"არჩევნები – ძვირი სიამოვნებაა", - ამბობენ ხელისუფლებაში" />

სომხეთი რიგგარეშე არჩევნების ჩასატარებლად დაახლოებით 6 მილიონ დოლარს დახარჯავს

"არჩევნები – ძვირი სიამოვნებაა", - ამბობენ ხელისუფლებაში

სომხეთში რიგგარეშე საპარლამენტო არჩევნების მოსამზადებლად და ჩასატარებლად ცენტრალურ საარჩევნო კომისიას მთავრობის სარეზერვო ფონდიდან 2,7 დრამს (დაახლოებით 6$ მილიონი) გამოუყოფენ.

კიდევ 10 მილიონი დრამი (20 ათასი დოლარი) საარჩევნო კოდექსის 10 ათასი ეგზემპლარის პუბლიკაციისთვის იუსტიციის სამინისტროს გამოეყოფა.

პოლიცია დამატებით მიიღებს 224 მილიონ დრამს (დაახლოებით 460 ათას დოლარს). ამ თანხის უმეტესი ნაწილი ამომრჩეველთა სიების დაზუსტებისთვის არის გამიზნული.

სომხეთის პირველი ვიცე-პრემიერის მოვალეობის შემსრულებელმა არარატ მირზოიანმა აღნიშნა, რომ არჩევნები – „ძვირი სიამოვნებაა“, განსაკუთრებით – რიგგარეშე.

არჩევნების ჩასატარებლად ქვეყანა დახმარებას საერთაშორისო ორგანიზაციებისგანაც მიიღებს.

 „სომხეთი, არჩევნების ორგანიზებისა და ჩატარებისთვის გათვალისწინებული თანხის გარდა, გაეროს ეგიდით არსებული საერთაშორისო და დონორი ორგანიზაციებიდანაც მიიღებს დახმარებას, მათ შორის – ვიდეოდაკვირვების აღჭურვილობისა და სასწავლო მასალების გამოსაქვეყნებლად“, – განაცხადა მირზოიანმა.

• არჩევნები სომხეთშიკრიზისიდან შესაძლო გამოსავალი 

• ერევანმა არჩევნებში მხარი რევოლუციურ მთავრობას დაუჭირა

• ნიკოლ ფაშინიანის შესახებ: როგორ გახდა ოპზიციონერი დეპუტატი სომხეთის პრემიერი

რატომ გაჩნდა რიგგარეშე არჩევნების აუცილებლობა

გაზაფხულიდან სომხეთი სრულად გადავიდა სახელმწიფოს მართვის საპარლამენტო სისტემაზე. თუმცა, ამის შემდეგ მალევე ქვეყანაში „ხავერდოვანი რევოლუცია“ მოხდა. ხელისუფლებაში მოვიდა პოლიტიკური ძალა, რომელსაც პარლამენტში უმრავლესობა არ ჰყავს. მისი ლიდერი ნიკოლ ფაშინიანი პრემიერ-მინისტრი გახდა, მაგრამ პარლამენტი მისი გადაწყვეტილებებს ხშირად ბლოკავდა.

ექსპერტები ქვეყანაში არსებულ სიტუაციას მთლიანობაში შემდეგნაირად აფასებენ – „პარლამენტი ხალხის ნებას არ გამოხატავს“. საქმე ისაა, რომ 2017 წლის საპარლამენტო არჩევნებში „სომხეთის რესპუბლიკურმა პარტიამ“ გაიმარჯვა. მაგრამ 2018 წლის გაზაფხულზე, „ხავერდოვანი რევოლუციის“ დროს მისი ხელისუფლების წინააღმდეგ ათობით ათასი ადამიანი გამოვიდა, რომლებიც ოპოზიციასთან ერთად ქუჩაში გავიდნენ და მის შეცვლას მიაღწიეს.

რიგგარეშე საპარლამენტო არჩევნები – „რევოლუციური ხელისუფლებისთვის“ არის შანსი, რომ ეროვნულ საკრებულოში ხმათა უმრავლესობა მიიღოს.

რა ძალები მიიღებენ არჩევნებში მონაწილეობას

რიგგარეშე საპარლამენტო არჩევნების ფავორიტად ნიკოლ ფაშინიანის ბლოკი „ჩემი ნაბიჯი“ მიიჩნევა. ამ პოლიტიკურმა ძალამ არჩევნებში მონაწილეობის გადაწყვეტილების შესახებ უკვე ოფიციალურად განაცხადა.

არჩევნებში მონაწილეობას მიიღებენ, ასევე პარტიები: „აყვავებული სომხეთი“, „განათლებული სომხეთი“, „რესპუბლიკა“, „სომხეთის დემოკრატიული პარტია“.

ჯერჯერობით გაურკვეველია, მიიღებს თუ არა მაინც არჩევნებში მონაწილეობას ყოფილი მმართველი „სომხეთის რესპუბლიკური პარტია“, რომლის ლიდერადაც ექს-პრეზიდენტი სერჟ სარგსიანი რჩება.


ასევე წაიკითხეთ