ դրանցից մեկը հարված է հացրել հայկական դիրքից մոտ 100 մետր հեռավորության վրա:

Իսրաելական մամուլը գրում է, որ երկու մասնագետներից մեկը հեռացել է ընկերությունից, մյուսը նույնպես պատրաստվում է հեռանալ:

Իսրայելի պաշտպանության նախարարությունը հրաժարվում է մեկնաբանել ռազմական արտահանմանը վերաբերող հարցեր ընդհանրապես, այդ պատճառով չի անդրադառնում և այս մեկին: