სასამართლომ სომხეთის ექს-პრეზიდენტის, რობერტ კოჩარიანის დაპატიმრების გადაწყვეტილება მიიღო

სომხეთის სასამართლომ სომხეთის მეორე პრეზიდენტის რობერტ კოჩარიანის დაპატიმრების გადაწყვეტილება მიიღო. მას 2008 წლის მასობრივი არეულობის საქმეში ბრალად ედება საკონსტიტუციო წყობის დამხობა.

სასამართლოს გადაწყვეტილება

სომხეთის მეორე პრეზიდენტის რობერტ კოჩარიანის დაპატიმრების გადაწყვეტილება სააპელაციო სასამართლომ მიიღო. უფრო სწორედ, ეს იმის შედეგი იყო, რომ  რობერტ კოჩარიანის გათავისუფლებასთან დაკავშირებით ადრე მიღებული გადაწყვეტილების თობაზე გენერალური პროკურორის საჩივარი დაკმაყოფილდა.

 „სააპელაციო სასამართლომ ძალაში დატოვა პირველი ინსტანციის სასამართლოს განაჩენი. ჩვენ ამ გადაწყვეტილებას გავასაჩივრებთ. სააპელაციო სასამართლოს გადაწყვეტილების თანახმად, კოჩარიანი უნდა დააპატიმრონ“, – განაცხადა რობერტ კოჩარიანის ერთ-ერთმა ადვოკატმა აიკ ალუმიანმა.

• სომხეთში მორიგი კორუფციული სკანდალია. პარლამენტის დეპუტატს პატიმრობა ემუქრება

• რუსეთი სომხეთს მეწამორის ელექტროსადგურის რემონტისთვის კრედიტს გადაუვადებს

რობერტ კოჩარიანის მიმართვა

ექს-პრეზიდენტი ეროვნული უშიშროების სამსახურში დასაპატიმრებლად თავად გამოცხადდა. ამის შემდეგ მისმა ადვოკატებმა მაშინვე პრეს-კონფერენცია მოიწვიეს.

 „რობერტ კოჩარიანმა გადაწყვიტა, არ დალოდებოდა, ვიდრე სასამართლო მოსამართლეს ვერდიქტს გაუგზავნიდა და ის განაჩენის აღსასრულებლად მასთან მივიდოდა. ის ეროვნული უშიშროების სამსახურში ნებაყოფლობით გამოცხადდა“, – განაცხადა აიკ ალუმიანმა.

პრეს-კონფერენციაზე ასევე წაიკითხეს სომხეთის მეორე პრეზიდენტის მიმართვა. კერძოდ, მასში რობერტ კოჩარიანი აცხადებს, რომ მის საქმეს პოლიტიკური კონტექსტი ახლავს, და გადაწყვეტილება ხელისუფლების მკაცრი ზეწოლის ქვეშ იქნა მიღებული.

სამომავლო ნაბიჯები

რობერტ კოჩარიანის ადვოკატებმა უკვე განაცხადეს, რომ აპირებენ, ადამიანის უფლებათა ევროპულ სასამართლოს მიმართონ; თანაც, ისინი ამას სომხეთის საკასაციო სასამართლოში საქმის გასაჩივრების პარალელურად გააკეთებენ.

რობერტ კოჩარიანის პირველი დაპატიმრება და გათავისუფლება

„1 მარტის“ საქმეზე რობერტ კოჩარიანი პირველად 2018 წლის 28 ივლისს დააპატიმრეს. მაშინ შესაბამისი გადაწყვეტილება ერევნის პირველი ინსტანციის სასამართლომ მიიღო. რობერტ კოჩარიანს საკონსტიტუციო წყობის დამხობის ბრალდება საგანგებო საგამოძიებო ჯგუფმა წარუდგინა.

თუმცა, ორი კვირის შემდეგ რობერტ კოჩარიანი პატიმრობიდან გაათავისუფლეს. სააპელაციო სასამართლომ მანამდე პირველი ინსტანციის სასამართლოს მიერ მისი დაკავების შესახებ მიღებული გადაწყვეტილება უკანონოდ მიიჩნია.

წინა ისტორია

2008 წლის საპრეზიდენტო არჩევნების შემდეგ იმ პოლიტიკური ბლოკის მომხრეები, რომელსაც სათავეში სომხეთის პირველი პრეზიდენტი ლევონ ტერ-პეტროსიანი ედგა, არჩევნების შედეგების გადახედვას მოითხოვდნენ. ისინი ამტკიცებდნენ, რომ სინამდვილეში ლევონ ტერ-პეტროსიანმა გაიმარჯვა. ზედიზედ ათი დღის განმავლობაში – პირველ მარტამდე – ათასობით ადამიანი ქუჩას არ ტოვებდა, და სადღეღამისო დემონსტრაციებში მონაწილეობდა.

2008 წლის პირველ მარტს დემონსტრაციის დარბევის დროს გამოყენებული იყო სამხედრო იარაღი, დაიღუპა ათი ადამიანი – რვა სამოქალაქო პირი და პოლიციის ორი თანამშრომელი. ამ მოვლენების დროს ქვეყნის პრეზიდენტი ჯერ კიდევ რობერტ კოჩრიანი იყო. მან საგანგებო მდგომარეობა შემოიღო. „1 მარტის“ საქმე ათი წლის განმავლობაში არ გახსნილა. ცენტრალური საარჩევნო კომისიის მონაცემების თანახმად, კენჭისყრის შედეგების მიხედვით, პრეზიდენტად სერჟ სარგსიანი აირჩიეს. თუმცა, იმ მომენტისთვის მას მოვალეობის აღსრულება ჯერ დაწყებული არ ჰქონდა.