ვითარების გამწვავება ყარაბაღში - აზერბაიჯანული და სომხური მხარეების ვერსიები
ბაქოსა და ერევანში ადასტურებენ ყარაბაღში, ორ სოფელში შეიარაღებულ მოქმედებებს და 10 ნოემბერს ხელმოწერილი სამმხრივი საზავო შეთანხმების დარღვევაზე საუბრობენ. არიან დაღუპულები და დაჭრილები.
ჯერჯერობით შეუძლებელია ითქვას, შეჩერებულია თუ არა საბრძოლო მოქმედებები. ამასთან, მხარეები მომხდარის ურთიერთსაპირისპირო ვერსიებზე საუბრობენ.
აზერბაიჯანმა სომეხი „ბოევიკების“ წინააღმდეგ ანტიტერორისტული ოპერაციის შესახებ განაცხადა, სომხეთმა – აზერბაიჯანელი სამხედროების მხრიდან მშვიდობიან მოსახლეობაზე თავდასხმაზე.
ინფორმაცია ბაქოდან
13 დეკემბერს, აზერბაიჯანის სახელმწიფო უსაფრთხოების სამსახურმა და თავდაცვის სამინისტრომ ერთობლივი განცხადება გააკეთეს, რომელშიც საუბარია ყარაბაღში, ხოჯავენდის რაიონის ტერიტორიაზე, სპეცსამსახურების მიერ ჩატარებულ კონტრტერორისტულ ოპერაციაზე.
„ზავის გამოცხადების შემდეგ, აზერბაიჯანის ხოჯავენდის რაიონის სოფელ ჰადრუთთან, ტყიან ადგილას, ცალკეული სომხური შეიარაღებული ფორმირებები დარჩნენ.
სომხურ მედიაში გავრცელდა ინფორმაცია იმის შესახებ, რომ მათ ტყეში აერიათ გზა. სომხურმა მხარემ რუსეთის ფედერაციის სამშვიდობო ძალების ხელმძღვანელობას მიმართა მათი ტერიტორიიდან გაყვანის თაობაზე და აზერბაიჯანულმა მხარემ ყველა პირობა უზრუნველყო.
რთულ მეტეოროლოგიურ პირობებში, რუსული სამშვიდობო კონტინგენტის სამხედრო მოსამსახურეები ადგილზე ჩავიდნენ და ხმის გამაძლიერებლის საშუალებით მიმართეს ტყეში მყოფ სომხური შეიარაღებული ფორმირებების წევრებს. (…)
მაგრამ „ბოევიკებმა“ არ დატოვეს ტერიტორია და ამის ნაცვლად, საბრძოლო პოზიციები დაიკავეს (…) და რამდენიმე დღის განმავლობაში, დივერსიებს აწყობდნენ იმ ადამიანების წინააღმდეგ, რომლებიც სამოქალაქო საქმიანობას ახორციელებენ, ასევე – სამხედრო მოსამსახურეების.
ასე, 26 ნოემბერს, თავდაცვის სამინისტროს მებრძოლების მიერ ოკუპაციისგან გათავისუფლებულ ხოჯავენდის რაიონის სოფელ სურის ტერიტორიაზე, მოულოდნელი თავდასხმის შედეგად დაიღუპა სამი და დაიჭრა ორი აზერბაიჯანელი სამხედრო მოსამსახურე.
8 დეკემბერს, სოფელ ჰადრუთთან, კავშირგაბმულობის აღჭურვილობის მონტაჟის დროს, დაიღუპა კიდევ ერთი მებრძოლი და მძიმედ დაიჭრა კომპანია „Azercell“-ის თანამშრომელი.
ამის გათვალისწინებით, აზერბაიჯანი იძულებული გახდა, ჩაეტარებინა ანტიტერორისტული ოპერაცია ამ ტერიტორიაზე“.
- თავზეხელაღებულები ომში: ყარაბაღიდან რეზონანსული ვიდეო განხილვის ობიექტად იქცა
- მოსაზრება: რა ელის ყარაბაღსა და სომხეთს?
- მოსაზრება: ყარაბაღში მოვლენათა განვითარების სამი სცენარი – ხედვა ბაქოდან
ინფორმაცია ერევნიდან
13 დეკემბერს, აზერბაიჯანის საგარეო საქმეთა სამინისტრომ განაცხადა, რომ „აზერბაიჯანმა ჰადრუთის რაიონის დასახლებულ პუნქტებში, ხინ ტაგლარსა და ხცაბერდში, ცეცხლის შეწყვეტის რეჟიმი დაარღია, ისარგებლა რა, რომ არახის რესპუბლიკის ამ ნაწილში არ არიან განთავსებული სამშვიდობო ძალები“.
სომხეთის საგარეო საქმეთა სამინისტროს ინფორმაციით, ეს ინციდენტი 11 დეკემბერს მოხდა, რომლის დროსაც დაიჭრა ყარაბაღის თავდაცვის არმიის ექვსი სამხედრო მოსამსახურე.
„აზერბაიჯანული ძალები აგრძელებდნენ პროვოკაციულ ქმედებებს და 13 დეკემბერს, მიმართეს ის მეც შენისა და ხინ შენის (აზერბაიჯანული სახელწოდებები – ბუიუქ გალაბიარისი და ქეხნია გალაბიარისი – JAMnews) (…) წინააღმდეგ. ეს მოქმედებები მიზნად ისახავს, გააუფასუროს კონფლიქტის ზონაში, რუსეთის ფედერაციის სამშვიდობო ძალების ყოფნა.
აზერბაიჯანულმა მხარემ ეს პროვოკაცია მოახდინა რეგიონში ეუთოს მინსკის ჯგუფის თანათავმჯდომარეების ვიზიტის დღეებში. ეს არის გამოწვევა მათი ძალისხმევის წინააღმდეგ. (…)
მოქმედებების ასეთი სტილი კიდევ ერთხელ ახდენს თურქულ-აზერბაიჯანული ექსპანსიონისტური პოლიტიკის დემონსტრირებას, რომელიც აგრძელებს რეგიონული უსაფრთხოებისა და სტაბილურობის შერყევას და ეს შეიძლება გავრცელდეს მეზობელ რეგიონებში.
ოფიციალური ბაქოს ასეთი ქმედებების ფონზე (…) კიდევ უფრო სავალდებულო ხდება არცახის ტერიტორიის დეოკუპაცია და არცახელი სომხების თავის საცხოვრებელ ადგილზე დაბრუნება“.
სომხეთის საგარეო საქმეთა სამინისტრომ ეუთოს მინსკის ჯგუფის თანათავმჯდომარეებს აზერბაიჯანული მხარის ქმედებებზე რეაგირებისკენ მოუწოდა.
