როგორია კორონავირუსის ფაქტები და რიცხვები კავკასიის რეგიონში. 15-16 მარტი 2020
16 მარტის შემდგომი ახალი ამბების სანახავად, დააჭირეთ აქ
16 მარტი 2020
სომხეთში, კორონავირუსის ეპიდემიის გამო, 16 მარტს საგანგებო მდგომარეობა გამოცხადდა, რომელიც 2020 წლის 14 აპრილამდე იმოქმედებს.
16 მარტის მონაცემებით, სომხეთში კორონავირუსით ინფიცირების 30 შემთხვევაა დაფიქსირებული. გამოჯანმრთელდა ერთი ადამიანი.
______________________________________
კორონავირუსით ინფიცირებული პაციენტი, რომელიც სრულად გამოჯანმრთელდა, თბილისის ინფექციური საავადმყოფოდან დღეს გაწერეს.
მას ტესტი ორჯერ ჩაუტარდა. ლაბორატორიულმა კვლევამ ორივე შემთხვევაში დაადასტურა, რომ მის ორგანიზმში ვირუსი აღარ არის.
კორონავირუსის პირველი შემთხვევა საქართველოში 26 თებერვალს დადასტურდა. ვირუსი 50 წლის მამაკაცს დაუდგინდა, რომელიც საქართველოში ირანიდან შემოვიდა.
16 მარტის მონაცემებით, საქართველოში დადასტურებულია კორონავირუსის 33 შემთხვევა. კარანტინის რეჟიმში იმყოფება 637 ადამიანი, ხოლო სტაციონარში მეთვალყურეობის ქვეშ – 54.
______________________________________
ჩეხ ტურისტებს, რომლებიც 4-9 მარტს გუდაურში ისვენებდნენ, სამშობლოში დაბრუნების შემდეგ კორონავირუსი დაუდგინდათ.
ინფორმაციას ამის შესახებ დაავადებათა კონტროლის ცენტრის წარმომადგენელი, ანა კასრაძე ავრცელებს.
როგორც კასრაძე სოციალურ ქსელში წერს, ტურისტებმა ეს ინფორმაცია დაავადებათა კონტროლის ცენტრს თვითონ მიაწოდეს.
16 მარტის მონაცემებით, საქართველოში დადასტურებულია კორონავირუსის 33 შემთხვევა. კარანტინის რეჟიმში იმყოფება 637 ადამიანი, ხოლო სტაციონარში მეთვალყურეობის ქვეშ – 54.
• რესტორანი “მთვრალი ალუბალი”, სადაც ჩეხი ტურისტები დადიოდნენ, დაიკეტა
______________________________________
დღეიდან საქართველოსა და რუსეთის ფედერაციას შორის მოქალაქეთა გადაადგილება დროებით ჩერდება.
ამის შესახებ „ინტერპრესნიუსს“ საქართველოს მთავრობის ადმინისტრაციიდან აცნობეს.
შეზღუდვები ვრცელდება მხოლოდ ადამიანების გადაადგილებაზე. შეზღუდვები არ ვრცელდება მხოლოდ რუსეთის ფედერაციის და საქართველოს იმ მოქალაქეებზე, რომლებიც სამშობლოში ბრუნდებიან.
შეზღუდვები არ ვრცელდება სატვირთო გადაზიდვებზე.
ეს საკითხი 16 მარტს დილით უკვე განიხილეს ტელეფონით პრემიერის სპეციალურმა წარმომადგენელმა რუსეთის ფედერაციასთან ურთიერთობის საკითხებში ზურაბ აბაშიძემ და რუსეთის ფედერაციის დელეგაციის ხელმძღვანელმა ქართულ-რუსული დიალოგის ფორმატში გრიგორი კარასინმა.
______________________________________
სომხეთში, კორონავირუსის ორი ახალი შემთხვევა გამოვლინდა. ამრიგად, საერთო ჯამში, ქვეყანაში, 30 ინფიცირებულია. ერთი პაციენტი გამოჯანმრთელდა და საავადმყოფოდან გაწერეს.
კიდევ, დაახლოებით, 300 ადამიანი თვითიზოლაციაში ან კარანტინში იმყოფება.
15:00 საათზე, დანიშნულია მთავრობის რიგგარეშე სხდომა, სადაც სომხეთში საგანგებო მდგომარეობის დაწესების საკითხს განიხილავენ.
„სხდომა პირდაპირ ეთერში გადაიცემა“, – დაწერა Facebook-ის საკუთარ გვერდზე, პრემიერ-მინისტრმა, ნიკოლ ფაშინიანმა.
_____________________________________
აზერბაიჯანში, კორონავირუსი კიდევ ოთხ ადამიანს დაუდასტურდა და ახლა ინფიცირებულთა საერთო რაოდენობა 23-ს შეადგენს. ერთი ადამიანი გარდაიცვალა, ექვსი გამოჯანმრთელდა და გაეწერა საავადმყოფოდან.
სავარაუდოდ, დაინფიცირების შემთხვევები დაკავშირებულია ირანსა და იტალიასთან, მაგრამ კონკრეტული ინფორმაცია არ ვრცელდება.
15 მარტი, 2020
საქართველოში კორონავირუსით ინფიცირების 3 ახალი შემთხვევა დადასტურდა.
ინფექციური საავადმყოფოს გენერალური დირექტორის თენგიზ ცერცვაძის თქმით, მათ მაღალი რისკის ქვეყნებიდან ჩამოსულ უცხოელებთან ჰქონდათ კონტაქტი:
“ჯერჯერობით არ დაფიქსირებულა მეოთხეული შიდა გადაცემა, როდესაც დაინფიცირდება პაციენტი ისე, რომ მან არ იცის თუ ვისგან დაინფიცირდა. მაგალითად, შეიძლება პიროვნება გავიდეს მაღაზიაში, ან რაღაც საქმეზე ქუჩაში და შემდეგ აღმოჩნდეს ინფიცირებული.
ეს მდგომარეობა უფრო სერიოზულია და გარკვეულ სპეციალურ ტაქტიკას მოითხოვს ღონისძიებების. ჯერჯერობით, საბედნიეროდ, ეს არ არის. ამ სამივე ადამიანმა იცის თუ ვისთან ჰქონდა კონტაქტი,” – აცხადებს ცერცვაძე.
15 მარტის მონაცემებით, საქართველოში დადასტურებულია კორონავირუსის 33 შემთხვევა. კარანტინის რეჟიმში იმყოფება 427 ადამიანი, ხოლო სტაციონარში მეთვალყურეობის ქვეშ – 73.
კორონავირუსით ინფიცირებულებიდან 4 არასრულწლოვანია. მათი ჯანმრთელობის მდგომარეობა ამ დროისთვის სტაბილურია.
______________________________________
15 მარტს, კორონავირუსის რვა ახალი შემთხვევა გამოვლინდა. შვიდი მათგანი ქალაქ ეჩმიაძინში, ადგილობრივ მცხოვრებთან კონტაქტით დაინფიცირდა, რომელიც იტალიიდან დაბრუნდა. ერთი ინფიცირებული კი ქალაქ მეღრიდან არის, ისიც, ასევე, ცოტა ხნის წინ ჩამოვიდა იტალიიდან.
საერთო ჯამში, ქვეყანაში კორონავირუსით ინფიცირების 28 შემთხვევა დაფიქსირდა. ერთი პაციენტი, რომელიც ირანიდან ჩამოვიდა, უკვე გამოჯანმრთელდა და გაეწერა საავადმყოფოდან. ათზე მეტი შემთხვევაა ქალაქ ეჩმიაძინში და ყველა დაკავშირებულია იტალიასთან.
• კორონავირუსი: გამოცხადდა პანდემია. რას ნიშნავს ესდა რას უნდა ველოდოთ
• 2–წუთიანი ვიდეო იმის შესახებ, თუ როგორ უნდა დავიცვათ თავი კორონავირუსისგან
• კორონავირუსი: არავითარი ხელის ჩამორთმევა, მისალმება იდაყვებითა და ფეხსაცმლებით. ვიდეო
• ყველაფერი კორონავირუსის შესახებ
უსაფრთხოების ზომები, რომელიც კორონავირუსის პანდემიის გამო, კავკასიის სხვადასხვა ნაწილში მიიღეს
საქართველო
საქართველოში დახურულია ყველა სასწავლო დაწესებულება. საგანგებო რეჟიმია დაწესებული საზღვარზე. შესვლა მხოლოდ საქართველოს მოქალაქეებს შეუძლიათ. მათ საზღვარზე ტემპერატურას უმოწმებენ და ისინი ვალდებული არიან, 14 დღე თვითიზოლაციაში გაატარონ. ამ მოთხოვნის შესრულებას პოლიცია აკონტროლებს, დამრღვევები იძულებით გადაჰყავთ საკარანტინო დაწესებულებაში.
ქვეყანაში სხვას არავის უშვებენ. შეზღუდვები არ ვრცელდება ტვირთგადაზიდვაზე, მათ შორის, ჩამოაქვთ საფოსტო ამანათები.
სოციალურ ქსელებში, ბევრი ითხოვს საგანგებო მდგომარეობის დაწესებას და, ასევე, ყველა სავაჭრო ცენტრისა და გასართობი დაწესებულების დახურვას.
აზერბაიჯანი
აზერბაიჯანში, დაკეტილია ყველა სასწავლო დაწესებულება, საბავშვო ბაღი და სავაჭრო ცენტრი. რესტორნებისა და გასართობი დაწესებულებისთვის დაწესებულია შეზღუდვა – მათ მუშაობა ყველაზე გვიან, 21:00 საათზე უნდა დაასრულონ.
ჩაკეტილია ყველა სახმელეთო საზღვარი, ერთის გარდა – რუსეთთან. გაუქმდა ბევრი ავიარეისი.
შეზღუდვა არ ეხება ტვირთების გადაზიდვას.
აზერბაიჯანის მოქალაქეებს სახლში დაბრუნება ნებისმიერი საზღვრის გავლით შეუძლიათ. საკონტროლო-გამშვებ პუნქტებზე ყველა ჩამოსულს ტემპერატურას უზომავენ.
სომხეთი
სომხეთში, კორონავირუსის ეპიდემიის გამო, 16 მარტს საგანგებო მდგომარეობა გამოცხადდა, რომელიც 2020 წლის 14 აპრილამდე იმოქმედებს.
ვირუსის ძირითადი კერა ქალაქი ეჩმიაძინი გახდა (ერევნიდან დაახლოებით 20 კილომეტრში). ქალაქი პრაქტიკულად სრულად იზოლირებულია, მკაცრად კონტროლდებიან შემსვლელები და გამსვლელები.
სომხეთმა ყველა სახმელეთო საზღვარი ჩაკეტა. ბოლოს, 15 მარტს, საქართველოსთან ჩაკეტა. შეზღუდვები არ ვრცელდება ტვირთის გადაზიდვაზე.
საჰაერო მიმოსვლა ჯერ კიდევ ღიაა, თუმცა, ბევრმა ავიაკომპანიამ სომხეთის მიმართულებით ფრენა შეამცირა ან საერთოდ გააუქმა. საკონტროლო-გამშვებ პუნქტებზე ტემპერატურას უმოწმებენ ყველა ჩამოსულს.
სომხეთის მოქალაქეებს სახლში დაბრუნება ნებისმიერი საზღვრის გავლით შეუძლიათ, მათ შორის, სახმელეთო.
