„არცახი აზერბაიჯანის ნაწილი არ იქნება“ - მთიანი ყარაბაღის პრეზიდენტი
მთიანი ყარაბაღის პრეზიდენტმა, არაიკ არუთუნიანმა საბრძოლო მოქმედებების დაწყების შემდეგ, პირველი დიდი პრესკონფერენცია გამართა. მისი შეხვედრა ჟურნალისტებთან 10 ოქტომბრის დილას იყო ჩანიშნული, თუმცა გადაიდო – ცეცხლის შეწყვეტის ჰუმანიტარული შეთანხმებისთვის მიდიოდა მომზადება.
ზავის შესახებ, სომხეთისა და აზერბაიჯანის საგარეო საქმეთა მინისტრები, რუსეთის შუამავლობით გამართულ შეხვედრაზე შეთანხმდნენ. და პრესკონფერენციის დასაწყისში, არაიკ არუთუნიანმა მადლობა გადაუხადა რუსეთის პრეზიდენტ ვლადიმირ პუტინის იმ ძალისხმევისთვის, რომელიც ცეცხლის შეწყვეტის რეჟიმის მიღწევისთვის გაწია.
აი, მისი გამოსვლის მთავარი თეზისები:
• ყარაბაღი თავდაცვის უფლებას იყენებს
• „არცახი აზერბაიჯანის ნაწილი არ იქნება“
• აზერბაიჯანი თურქეთისა და საერთაშორისო ტერორისტების მხარდაჭერით იმ ხალხის გენოციდს ახორციელებს, რომელმაც 1988 წელს, საკუთარ სამშობლოში თავისუფლად ცხოვრების უფლების შესახებ განაცხადა
• ყარაბაღი საერთაშორისო ტერორიზმის წინააღმდეგ ბრძოლაში, საერთაშორისო თანამეგობრობის მხარდაჭერას ელოდება, არა მხოლოდ მოვლენების გაშუქებით, არამედ არსებითად
• ყარაბაღელი ხალხის წინააღმდეგ ბრძოლაში, საერთაშორისო ტერორისტების მონაწილეობის ფაქტი დადასტურებულია სხვადასხვა ფორმატებში – რუსეთის, ამერიკისა და საფრანგეთის ხელისუფლებების მიერ
• ყარაბაღის მშვიდობიანი მოსახლეობის წინააღმდეგ, აზერბაიჯანი იყენებს კასეტურ ბომბებს, მოიერიშე უპილოტო თვითმფრინავებს, ანადგურებს სამოქალაქო ინფრასტრუქტურას. სტეპანარკეტში, ფაქტობრივად კვარტალი არ დარჩა, რომელიც არ დაიბომბა
• ისრაელის ხელისუფლებას ეკისრება პასუხისმგებლობა იმ გენოციდზე, რომელიც ახლა ყარაბაღელი სომხების წინააღმდეგ მიმდინარეობს, რადგან სწორედ ისინი აწვდიან აზერბაიჯანულ მხარეს არა მხოლოდ მოიერიშე უპილოტო თვითმფრინავებს, არამედ სპეციალისტებსაც, რომლებიც ამ სასიკვდილო იარაღს მართავენ
• ყარაბაღის ხელისუფლება მუდმივ კავშირზეა სომხეთის პრემიერ-მინისტრთან, გადასცემს ინფორმაციას არსებული ვითარებისა და მოქალაქეების ყველა პრობლემის შესახებ და არ არსებობს საკითხი, რომელიც მაშინვე არ გადაჭრილა
• თუკი ამის აუცილებლობა იქნება, მთიანი ყარაბაღის პრეზიდენტი სომხეთის ხელისუფლებას ყარაბაღის დამოუკიდებლობის აღიარების თხოვნით მიმართავს
• ამ დროისთვის, ზავის რეჟიმი საერთო ჯამში დაცულია. მაგრამ გუშინ, ცეცხლის შეწყვეტის შეთანხმების პირობები დაირღვა და ახლაც უცნობია, რამდენ ხანს გაგრძელდება ის
• თუკი ბაქო მოსკოვში მიღწეულ შეთანხმებას არ დაიცავს, „ეს ნიშნავს, რომ აზერბაიჯანი იძულებული გახდება ზავი ითხოვოს. ომის გაგრძელება უნდათ – მიიღებენ“
• ყარაბაღში, დასახლებული პუნქტების დაბომბვისას გამოიყენებოდა „Смерч“-ისა და „Полонез“-ის რაკეტები და კასეტური ბომბები
• არუთუნიანმა მადლობა გადაუხადა ჟურნალისტებს, „რომელთა მუშაობის შედეგადაც, მთელმა ცივილიზებულმა მსოფლიომ იცის არცახში მიმდინარე მოვლენების შესახებ“
• თუკი ამ ორი დღის განმავლობაში, დაცული არ იქნება შეთანხმება, რომელსაც სომხეთისა და აზერბაიჯანის საგარეო საქმეთა მინისტრებმა რუსეთის პრეზიდენტისა და ეუთოს მინსკის ჯგუფის შუამავლობით მიაღწიეს, ეს ნიშნავს, რომ აზერბაიჯანი პატივს არ სცემს საერთაშორისო სამართალს „ამ შემთხვევაში, სტეპანაკერტი მიმართავს სომხეთის ხელისუფლებასა და მსოფლიო თანამეგობრობას, აღიარონ არცახის რესპუბლიკის დამოუკიდებლობა. მე სამამულო ომს გამოვაცხადებ და მოვუწოდებ ყველა სომეხს, მონაწილეობა მიიღონ არა მხოლოდ მატერიალურად, არამედ ფიზიკურად. ჩვენ უარს არ ვიტყვით თავსმოხვეულ ომზე“.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად.
ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
