მოსაზრება: ივანიშვილმა დიდი ხანია თქვა, რომ აკეთებს ძალადობის, ზიზღის და ჩაგვრის სახელმწიფოს

ზვიად ქორიძის მოსაზრება

“საერთაშორისო გამჭვირვალობა – საქართველოს” წარმომადგენელი ზვიად ქორიძე აქციების პერიოდში დაკავებული ახალგაზრდის, მათე დევიძის მიმართ გამოტანილ განაჩენს ეხმაურება და ამბობს, რომ ივანიშვილმა დიდი ხანია თქვა, რომ აკეთებს ძალადობის, ზიზღის, ჩაგვრის სახელმწიფოს და არც მალავს.

როგორც ქორიძემ აღნიშნა, ბიძინა ივანიშვილმა მთელი მართლმსაჯულების სისტემა “ჯიბეში ჩაისვა“ და იმ გადაწყვეტილებებს მიაღებინებს, რომელიც უნდა.

მოსაზრება: ივანიშვილის რეჟიმს კარიკატურული სახე აქვს. ის ყოველთვის იყო დასაცინი და რჩება კიდეც

ზაალ ანდრონიკაშვილი: პოლიციის ძალით რეჟიმი იცავს ღირსებას, რომელიც მას არ აქვს და არ შეიძლება ჰქონდეს

პოლიციელზე თავდასხმაში ბრალდებული 21 წლის მათე დევიძე სასამართლომ ნინო გალუსტაშვილმა დამნაშავედ ცნო და მას 4 წლითა და 6 თვის ვადით თავისუფლების აღკვეთა მიესაჯა.

დევიძეს ბრალდება სისხლის სამართლის კოდექსის 353-ე პრიმა მუხლის პირველი ნაწილით (პოლიციელზე თავდასხმა, პოლიციელის სამსახურებრივ საქმიანობასთან დაკავშირებით) წარედგინა, რაც სასჯელის სახედ და ზომად 4-დან 7 წლამდე თავისუფლების აღკვეთას ითვალისწინებს.

ზვიად ქორიძე: “მთელი ეს სისტემა, რომელსაც ჩვენ ამ კონკრეტულ საქმეებზე ვხედავთ ახლა, ეს პოლიციელები, რომლებიც დადიან და ურცხვად იტყუებიან, მათ შორის, მათეს ისტორიაშიც სამი პოლიციელი.

ერთი ჯოხის მოქნევით როგორ შეიძლება სამი პოლიციელი ისე დაზარალდეს, რომ მათ იმ მასშტაბის ტყუილები თქვან სასამართლო სხდომაზე, ის პროკურორები, რომლებიც სხედან სასამართლო სხდომაზე, ის მოსამართლეები, რომლებიც იხილავენ ამ საქმეებს – ისინი არ წარმოადგენენ მართლმსაჯულების სისტემას, ისინი არ არიან ადამიანები, რომლებიც პერსონალურად დამოუკიდებლები არიან ან იცავენ მათი დამოუკიდებელი საჯარო ინსტიტუციების ინტერესებს. 

ბიძინა ივანიშვილმა ეს შეძლო, რომ მთელი მართლმსაჯულების სისტემა ჩაესვა ჯიბეში და მიიღებს იმ გადაწყვეტილებებს, რომელიც მას უნდა. ეს არ უკავშირდება მხოლოდ ამ ორმოცდაათ ადამიანს, რომლებსაც ჩვენ სინდისის პატიმრებად მივიჩნევთ. ის ასე მოექცევა ყველას, მათ შორის, იმ ადამიანებსაც, რომლებსაც საერთოდ არანაირი დანაშაული არ ჩაუდენიათ.

მათე დევიძის სიტყვები – “სინათლის საძიებლად უსასრულო წყვდიადში” – რომელიც მან სასამართლო დარბაზის დატოვებამდე წარმოთქვა, არის ფრაზა, რომლითაც მათემ მიმართა მთელ საზოგადოებას და უთხრა, რომ ჩვენ ვართ უკუნში და უნდა ვეძებოთ სინათლე, უნდა გავიკვლიოთ გზა იმიტომ, რომ ეს უკუნი არის ძალიან დიდი ხნით.

თუ ჩვენ არ ავანთეთ სანთელი, თუ ჩვენ არ გავკვალეთ ეს გზა, ამ უკუნში დაიკარგება საქართველო. საქართველოს უკუნში ყოფნა არის დღეს ბიძინა ივანიშვილის მთავარი გზავნილი, ის ამით ელაპარაკება ამ საზოგადოებას, იმ ტყუილებით, რომელსაც “ქართული ოცნება” თითოეულ ჩვენგანს ეუბნება. ეს არის ზუსტად ის უკუნი, რომელსაც გაანათებს მათე, გაანათებს მზია, გაანათებს ანდრო – ის ადამიანები, რომლებიც დღეს იტანჯებიან, როგორც პირადი ტყვეები.”

კომენტარი: ფასადს ცვლიან სისასტიკესთან დაკავშირებული კადრების გვერდზე გაწევით

ვახტანგ ძაბირაძე: “იწყება გარკვეული კადრების გვერდზე გაწევა”