მოსამართლემ წალკისა და თეთრიწყაროს უბნებზე შედეგები გააბათილა
წალკისა და თეთრიწყაროს უბნები
მოსამართლე ვლადიმერ ხუჭუამ თეთრიწყაროს და წალკის ელექტრონულ უბნებზე შედეგები გააბათილა. მისი თქმით, ელექტრონული წესით ჩატარებულ არჩევნებზე ხმის ფარულობა დაირღვა. ყოფილი სახალხო დამცველის, ნინო ლომჯარიას თქმით, საუბარია 30 უბანზე.
30 ოქტომბერს საიამ ყველა იმ უბნის შედეგების ბათილად ცნობა მოითხოვა, სადაც არჩევნები ელექტრონულად ჩატარდა. ორგანიზაციის თავმჯდომარე, ნონა ქურდოვანიძე ამბობდა, რომ ხმის ფარულობის პრინციპი მასობრივად დაირღვა. საიას საჩივრების განხილვა საოლქო საარჩევნო კომისიებში 31 ოქტომბერს, 18:00 საათიდან დაიწყო, პროცესი კი სასამართლოში გაგრძელდა.
3 ნოემბერს, სამართლიანი არჩევნების (ISFED) დირექტორმა თქვა, რომ თბილისის საქალაქო და რაიონულმა სასამართლოებმა მათი არც ერთი საჩივარი არ დააკმაყოფილეს. მოგვიანებით გახდა ცნობილი, რომ საქალაქო სასამართლომ ხმის ფარულობის უფლებაზე საქართველოს ახალგაზრდა იურისტთა ასოციაციის საჩივარი არ დააკმაყოფილა.
ახალგაზრდა იურისტთა ასოციაციაში (საია) აცხადებენ, რომ მოსამართლის ამ გადაწყვეტილებით შეიქმნა ახალი პრეცედენტი.
“სასამართლოს ცალსახად და ერთმნიშვნელოვნად მიაჩნია, რომ სასამართლო სხდომაზე ჩატარებული მტკიცებულებების გამოკვლევით, ამ საარჩევნო ხმის დამთვლელი აპარატით, ამ საარჩევნო ჩარჩო კონვერტით ხმის დაცულობის და ფარულობის გარანტია ამომრჩეველს არ ჰქონდა. აქ ლაპარაკია გარანტიაზე.
რაც შეეხება წალკის საოლქო კომისიას, სასამართლომ დაადგინა, რომ იყო დარღვევები, უმძიმესი დარღვევები, რომლებიც არის საჩივრის არგატარება შესაბამისი წესით, ასევე დადასტურებული იქნა, რომ იყო გარკვეული სახის მანიპულაციები.
სასამართლოს ცალსახად მიაჩნია, რომ ამგვარი დამოკიდებულება საარჩევნო პროცესზე, არ არის თავისუფალი და შესაბამისად, ეს ყველა შედეგები უნდა იქნეს ბათილად ცნობილი
ჩვენ ვფიქრობთ, რომ ეს გადაწყვეტილება ალბათ აპელაციაში შეიცვლება, მაგრამ ეს არ ცვლის მოცემულობას, რომ ამ სასამართლოში, ამ მოსამართლემ საზოგადოებას აჩვენა, რომ ხმის ფარულობა იყო დარღვეული, კონსტიტუციური პრინციპი არჩევნების ჩატარების იყო დარღვეული და მიიღო პრეცედენტული გადაწყვეტილება.
ჩვენ აპელაციაში გასაჩივრებული გვაქვს და ხვალიდან ჩანიშნულია სხდომები როგორც ქუთაისის სააპელაციო სასამართლოში, ასევე თბილისში, ვასაჩივრებთ დანარჩენი სასამართლოების მიერ მიღებულ გადაწყვეტილებებს. ალბათ, ეს გადაწყვეტილებაც მოპასუხე მხარის მიერ გასაჩივრდება.” – განაცხადა საიას დირექტორმა ნონა ქურდოვანიძემ.
26 ოქტომბრის საპარლამენტო არჩევნების შემდეგ საქართველო ახალი, სრულიად განსხვავებული რეალობის წინაშე აღმოჩნდა.
არჩევნებში ხმების უმრავლესობა – თითქმის 54 პროცენტი “ქართულმა ოცნებამ მიიღო. ეს 12 პროცენტით მეტია ეგზიტპოლის შედეგზე. ამ მონაცემების არ სჯერა არც ადგილობრივ დამკვირვებლებს და არც საერთაშორისო თანამეგობრობას. დამკვირვებლების და ექსპერტების მიერ აღმოჩენილმა ათასობით დარღვევამ და გაყალბების სისტემურმა სქემამ არჩევნების შედეგები კითხვის ნიშნის ქვეშ დააყენა როგორც ქვეყნის შიგნით, ასევე მის ფარგლებს გარეთაც.
საერთაშორისო თანამეგობრობა არ აღიარებს არჩევნების შედეგებს და მათ ლეგიტიმურობას ეჭვის ქვეშ აყენებს. ერთადერთი ევროპელი ლიდერი, რომელმაც საპარლამენტო არჩევნები აღიარა, ვიქტორ ორბანია. საქართველოში ევროკავშირის ელჩის, პაველ ჰერჩინსკის განცხადებით, მთავრობის კურსის გამო, ევროკავშირის ლიდერებმა ქვეყნის ევროკავშირში გაწევრების პროცესი შეაჩერეს, მწვავე განცხადებების ისმის აშშ-დანაც.
