აზერბაიჯანმა სომხური წარმოშობის რუსეთის მოქალაქის ექსტრადირება მოახდინა

აზერბაიჯანმა სომხური წარმოშობის რუსეთის მოქალაქის მარატ უელდანოვ-გალუსტიანის ექსტრადირება მოახდინა. მას ნარკოტიკებით ვაჭრობის ბრალდებით ბაქოში რვა-წლიანი პატიმრობა ჰქონდა მისჯილი.

ვინ არის მარატ გალუსტიანი და რატომ მოხვდა ის ციხეში

მარატ გალუსტიანმა ბაქოში, ავსტრიულ კომპანიაში დაახლოებით ოთხ წელიწადს იმუშავა. ამისთვის ის ცოლის – უელდანოვის გვარით სარგებლობდა.

• რაზე შეთანხმდნენ სომხეთისა და აზერბაიჯანის საგარეო საქმეთა მინისტრები

• რა შეცვალა აპრილის ომმა ყარაბაღში?

2016 წლის 9 ივნისს მარატ უელდანოვ-გალუსტიანი ბაქოში დააკავეს, 2017 წლის აპრილში კი, ნარკოვაჭრობის ბრალდებით, მას რვა წლით თავისუფლების აღკვეთა მიუსაჯეს.

მის ნათესავებს ეს ბრალდება შეთითხნილად მიაჩნიათ, დაპატიმრების ნამდვილ მიზეზს კი მის სომხურ წარმოშობაში ხედავენ. იგივე აზრისაა სომეხი ომბუდსმენი ლარისა ალავერდიანიც.

ექსტრადიცია

მსჯავრდებულის და, მარიანა გალუსტიანი ადვოკატებისა და უფლებადამცველების მეშვეობით დიდხანს ცდილობდა იმის მიღწევას, რომ გალუსტიანი რუსეთისთვის გადაეცათ. ხანგრძლივი მოლაპარაკებების შემდეგ, 4 მაისს ის გაათავისუფლეს.

„ვაშა! გამარჯვება! ჩვენ ეს გავაკეთეთ! მარატისთვის სამწლიანი განსაცდელი და წამება, ჩემთვის კი ბიუროკრატიასთან სამწლიანი ბრძოლა, და აი, ის რუსეთშია“, – დაწერა მარიანა მირზოიანმა თვის Facebook-ის გვერდზე.

რუსი ბლოგერის ალექსანდრ ლაპშინის ვერსიით, (რომელმაც აზერბაიჯანის ციხეში ახლახან რამდენიმე თვე გაატარა), აზერბაიჯანის ხელისუფლებამ გალუსტიანის ექსტრადირება უბრალოდ კი არ მოახდინა, არამედ ის აზერბაიჯანელ ოპოზიციონერსა და თალიშის მოძრაობის ლიდერ ფაჰრედინ აბოსზოდაში გაცვალა. ეს უკანასკნელი მოსკოვში აზერბაიჯანის მოთხოვნით დააკავეს და 2019 წლის მარტში ბაქოს გადასცეს.

• ალექსანდრ ლაპშინის დაპატიმრების დეტალები

• ფაჰრედინ აბოსზოდას ექსტრადიციის დეტალები

ლაპშინის თქმით, ამჟამად გალუსტიანი მახაჩკალაში, საგამოძიებო იზოლატორში იმყოფება, შემდეგ კი მას სასჯელის მოსახდელად კრასნოდარის მხარეში (რუსეთის სამხრეთ- აღმოსავლეთში) გადაიყვანენ.

აზერბაიჯანის ხელისუფლებას ექსტრადიციის თაობაზე ჯერჯერობით განცხადება არ გაუკეთებია.