ახალი ამბები, რეპორტაჟი: 6 ოქტომბერს, ყარაბაღში მიმდინარე საბრძოლო მოქმედებები

როგორც აზერბაიჯანის სახელმწიფო უსაფრთხოების განცხადებაშია ნათქვამი, მთიან ყარაბაღში, სომხეთის არმიის შემადგენლობაში იბრძვიან ქურთული ტერორისტული დაჯგუფების წევრები, რომლებიც ერაყიდან და სირიიდან ჩავიდნენ.

განცხადებაში ამტკიცებენ, რომ აზერბაიჯანის სახელმწიფო უსაფრთხოების სამსახურმა ტერორისტების რადიო საუბარები დაიჭირა.

„საუბრების ამსახველ წარმოდგენილ ჩანაწერში, ტერორისტები საუბრობენ სომხურ მხარეს არსებულ დიდ დანაკარგზე, არმიის მძიმე მდგომარეობაზე, აზერბაიჯანელი სამხედრო მოსამსახურეების მიერ უპილოტო თვითმფრინავების ეფექტურად გამოყენებასა და იმაზე, რომ ნანობენ კონფლიქტის ზონაში ჩამოსვლას“, – ნათქვამია განცხადებაში.

„აზერბაიჯანი ირანის უსაფრთხოებას უგულებელყოფს“ – სომხეთის თავდაცვის სამინისტრო

დღეს, შუადღისას, აზერბაიჯანის შეიარაღებულმა ძალებმა რეზერვისტთა და დიდი რაოდენობით სამხედრო ტექნიკის გამოყენებით, მათ შორის, ტანკებისა და არტილერიის, ფართომასშტაბიანი შეტევა დაიწყოს დაპირისპირების ხაზის სამხრეთ მიმართულებაზე. ამის შესახებ სომხეთის თავდაცვის სამინისტროს პრესმდივანმა, შუშან სტეფანიანმა განაცხადა:

„მოწინააღმდეგე ირანის ისლამური რესპუბლიკის უსაფრთხოებას უგულებელყოფს. მიმდინარეობს მტრის დიდი რაოდენობით სამხედრო რესურსების მეთოდური განადგურება“.

ნიკოლ ფაშინიანმა კონსულტაციები გამართა სამხედრო მეთაურებთან, ამის შესახებ მთავრობა Facebook-ის საკუთარ გვერდზე წერს. განიხილეს ფრონტის წინა ხაზზე არსებული ოპერატიული ვითარება და შეიარღებული ძალების სამომავლო მოქმედებები. ჯერჯერობით სხვა დეტალები არ ვრცელდება.

https://www.facebook.com/armgovernment/posts/3506648282691544

სომხეთის თავდაცვის სამინისტროს პრესმდივნის, შუშან სტეფანიანის ცნობით, აზერბაიჯანი აგრძელებს დეზინფორმაციის გავრცელებას, თითქოს, სომხეთის შეიარაღებული ძალები აზერბაიჯანის მშვიდობიან ქალაქებს ბომბავს:

„აზერბაიჯანის სამხედრო-პოლიტიკური ხელმძღვანელობა აგრძელებს საერთაშორისო თანამეგობრობისა და საკუთარი ხალხის შეცდომაში შეყვანის პოლიტიკას. ვაცხადებთ, რომ აზერბაიჯანის მიმართულებით ცეცხლი არ გახსნილა… ნათელია, რომ ოფიციალური ბაქოს ეს დეზინფორმაცია მომართულია საფუძველის შესაქმნელად, რათა განაახლოს საბრძოლო მოქმედებები საერთაშორისო თანამეგობრობის, კერძოდ, თანათავმჯდომარე ქვეყნების მოწოდებების მიუხედავად, რომ დაუყოვნებლივ შეწყვიტოს ცეცხლი“.

იმის შესახებ, რომ თავდაცვის არმია ცეცხლს მხოლოდ „მტრის ტერორისტულ ფორმირებებს“ უხსნის, Facebook-ის საკუთარ გვერდზე დაწერა მთიანი ყარაბაღის პრეზიდენტის პრესმდივანმა, ვაგრამ პოღოსიანმაც:

„ყარაბაღში ვითარება სტაბილურად დაძაბულია… გვაქვს ცალკეული პოზიციური წარმატებები“.

აზერბაიჯანის თავდაცვის მინისტრის, გენერალ-პოლკოვნიკ ზაქირ ჰასანოვის ხელმძღვანელობით გაიმართა საგანგებო სამუშაო თათბირი.

„თათბირის მსვლელობისას გაანალიზდა მიმდინარე სიტუაცია გატარებული კონტრშეტევითი ოპერაციის კუთხით და გაიცა მითითება, გაგრძელდეს მოწინააღმდეგის ძალების გეგმაზომიერი, მიზანმიმართული და თანმიმდევრული განადგურება.

თავდაცვის მინისტრმა ჯარებს დაავალა, გათავისუფლებულ ტერიტორიებზე მიიღონ სასიცოცხლოდ მნიშვნელოვანი და აუცილებელი ზომები.

თავდაცვის მინისტრმა განაცხადა, რომ მოწინააღმდეგის მხრიდან ოპერატიულ-ტაქტიკური სარაკეტო კომპლექსების „ისკანდერის“ გამოყენების შემთხვევაში, გატარდება ადეკვატური საპასუხო ნაბიჯები. მინისტრმა უბრძანა აზერბაიჯანის არმიას, დაგეგმოს მოქმედებები მოწინააღმდეგის ტერიტორიაზე არსებულ სამხედრო-სტრატეგიულ ინფრასტრუქტურაზე დარტყმისათვის, თავის არსენალში მქონე შეიარაღების სახეობებით, რომლებსაც დიდი დამანგრეველი ძალა აქვთ“, – ნათქვამია თავდაცვის სამინისტროს პრესსამსახურის ცნობაში.

„აზერბაიჯანი აგრძელებს დაუშვებელ მოქმედებებს, ბომბავს საცხოვრებელ სახლებსა და სამოქალაქო ინფრასტრუქტურას. პირადად გავხდი მოწმე იმისა, თუ როგორ აფეთქდა რაკეტა სტეპანაკერტის ცენტრალურ საავადმყოფოსთან. არ გამოვრიცხავთ, რომ შემდეგი დარტყმა, სწორედ საავადმყოფოზე განხორციელდეს“, – განაცხადა ბრიფინგზე, სომხეთის ჯანდაცვის მინისტრმა, არსენ ტოროსიანმა.

მისი თქმით, მთიან ყარაბაღში სამხედრო ჰოსპიტალი და სამოქალაქო საავადმყოფო აუცილებელი მედიკამენტებითა და სისხლის რეზერვით უზრუნველყოფილია. სპეციალისტების დეფიციტიც არ არის. თუმცა, სომხეთიდან ბევრ მედიკოსს სურს ახლა ყარაბაღში ჩასვლა, რათა დაეხმარონ კოლეგებს. მინისტრის თქმით, მათთვის უარის თქმა უწევთ, „რათა თავიდან აირიდონ ქაოსი და ყველაფერი სწორად იყოს ორგანიზებული“.

თურქეთის საგარეო საქმეთა მინისტრი მევლუთ ჩავუშოღლუ ბაქოში ჩავიდა.

აზერბაიჯანის პრეზიდენტმა ილჰამ ალიევმა თურქეთის დელეგაციას საგარეო საქმეთა მინისტრის ხელმძღვანელობით 6 ოქტომბერს უმასპინძლა.

შეხვედრის დეტალები ჯერჯერობით უცნობია.

თავდაპირველად ომის ინიცირება აზერბაიჯანის ხელისუფლებამ მოახდინა, მაგრამ ახლა მას უკვე თურქეთის სამხედრო-პოლიტიკური ხელმძღვანელობა აწარმოებს, განაცხადა ბრიფინგზე, მთიანი ყარაბაღის პარლამენტის თავმჯდომარემ, არტურ ტოვმასიანმა.

„ეს სომხებისა და აზერბაიჯანელების ომი არ არის, ეს არის თურქეთის მცდელობა, შეძვრეს ამიერკავკასიაში“.

აქედან გამომდინარე, ტოვმასიანი მიიჩნევს, რომ საერთაშორისო თანამეგობრობამ სანქციები უნდა გამოიყენოს თურქეთის პრეზიდენტის, რეჯეფ თაიფ ერდოღანის წინააღმდეგ.

ამასთან, პარლამენტის სპიკერის თქმით, სტეპანაკერტმა მონაწილეობა უნდა მიიღოს ყარაბაღის კონფლიქტის მოგვარების შესახებ მოლაპარაკებების პროცესში.

ჯაბრაილის რაიონის სოფელი ჩახირლი აზერბაიჯანის არმიამ 3 ოქტომბერს აიღო. ამის შესახებ, ტვიტერის საკუთარ გვერდზე, აზერბაიჯანის პრეზიდენტმა, ილჰამ ალიევმა დაწერა.

აზერბაიჯანის თავდაცვის სამინისტროს პრესსამსახურის უფროსის, ვაგიფ დარგახლის თქმით, სომხეთის თავდაცვის სამინისტროს ოფიციალური წარმომადგენლების მიერ გავრცელებული ინფორმაცია, აზერბაიჯანის არმიის მებრძოლებისთვის თითქოს „ეშმაკური ხაფანგის“ მოწყობისა და მათი განადგურების შესახებ, სიცრუეა, დაუსაბუთებელია და მორიგი დეზინფორმაციაა.

„ვაცხადებთ, რომ სომხეთის არმია იძულებულია უკან დაიხიოს, განიცდის რა დიდი დანაკარგებს, როგორც ცოცხალი ძალის, ისე სამხედრო ტექნიკის მხრივ. თავისუფლდება ჩვენი ოკუპირებული მიწები. ეს უდავო ფაქტია“, – განაცხადა მან.

როგორც Facebook-ის საკუთარ გვერდზე, სომხეთის თავდაცვის სამინისტროს პრესმდივანი წერს, ეს არის შედეგი „საერთაშორისო თანამეგობრობის მრავალრიცხოვანი მოწოდებისა, რომ დაუყოვნებლივ შეწყდეს საბრძოლო მოქმედებები მთიანი ყარაბაღის კონფლიქტის ზონაში“.

ჩანაწერი მორიგი გაფრთხილებით სრულდება, რომ „სამომავლო ესკალაციის შემთხვევაში, მთელი პასუხისმგებლობა აზერბაიჯანის სამხედრო-პოლიტიკურ ხელმძღვანელობას დაეკისრება“.

ყარაბაღში ბრძოლების მეათე დღე

• 27 სექტემბრის დილიდან, საბრძოლო მოქმედებების დაწყებიდან, სომხური მხრიდან 224 ადამიანი დაიღუპა – ასეთ ინფორმაციას სომხური მედია ყარაბაღის თავდაცვის არმიაზე დაყრდნობით ავრცელებს. დაჭრილთა რაოდენობა ამ დროისთვის უცნობია. რამდენი აზერბაიჯანელი მებრძოლი დაიღუპა, ამის შესახებ განცხადება არ კეთდება. ექსპერტები ბრძოლების ინტენსივობიდან გამომდინარე, რომელიც უკვე მეათე დღეა გრძელდება, ვარაუდობენ, რომ ბევრი გარდაცვლილია.

• იზრდება მსხვერპლის რაოდენობა მშვიდობიან მოქალაქეებს შორის. აზერბაიჯანულ მხარეს სულ 26 ადამიანი დაიღუპა და 121 დაიჭრა. სომხურ მხარეს, 19 მშვიდობიანი მოსახლე დაიღუპა და დაახლოებით 80 ადამიანი დაიჭრა.

• აზერბაიჯანის თავდაცვის სამინისტროს ცნობით, აზერბაიჯანის არმიამ ფუზულის, ჯაბრაილის, ტერტერისა და აღდერეს რაიონებში, კონტროლი დაამყარა 25 სოფელზე, ასევე, რამდენიმე სტრატეგიულ სიმაღლეზე.

• ორივე მხარე სასტიკი ბრძოლების შესახებ საუბრობს.

• სომხეთის შეიარაღებულმა ძალებმა აზერბაიჯანის ტერიტორიაზე, ქვეყნის სიდიდით მეორე ქალაქი, განჯა დაბომბეს. ასევე, დაიბომბა ქალაქები ტერტერი და აღჯაბედი.

• აზერბაიჯანის შეიარაღებული ძალები აგრძელებენ ყარაბაღის დედაქალაქის, სტეპანაკერტის დაბომბვას.

• „საბრძოლო მოქმედებები შესაძლოა აზერბაიჯანის მთელ ტერიტორიაზე გავრცელდეს“, – ასეთი განცხადება გამოაქვეყნა ყარაბაღის პრეზიდენტის პრესმდივანმა.

• ყარაბაღის თავდაცვის არმიამ განაცხადა, რომ „ხაფანგში შეიტყუა“ აზერბაიჯანული ქვედანაყოფი, შეუქმნა რა უკანდახევის იმიტაცია. აზერბაიჯანის თავდაცვის სამინისტრომ ამ ინფორმაციას სიცრუე უწოდა.

• სომხეთის თავდაცვის სამინისტრომ უარყო ინფორმაცია 4 ოქტომბერს, აზერბაიჯანულ ქალაქ მინგეჩაურის დაბომბვის შესახებ, სადაც წყალსაცავი და მთავარი ელექტროსადგურია. განაცხადეს, რომ „Смерч“-ის სისტემისთვის ქალაქამდე ძალიან შორი მანძილია და ასევე, ამ ჭურვებს გაცილებით დიდი დამანგრეველი ძალა აქვს, ვიდრე აზერბაიჯანის მიერ გამოქვეყნებულ ფოტოსურათებში ჩანს.

• სომხეთის პრემიერ-მინისტრის შვილი, აშოტ ფაშინიანი, ფრონტზე მოხალისედ წავიდა.

• რუსეთის, საფრანგეთისა და აშშ-ის საგარეო საქმეთა მინისტრები ერთობლივი განცხადებით გამოვიდნენ, როგორც ეუთოს მინსკის ჯგუფის თანათავმჯდომარეები. მათ მხარეებს ცეცხლის დაუყოვნებლივ შეწყვეტისკენ მოუწოდეს და მთელი რეგიონის სტაბილურობისთვის საფრთხის შესახებ განაცხადეს.

• სომხეთის პრემიერ-მინისტრმა რუსეთის პრეზიდენტს დაურეკა. განიხილეს ყარაბაღში მიმდინარე ბრძოლების ინტენსიური ხასიათი და ორივე მხარის დიდი დანაკარგები, მათ შორის, მშვიდობიან მოსახლეობას შორის. პუტინმა ხაზი გაუსვა, რომ აუცილებელია საბრძოლო მოქმედებების დაუყოვნებლივ შეწყვეტა.

• ერევანში იმ ჯგუფის წევრები ჩავიდნენ, რომლებიც ევრაზიის ეკონომიკური სამიტის მოსამზადებელი სამუშაოებით არიან დაკავებული. სამიტი 8-9 ოქტომბერს გაიმართება. მოსალოდნელია, რომ მასში მონაწილეობას რუსეთის პრემიერ-მინისტრი, მიხაილ მიშუსტინიც მიიღებს.

• ახალი ამბები, ფოტო/ვიდეო ყარაბაღში მიმდინარე საბრძოლო მოქმედებებთან დაკავშირებით – 5 ოქტომბერი, 2020