რა პირობით დათანხმდება სომხეთი აზერბაიჯანის ევრაზიულ კავშირში გაწევრიანებას?

სომხეთი აზერბაიჯანის ევრაზიის ეკონომიკურ კავშირში გაწევრიანებას მიესალმება, თუკი ის  ევრაზიის ეკონომიკური კავშირის შეთანხმებაში არსებულ მუხლებს შეასრულებს, კერძოდ კი –  ვალდებულებას, რომ არ ჩაიდინოს კავშირის წევრი-ქვეყნების  დამაზიანებელი ქმედებები. ამის შესახებ ჟურნალისტებს სომხეთის საგარეო საქმეთა მინისტრის მოადგილემ, შავარშ კოჩარიანმა განუცხადა.

ევრაზიის ეკონომიკურ კავშირში აზერბაიჯანის შესაძლო გაწევრიანების შესახებ ამ დღეებში ბაქოში ყოფნისას რუსეთის საგარეო საქმეთა მინისტრი, სერგეი ლავროვიც ლაპარაკობდა.

 „ჩვენ მოხარულები ვიქნებით აზერბაიჯანის ამ სტრუქტურაში ხილვით“, – თქვა მან.

შავარშ კოჩარიანმა გაიხსენა, რომ აზერბაიჯანი სომხეთის ბლოკადას აგრძელებს, და ბუნებრივია, რომ აზერბაიჯანის ევრაზიის ეკონომიკურ კავშირში ინტეგრაციას, ან მისთვის დამკვირვებლის სტატუსის მინიჭებას იმ შემთხვევაში მიესალმებიან, თუკი ის ორგანიზაციის წევრი, ან დამკვირვებელი ქვეყნებისთვის განკუთვნილ ვალდებულებებს შეასრულებს.

„ეს კი იმას ნიშნავს, რომ აზერბაიჯანმა ბლოკადა უნდა მოხსნას, ანუ სომხეთის წინააღმდეგ მტრული ქმედებები არ უნდა განახორციელოს, რაც სომხოფობიის დასრულებას ნიშნავს“, – განმარტა კოჩარიანმა.

სომხეთის ეროვნული საკრებულოს ვიცე-სპიკერმა, სომხეთის რესპუბლიკური პარტიის პრეს-მდივანმა, ედუარდ შარმაზანოვმა თქვა, რომ სინამდვილეში სომხეთი წინააღმდეგი არ არის, რომ აზერბაიჯანთან ერთად იყოს ამ ორგანიზაციის წევრი – ისე, როგორც ეს სხვა საერთაშორისო ორგანიზაციების შემთხვევაში ხდება. თუმცა, შარმაზანოვის აზრით, საეჭვოა, რომ აზერბაიჯანმა სომხებისადმი სიძულვილი დაასრულოს.

„სომხეთი დემოკრატიული ქვეყანაა და თავის საგარეო პოლიტიკას არა რომელიმე ქვეყნის, მაგალითად, აზერბაიჯანის ან თურქეთის წინააღმდეგ წარმართავს, არამედ საკუთარი სახელმწიფო ინტერესების დასაცავად და თავისი მოქალაქეების საკეთილდღეოდ.

სომხეთისა და აზერბაიჯანის ერთი და იგივე საერთაშორისო ორგანიზაციის წევრობის მრავალი მაგალითი არსებობს. ლაპარაკია ევროპის საბჭოზე, დსთ-სა და სხვა ორგანიზაციებზე. აზერბაიჯანთან ერთად, ერთი და იგივე ორგანიზაციის წევრობა იმას არ ნიშნავს, რომ სომხეთმა თავისი სახელმწიფოებრივი ინტერესები არ უნდა დაიცვას. სომხეთი – რეგიონში მშვიდობისა და სტაბილურობის დაცვის მომხრეა, სომხეთი – რეგიონში კონფლიქტების წინააღმდეგია, სომხეთი – 21-ე საუკუნის ცივილიზაციის ფასეულობების დამცველია“, – განაცხადა ედუარდ შარმაზანოვმა.

მან ასევე აღნიშნა: “თუკი აზერბაიჯანი მზადაა, რომ ევრაზიის ეკონომიკური კავშირის შეთანხმების ყველა მუხლი შეასრულოს, მაშინ სომხეთს მიზეზი არ აქვს მისი კავშირში გაწევრიანების წინააღმდეგი იყოს”.