YerevanToday-ի խմբագրությունում խուզարկություններ են ընթանում՝ Հայաստանի ուժային կառույցների ղեկավարների զրույցի գաղտնալսման կապակցությամբ
Քննչական կոմիտեի և Կազմակերպված հանցավորության դեմ պայքարի գլխավոր վարչության աշխատակիցները խուզարկություն են իրականացնում YerevanToday առցանց լրատվական միջոցի խմբագրությունում: Գերատեսչությունների լրատվական բաժիններից հայտնում են, որ խուզարկությունները կապված են Ազգային անվտանգության ծառայության (ԱԱԾ) և Հատուկ քննչական ծառայության (ՀՔԾ) ղեկավարների մասնավոր խոսակցության գաղտնալսման փաստով հարուցված քրեական գործի հետ:
Այս ուժային կառույցների ղեկավարների գաղտնալսման ձայնագրությունը ցանցում է հայտնվել սեպտեմբերի 12-ին: Դրանում կառույցների ղեկավարները քննարկում են այն քրեական գործը, որով անցնում է նախկին նախագահ Ռոբերտ Քոչարյանը: Ձայնագրության հրապարակումից անմիջապես հետո հանդես եկավ Հայաստանի վարչապետ Նիկոլ Փաշինյանը: Նա այդ գերատեսչությունների ղեկավարների հեռախոսների «գաղտնալսումը» գնահատեց որպես հայրենիքի դավաճանություն և պահանջեց անմիջապես պարզել՝ ովքեր են կազմակերպիչները:
YerevanToday պարբերականն արդեն հանդես է եկել հայտարարությամբ.
«Խուզարկություններն իրականացվում են այն հիմքով, որ, իբր, կայքը հրապարակել է ԱԱԾ-ի և ՀՔԾ-ի ղեկավարների հեռախոսային խոսակցության գաղտնալսման ձայնագրությունը երկու օր ավելի շուտ, քան դա հրապարակեցին մնացած լրատվամիջոցները: Նման պնդման համար առիթ են հանդիսացել Google-ի որոնման արդյունքները: Սակայն YerevanToday-ը հրապարակել է խոսակցության ձայնագրությունը այն նույն ժամերին, ինչ մյուս հայկական մեդիառեսուրսները: Ակնհայտ է, որ սա որոնման համակարգի խնդիրներն են: Ցանցային փորձագետներն արդեն նշել են, որ Google համակարգում առաջացել են խափանումներ»:
Հայաստանի Քննչական կոմիտեն տեղեկացնում է, որ տվյալ քրեական գործի շրջանակում խուզարկություններ իրականացվում են մի քանի հասցեներով:
Սոցիալական ցանցերի օգտատերերը գրում էին, որ YerevanToday պարբերականը հրապարակել է ԱԱԾ-ի և ՀՔԾ-ի ղեկավարների խոսակցության ձայնագրությունն ավելի շուտ, քան այն հրապարակվեց ցանցում անկախ օգտատիրոջ կողմից, ում հիմա որոնում են հատուկ ծառայությունները: Միաժամանակ, օգտատերերը հրապարակել են նաև Google-ի քեշային էջերը, որտեղ երևում է պարբերականի կողմից ձայնագրության հրապարակման ամսաթիվը:
YerevanToday-ի խմբագրությունը պնդում է, որ դա ապատեղեկատվություն է:
Ընդ որում, հայկական լրատվամիջոցները հայտնում են, որ YerevanToday պարբերականը պատկանում է Հայաստանի նախկին նախագահ Ռոբերտ Քոչարյանին: Եվ ի հաստատումն՝ առաջ են քաշում այն փաստը, որ իր վերջին հարցազրույցը նա տվել է հենց այս ռեսուրսին: Ինքը՝ Քոչարյանը, հերքում է այդ տեղեկատվությունը:
