Աբխազիայում հրապարակել են վարկառու պարտապանների ցուցակը՝ հույս ունենալով ստիպել նրանց վճարել

Աբխազիայում մամուլին է փոխանցվել և հրապարակվել է վարկառու-պարտապանների ցուցակը: Դա տեղի է ունեցել նախագահ Ռաուլ Հաջիմբայի հրահանգով: Ցուցակը ներառում է պարտապանների անունները, վարկերի տրման ամսաթիվն ու պարտքի գումարը 2018թ-ի փետրվարի 5-ի դրությամբ:

Ընդհանուր առմամբ ցուցակում 360 ֆիզիկական և իրավաբանական անձ կա: Հայտնի անձանցից այդ ցուցակում ներառված է նախկին պատգամավոր Նոդիկ Կվիցինիան, որն իր պատիժն է կրում ռուս գործարարի սպանության կազմակերպման համար:

Ցուցակում ներառված պարտապանների դեմ դատախազությունն արդեն հայցով դիմել է դատարան ժամկետանց վարկերը վերադարձնելու պահանջով: Նրանց պարտքի ընդհանուր գումարը կազմում է ավելի քան 467մլն ռուբլի (8,15 մլն դոլար) և ավելի քան 3 մլն ԱՄՆ դոլար: Ինչպես ասվում է այդ առթիվ դատախազության արած հայտարարությունում, խոսքը գնում է Խնայողական բանկի տրամադրած վարկերի, ինչպես նաև սեփականաշնորհման հատուկ արտաբյուջետային հիմնադրամի միջոցների մասին:

2017թ-ի նոյեմբերի 13-ին Աբխազիայի Խնայբանկում ժամանակավոր վարչակազմ է ձևավորվել: Բանկի ղեկավար Թիմուր Բգանբայի իրավասությունները մեկ ամսով սահմանափակվել են, իսկ մեկ ամիս անց՝ ամբողջությամբ վերականգնվել: Խնայբանկում ժամանակավոր վարչարարություն է ներմուծվել 6 ամսով, սակայն բանկը պլանավորվում է համակարգել մինչև լիակատար ֆինանսական առողջացում:

Հրապարակման մեջ տեղ գտած եզրերը, տեղանունները և գաղափարները կարող են չհամընկնել JAMnews-ի կամ նրա առանձին աշխատակիցների կարծիքների և գաղափարների հետ: JAMnews-ն իրեն իրավունք է վերապահում հեռացնել հրապարակման այն մեկնաբանությունները, որոնք կգնահատվեն որպես վիրավորական, կպարունակեն բռնության կամ սպառնալիքի կոչեր, կամ այլ պատճառներով էթիկապես անընդունելի կլինեն: