Եվս 4 երկրի քաղաքացիներ կկարողանան առանց վիզա այցելել Հայաստան

Սինգապուրի, Հարավային Կորեայի, Ավստրալիայի ու Նոր Զելանդիայի քաղաքացիները կկարողանան առանց վիզա ստանալու այցելել Հայաստան: Հայաստանի կառավարությունն այսօր ընդունած որոշմամբ նման հնարավորություն է տվել նրանց:

Այսպիսով Հայաստանի իշխանությունները զբոսաշրջիկներ ներգրավվելու փորձ են անում՝ հաշվի առնելով միջազգային վիճակագրության տվյալները, ըստ որի այդ երկրների քաղաքացիներն բոլորից շատ են ճանապարհորդում:

Առանց վիզայի ռեժիմը այս երկրների պարագայում էլ գործելու է սովորական ժամկետով՝ տալով տարվա մեջ 180 օր Հայաստանում գտնվելու իրավունք: Առանց վիզայի ռեժիմը, սական, միակողմանի է լինելու: Հայաստանցիներն առանց վիզայի այդ երկրներ այցելել չեն կարողանա։

Արտաքին գործերի փոխնախարար Շավարշ Քոչարյանը կառավարության նիստի ընթացում ասել է, որ այս երկրները զբոսաշրջության ու բիզնեսի տեսանկյունից շատ հեռանկարային են, այնտեղ բարձր են ՀՆԱ ցուցանիշները:

Վարչապետ Կարեն Կարապետյանը հավանության է արժանացրել գաղափարը. «Հենց այդպիսի երկրների հետ աշխատեք, որոնք ունեն բարձր ՀՆԱ։ Օգուտն ակնհայտ կլինի»: