სომხეთში „1 მარტის“ გახმაურებულ საქმეზე სისხლის სამართლის ახალი საქმე აღიძრა

სომხეთის საგანგებო საგამოძიებო სამსახურმა პოლიციის მაღალი თანამდებობის თანამშრომელთა მიმართ სისხლის სამართლის საქმე აღძრა. ეს საქმე 2008 წლის 1 მარტის მოვლენების გამოძიებას ეხება.

გამოძიება ვარაუდობს, რომ მაღალი თანამდებობის პირებმა დოკუმენტები გააყალბეს. ამ დოკუმენტების თანახმად, 2008 წლის 29 თებერვალს სამართალდამცავმა ორგანოებმა მიიღეს შეტყობინება, რომ თავისუფლების მოედანზე შეკრებილ დემონსტრანტებს იარაღი და ასაფეთქებელი ნივთიერებები ჰქონდათ.

 „მაღალი თანამდებობის პირებმა, ჯგუფური ინტერესებიდან გამომდინარე, ყალბი ცნობები წარმოადგინეს, რათა პოლიციის ქმედებები გაემართლებინათ, უკანონო ქმედებები დაეფარათ და პასუხისმგებლობა თავიდან აეცილებინათ. სისხლის სამართლის საქმე აღძრულია შემდეგი მუხლებით  – „თანამდებობრივი უფლებამოსილების ბოროტად გამოყენება“, „თანამდებობრივი უფლებამოსილების გადამეტება“ და „სამსახურებრივი გაყალბება“, რაც  1-2 მარტს ერევანში მომხდარი მოვლენების საქმეს დაერთო“, – იუწყება სომხეთის საგანგებო საგამოძიებო სამსახური.

 „1 მარტის“ საქმეზე ბრალდებულად მიჩნეულია ასევე სომხეთის მეორე პრეზიდენტი რობერტ კოჩარიანი.

•  რაში ედება ბრალი ყოფილ პრეზიდენტს, რატომ დააკავეს და გაათავისუფლეს ის

დღეს გაჩნდა ცნობა, რომ ის ქვეყნის დატოვებას და გერმანიაში გამგზავრებას აპირებს, რათა ყოველწლიური სამედიცინო შემოწმება გაიაროს. თუმცა, მისი პასპორტი სამართალდამცავ ორგანოებს აქვთ.

მოცემულ მომენტში კოჩარიანი სომხეთში იმყოფება. ის გერმანიაში აპირებს გამგზავრებას… თუმცა ჯერჯერობით წინასწარი საგამოძიებო ორგანოების მხრიდან იურიდიული აკრძალვა არსებობს. დაცვა ამჟამად ამ წინააღმდეგობების დაძლევით არის დაკავებული“, – იუწყება კოჩარიანის ადვოკატი არამ ორბელიანი.