Ընդդիմադիր շարժումը «ականահարում է Հայաստանի ինքնիշխանությունը»․ արտգործնախարար
Ընդդիմադիր դիվանագետների առաջարկը
«Ականահարելով Ալմա-Աթայի հռչակագիրը և դրա հիման վրա խաղաղության գործընթացը՝ այդ մարդիկ շարունակում են ականահարել Հայաստանի ինքնիշխանությունը, պետականությունը, տարածքային ամբողջականությունը։ Լավագույն մեկնաբանությամբ՝ չգիտակցելով, վատագույն մեկնաբանությամբ՝ այլ երկրի ուղղակի թելադրանքով»,- Դիվանագետների համահայկական խորհրդի մասին նման հայտարարություն է արել արտգործնախարար Արարատ Միրզոյանը։
Այս խորհուրդը ձևավորվել է «Տավուշը հանուն հայրենիքի» շարժման շրջանակներում։ Նախօրեին խորհրդի անդամ հանդիսացող նախկին դիվանագետները ներկայացրել են իրենց մշակած փաստաթուղը, ըստ որի՝ Ալմա-Աթայի հռչակագիրը որպես ՀՀ և Ադրբեջանի միջև սահմանազատման հիմք ընդունելը «հակաիրավական է և քրեորեն պատժելի»։
Հայեցակարգ մշակելը շարժման առաջնորդ Բագրատ արքեպիսկոպոս Գալստանյանի հանձնարարությունն էր։ Բողոքի ակցիաները, սակայն, նույնպես շարունակվում են։
Սահմանազատման դեմ «Տավուշը հանուն հայրենիքի» շարժումը, որն օրեր առաջ պահանջել էր Հայաստանի վարչապետ Նիկոլ Փաշինյանի հրաժարականը, վաղ առավոտից անհնազանդության ակցիաներ է իրականացնում Երևանում։ Մայրաքաղաքի փողոցներից արդեն իսկ բերման է ենթարկվել 151 քաղաքացի։ Նյութի հրապարակման պահին հաղորդվեց, որ բոլորն ազատ են արձակվել։
«Տավուշը հանուն հայրենիքի» շարժումը քայլերթ էր մեկնարկել մայիսի 4-ին Տավուշի մարզի Կիրանց գյուղից։ Մասնակիցները Երևան հասան մայիսի 9-ին։ Ի սկզբանե ասվում էր, որ շարժման և քայլերթի նպատակը հայ-ադրբեջանական սահմանին իրականացվող «ապօրինի սահմանազատումը» դադարեցնելն է։ Մայիսի 9-ին, սակայն, շարժման առաջնորդ Բագրատ Սրբազանը հայտարարեց, որ իրենց պահանջը վարչապետի հրաժարականն է՝ Փաշինյանին տալով 1 ժամ ժամանակ։ Որևէ արձագանք, սակայն, չհաջորդեց։
Շարժման անդամներն անհնազանդության ակցիաներ, երթեր, հանրահավաքներ են անցկացնում։ Բացի այդ, խորհրդակցություններ են վարում ԱԺ խմբակցությունների հետ՝ նախաձեռնելու համար վարչապետին անվստահություն հայտնելու գործընթաց։ Նոր վարչապետի իր թեկնածուին շարժումը դեռ չի բացահայտել։
Վարչապետին անվստահություն հայտնելու որոշման նախագիծ ներկայացնելու համար շարժմանն անհրաժեշտ է առնվազն 36 պատգամավորի ստորագրություն։ Ընդդիմադիր «Հայաստան» (29 պատգամավոր) և «Պատիվ ունեմ» (6 պատգամավոր) խմբակցությունները միասին ունեն 35 ձայն։ Բացի այդ, խորհրդարանում որոշման ընդունման համար անհրաժեշտ կլինի առնվազն 54 պատգամավորի ձայն։
«Տոտալ պարալիզացնել քաղաքը»
Երեկ հանրահավաքի մասնակիցներին նման կոչով էր դիմել շարժման առաջնորդ Բագրատ արքեպիսկոպոս Գալստանյանը։ Նշել էր նաև, որ լինելու են դասադուլներ, գործադուլներ։
Այսօր վաղ առավոտից ցուցարարները պարբերաբար փակում են մի շարք փողոցներ։ Ոստիկանությունը, սակայն, բացում է դրանք և բերման ենթարկում նրանց։ Գերատեսչությունից նշում են, որ նրանք խախտել են Վարչական իրավախախտման վերաբերյալ օրենսգրքի 182-րդ հոդվածը, այսինքն՝ չեն կատարել ոստիկանության ծառայողի օրինական պահանջը։
Շարժման առաջնորդը հանդիպել է Գրողների միության և Նկարիչների միության ղեկավար կազմի ու անդամների հետ: Մտադիր է այցելել նաև մյուս ստեղծագործական միություններ։
Գալստանյանը վստահ է՝ վարչապետի հրաժարականի իրենց պահանջն «անհաղթահարելի չէ»։
«Մենք նշաձողն ենք սահմանել, էս ժողովրդի ցանկությունն է դա, պահանջն է դա: Թաքցնել, խաղալ, ոլորվել, մոլորվել չկա։ Հայաստան աշխարհում պիտի հստակ լինի՝ այս կառավարության ղեկավարն այլևս անընդունելի է: Եվ մենք ամեն ինչ պիտի անենք, որ դա արձանագրվի»,- ավելի վաղ հայտարարել էր նա։
Ինչ վերաբերում է սահմանազատման և սահմանագծման գործընթացին, ըստ Բագրատ Սրբազանի, այն պետք է տեղի ունենա խաղաղության պայմանագրի կնքումով և երաշխավորների ներգրավմամբ, այսինքն՝ «համապարփակ, մեկ ամբողջական փաթեթով»։
Ի՞նչ են առաջարկում նախկին դիվանագետները
«Տավուշը հանուն հայրենիքի» շարժման շրջանակներում ձևավորվել է Դիվանագետների համահայկական խորհուրդ, որի կազմում են մոտ երեք տասնյակ նախկին դիվանագետներ։ Նրանց թվում է նաև նախկին արտգործնախարար Վարդան Օսկանյանը։ Շարժման առաջնորդ Բագրատ արքեպիսկոպոս Գալստանյանի հանձնարարությամբ խորհուրդը մշակել և ներկայացրել է փաստաթուղթ՝ կապված ՀՀ սահմաններին զարգացումների և խաղաղության օրակարգի հետ, մարտահրավերների և ձեռնարկելիք քայլերի մասին:
Մայիսի 12-ին՝ շարժման երրորդ հանրահավաքի ընթացքում փաստաթուղթը ներկայացրեց խորհրդի անդամ, ԱԳՆ նախկին գլխավոր քարտուղար Վահագն Մելիքյանը։ Շեշտեց՝ փաստաթղթով առաջարկվում է դադարեցնել սահմանազատումն ու սահմանագծումը, քանի որ դրա հիմքում դրված Ալմա-Աթայի հռչակագիրը «չի պարունակում սահմանային նկարագիր»․
«Սահմանազատման գործընթացի համար իրավական հիմք է ծառայում բանակցող կողմերի համատեղ ընդունված մեթոդաբանությունը՝ հիմնվելով վավերական և իրավական ուժ ունեցող ԽՍՀՄ ներպետական ակտերի վրա։ Ալմա-Աթայի հռչակագիրը որևէ կերպ չի կարող նման հիմք հանդիսանալ, քանի որ չի պարունակում սահմանային որևէ նկարագիր։ Հռչակագիրը ենթադրում է միմյանց նկատմամբ տարածքային հավակնություններ չներկայացնելու պահանջ»։
Ընդգծեց՝ սահմանազատման և սահմանագծման համար, առաջին հերթին, անհրաժեշտ է Հայաստանի ու Ադրբեջանի միջև միջպետական համաձայնություն, որը վավերացված կլինի երկու երկրների խորհրդարանների կողմից։
«Եթե այդ գործընթացի ընթացքում ստեղծվի այնպիսի իրավիճակ, որ ՀՀ որևէ տարածք կարող է անցնել Ադրբեջանին, ապա հարցը պետք է դրվի հանրաքվեի։ Ուստի, եզրակացությունը մեկն է՝ այդ [ընթացող] գործընթացն անօրինական է և հակասահմանադրական»,— նկատեց Մելիքյանը։
«Լքել են իրենց բաժին հասած խրամատը»
Արտգործնախարար Արարատ Միրզոյանն այսօր լրագրողների հետ զրույցում «դասալիքներ» որակեց դիվանագետների խորհրդի անդամներին․
«Ձեր նշած փորձառու դիվանագետները, հավանաբար, այն դասալիքներն էին, որ լքեցին իրենց պաշտոնները, իրենց բաժին հասած խրամատը, այն նույն օրերին, երբ Հայաստանի սուվերեն տարածքի վրա տեղի էր ունենում կամ ունեցել ռազմական ագրեսիա»։
Ասաց՝ այդ մարդկանց ու նրանց դիրքորոշումների նկատմամբ «որևէ կաթիլ լրջություն» դրանից հետո չի կարող ունենալ։ Նախարարի խոսքով՝ նրանք փորձում են «ականահարել» Հայաստանի տարածքային ամբողջականությունը։ Չի բացառում, որ դա գուցե արվում է այլ երկրի թելադրանքով։ Թե որ երկրի՝ Միրզոյանը չմանրամասնեց։
Ավելի վաղ «Ազատության» հետ զրույցում խորհրդի հնարավոր առաջարկներին անդրադարձել էր նաև իշխող «Քաղաքացիական պայմանագիր» խմբակցության պատգամավոր Վահագն Ալեքսանյանը։
«Չեմ կարծում, թե Վարդան Օսկանյանը որևէ նոր բան ունի տալու Հայաստանի դիվանագիտությանը», — ընդգծել էր պատգամավորը։
Հետևեք մեզ — Facebook | Youtube | Telegram
Ընդդիմադիր դիվանագետների առաջարկը
