Միխեիլ Սաակաշվիլին վտարվել է Ուկրաինայից: Այժմ նա Լեհաստանում է

Միխեիլ Սաակաշվիլին ձերբակալվել է Ուկրաինայի հատուկ ծառայությունների կողմից, երբ ճաշելիս է եղել Կիևի «Սուլուգունի» ռեստորանում:

Ականատեսների խոսքով՝ ռեստորանին զինվորական համազգեստով մարդկանցով լի միկրոավտոբուս է մոտեցել: Նրանք ներխուժել են ռեստորան և ձերբակալել Վրաստանի նախկին նախագահին: Ձերբակալելուց հետո մի քանի ժամվա ընթացքում Սաակաշվիլիի գտնվելու վայրի մասին ոչինչ հայտնի չէր: Ուկրաինայի իշխանության ներայացուցիչները ձեռնպահ են մնացել հստակ հայտարարություններից:

Ավելի ուշ պարզ է դարձել, որ Օդեսայի նախկին մարզպետին և «Նոր ուժերի շարժում» ընդդիմադիր կուսակցության առաջնորդին տարել են Բորիսպոլ օդանավակայան, իսկ այնտեղից՝ մասնավոր ինքնաթիռով ուղարկել Լեհաստան: Ուկրաինայի սահմանապահ ծառայությունը հաստատել է, որ Սաակաշվիլին ուղարկվել է այն երկիր, որտեղից մտել է Ուկրաինա նախորդ տարվա սեպտեմբերին:

Դա հաստատել են նաև Լեհաստանի սահմանապահ ծառայությունում: Լեհական գերատեսչության պաշտոնական կայքում հրապարակված հայտարարությունում ասված է, որ Լեհաստանն իր տարածքում ընդունել է Վրաստանի նախկին նախագահին:

«Այդ որոշման համար հիմք է դարձել ռեադմիսիայի մասին Ուկրաինայի միգրացիոն ծառայության ներկայացրած դիմումը: Ուկրաինական կողմի դիմումի դիտարկման գործում իր դերն է խաղացել նաև այն փաստը, որ Միխեիլ Սաակաշվիլիի կինը ԵՄ պետության քաղաքացի է», — ասված է Լեհաստանի սահմանապահ ծառայության հայտարարությունում:

Լեհաստան ժամանելուց անմիջապես հետո Սաակաշվիլիի հետ կապվել է «Ռուսթավի-2» հեռուստաընկերությունը:

«Կատարվածը խուճապի սուր արտահայտում է: Նրանք ոչ ոքից այդպես չեն վախենում, ինչպես ինձնից», — հայտարարել է Սաակաշվիլին հեռուստաընկերությանը տված հարցազրույցում: Նրա խոսքով՝ Կիևից նրան առևանգել են, սպառնացել՝ զենքի կիրառմամբ: Նա հաղորդել է, որ լեհական կողմն իրեն ջերմ է ընդունել: «Ինձ տեսնելու էին եկել պատգամավորներ: Պետական պահպանության խումբ էին տրամադրել, շատ ջերմ են դիմավորել», — հայտարարել է Սաակաշվիլին:

Նրա խոսքով՝ իրեն Վրաստան չեն ուղարկել, քանի որ «Իվանիշվիլին տկար է և վախենում է: Եթե նա ինչ-որ բանի ունակ լիներ, Պորոշենկոյի հետ բանակցություններ կտաներ, որպեսզի ինձ իրեն փոխանցեին»: «Սակայն նրանք երկուսն էլ ինձնից վախենում են, ինչպես կրակից», — հայտարարել է Սաակաշվիլին:

Այն հարցին, թե արդյոք Սաակաշվիլին կշարունակի քաղաքական պայքարը, նա այսպես է պատասխանել.

«Բանտ նստեցրին, այնտեղից սկսեցի պայքարել: Եվրոպա վտարեցին, Եվրոպայից կպայքարեմ: Դա խնդիր չէ կապի ժամանակակից միջոցների առկայության պարագայում: Նրանք՝ Իվանիշվիլին և Պորոշենկոն, իրոք մտածում են, թե ազատվե՞լ են ինձնից: Իրականում ամեն ինչ դեռ նոր է սկսվում: Ես կօգնեմ վրացի և ուկրաինացի ժողովուրդներին ազատվել այդ երկու դժբախտություններից, այդ ժանտախտից: Երկու օլիգարխներին [Իվանիշվիլի և Պորոշենկո] հեռացնելու գործում ես վճռորոշ դեր եմ խաղալու»: