ვის და რა შემთხვევაში შეუძლია მანქანით გადაადგილება - გამონაკლისების სია
17 აპრილიდან საქართველოში მსუბუქი ავტომანქანებით გადაადგილება აიკრძალა. აკრძალვის გამო ბევრი ადამიანი გამოუვალ მდგომარეობაში აღმოჩნდა: ვეღარ წავიდა ექიმთან ან აფთიაქში, აუცილებელი წამლის შესაძენად.
23 აპრილის მონაცემებით, საქართველოში კორონავირუსით ინფიცირების 420 შემთხვევაა დადასტურებული. კარანტინის რეჟიმშია 5148 ადამიანი, ხოლო სტაციონარში მეთვალყურეობის ქვეშ – 573 პირი. კორონავირუსით ინფიცირებულთაგან 107 გამოჯანმრთელდა და 5 გარდაიცვალა.
ახლა საქართველოს მთავრობამ დაუშვა რამდენიმე გამონაკლისი.
ავტომანქანით გადაადგილება დასაშვებია შემდეგ შემთხვევებში:
● სამედიცინო საჭიროებების დროს
ექიმთან ვიზიტის ან კლინიკიდან გამოწერის შემთხვევაში (მშობიარობა, დიალიზი, ქიმიოთერაპია, ჰორმონოთერაპია, გადაუდებელი სტომატოლოგია).
პაციენტებს და მათ თანმხლებ პირებს გადაადგილების უფლება აქვთ კლინიკის ან ექიმის მიერ გამოწერილი ცნობის საფუძელზე. ცნობა შეიძლება იყოს როგორც ქაღალდზე დაწერილი, ისე ელექტრონული სახით.
ექიმთან ვიზიტის საჭიროებას ადგენს ექიმი. ექიმი წერს ცნობას, რომ პაციენტს ნამდვილად სჭირდება ექიმთან მისვლა და ის ვიზიტზე უკვე ჩაწერილია მასთან. ცნობაში უნდა იყოს მითითებული ვიზიტის დრო და ის სატრანსპორტო საშუალება, რითიც პაციენტს წაიყვანენ. მხოლოდ ამ ცნობის საფუძველზე და კონკრეტული დროის შუალედში ეძლევა ავტომობილის მფლობელს მანქანით გადაადგილების უფლება.
იგივე პროცედურით ხდება საავადმყოფოდან გამოწერილი ადამიანის სახლში გადაყვანა.
● თუ სოფელში ცხოვრობთ და აფთიაქში წასვლა გჭირდებათ
სამედიცინო კონსულტაციისთვის ჯერ სოფლის ექიმთან უნდა მიხვიდეთ. ის მოგცემთ ცნობას, რომ წამლის საყიდლად აფთიაქში გჭირდებათ წასვლა. ცნობაში მითითებული უნდა იყოს წასვლის დრო, ასევე მძღოლის და იმ მანქანის მონაცემები, რითაც აფთიაქში წახვალთ.
● სამედიცინო დაწესებულების თანამშრომლების მიზნობრივი გადაადგილება
სამედიცინო დაწესებულების თანამშრომლებს მსუბუქი ავტომობილით გადაადგილების უფლება აქვთ იმ შემთხვევაში, თუ კლინიკის მიერ გაცემულ ცნობას/მოწმობას წარადგენენ.
სამედიცინო დაწესებულების თანამშრომლების მანქანით გადაყვანა შეუძლია სხვა პირსაც, იმ შემთხვევაში, თუ აქვს კლინიკის მიერ გაცემულ ცნობა.
ცნობა უნდა იყოს სველი ბეჭდით დამოწმებული და მასში მითითებული უნდა იყოს პირადი მონაცემები (პირადი ნომერი, სახელი, გვარი), დაკავებული პოზიცია, პირის გადაადგილების მარშრუტი და ავტომობილის სახელმწიფო ნომერი.
● სამედიცინო დაწესებულებებში დაწესებული საკარანტინო რეჟიმის მოქმედება
საქართველოს მასშტაბით არსებულ ყველა სამედიცინო დაწესებულებაში მოქმედებს საკარანტინო რეჟიმი, რის გამოც საავადმყოფოებში არ დაიშვებიან პაციენტების ოჯახის წევრები და მნახველები.
თუ საავადმყოფოში მყოფ ადამიანს საკვები ან პირადი ნივთები უნდა მიუტანოთ, საავადმყოფომ უნდა მოგცეთ საკუთარ ბლანკზე, ბეჭდით და ხელმძღვანელი პირის ხელმოწერით დამოწმებული ცნობა, სადაც მითითებული უნდა იყოს: გადაადგილების მიზნობრიობა, რომ მიგაქვთ საკვები ან პირადი ნივთები კონკრეტული პაციენტისთვის, გადაადგილების ტრაექტორია, საცხოვრებელი მისამართი და საავადმყოფოს მისამართი, გადაადგილების დრო და საათი, მანქანის მარკა, მოდელი და სახელმწიფო ნომერი, ასევე საჭიროების შემთხვევაში მძღოლის პირადი ნომერი, სახელი და გვარი.
ცნობა შეიძლება იყოდ როგორც ქაღალდის ბლანკზე დაწერილი, ისე ელექტრონული სახით და შეგიძლიათ პოლიციას აჩვენოთ ტელეფონით (ფოტოს სახით).
ნივთების კლინიკაში მიტანის შემდეგ, კლინიკა წერილობით, ბეჭდით ადასტურებს, რომ მიიღო ნივთები/საკვები. თუ პირს არ აქვს ამობეჭდილი ცნობა, კლინიკა უბეჭდავს და უდასტურებს ცნობაზე მინაწერით და ბეჭდის დარტყმით, ან გასცემს ახალ ცნობას, რომ აღნიშნულმა პირმა ნამდვილად მიიტანა საკვები/პირადი ნივთები.
- უსახლკარო ცხოველები საქართველოში. რატომ არ მცირდება მათი რიცხვი და როგორ ცხოვრობენ ისინი ეპიდემიის დროს
- “ვართ მე და ჩემი ბერიკაცი, ხან ნარდს ვთამაშობთ, ხან კარტს,” – როგორ ცხოვრობენ ხანდაზმულები იზოლაციაში
- პატრიარქი: სიცოცხლეც და გარდაცვალებაც უფლის ხელშია
● აუტიზმის სპექტრის მქონე პაციენტების გადაადგილება
აუტიზმის სპექტრის მქონე პაციენტების ავტომობილით გადაყვანის შემთხვევაში ავტომობილის მძღოლმა/თანმხლებმა პირმა უნდა წარადგინოს ექიმის მიერ გაცემული შესაბამისი ცნობა/ჯანმრთელობის ცნობა. დასაშვებია ცნობის ელექტრონული ფორმაც (მაგ.ტელეფონზე მიღებული ცნობის ფოტოსურათი).
● დისტრიბუციის განმახორციელებელი პირების გადაადგილება
სადისტრიბუციო კომპანიის მანქანები გადაადგილდებიან სპეციალური ნებართვის გარეშე.
● ადგილზე მიტანის – „დელივერი“ სერვისი
მიტანის – ე.წ დელივერი სერვისის კურიერებს საკვები პროდუქტის, სურსათისა და სამედიცინო დანიშნულების საქონლის/ფარმაცევტული პროდუქტის მანქანით მიტანის უფლება აქვთ.
საკოორდინაციო საბჭოს გადაწყვეტილებით, 22 აპრილს მიტანის – ე.წ დელივერი სერვისის კურიერებს მანქანით პროდუქციის მიტანა აეკრძალათ. მას შემდეგ, რაც ამ შეზღუდვამ მოსახლეობაში უკმაყოფილება გამოიწვია, აკრძალვა მოიხსნა.
● პირის გარდაცვალებასთან დაკავშირებული (გასვენება, დაკრძალვა) გადაადგილება
პირის გარდაცვალებასთან დაკავშირებული გადაადგილება დაშვებულია ოჯახის წევრებისთვის. ამ შემთხვევაში თან უნდა გქონდეთ გარდაცვალების ცნობის დამადასტურებელი დოკუმენტი/ექიმის ცნობა გარდაცვალების შესახებ (შესაძლებელია ელექტრონული ფორმით).
● რეგიონებში სასოფლო-სამეურნეო სამუშაოების განხორციელების მიზნით გადაადგილება
27 აპრილამდე საქართველოს რეგიონებში, სასოფლო-სამეურნეო სამუშაოების ჩატარების მიზნით, დილის 6:00-8:00 საათამდე და საღამოს 18:00-19:00-მდე დასაშვებია მსუბუქი ავტომობილებით გადაადგილება.
● სოფლებში სურსათის მაღაზიების დისტრიბუციის მიზნით გადაადგილება
სოფლებში არსებული სასურსათო ობიექტების მეპატრონეებმა მსუბუქი ავტომანქანით სურსათის მომარაგება/დისტრიბუციის განხორციელების ნებართვისთვის უნდა მიმართონ ადგილობრივ მუნიციპალიტეტს.
● ვეტერინარული სერვისის მიწოდებით მიზნით გადაადგილება
ვეტერინარული სერვისის მიმწოდებელი პირების და მცენარეთა დაცვის საშუალებების/რეალიზაციის ობიექტების თანამშრომელთა გადაადგილება დასაშვებია.
გადაადგილებასთან დაკავშირებულ საკითხებზე აღნიშნულმა პირებმა უნდა მიმართონ გარემოს დაცვისა და სოფლის მეურნეობის სამინისტროს.
● ტვირთების განბაჟებასთან დაკავშირებული გადაადგილება
სატრანზიტო ან სხვა ტიპის ტვირთის განბაჟებასთან დაკავშირებული პროცედურების განსახორციელებლად შესაბამის უფლებამოსილ პირს აქვს მიზნობრივი გადაადგილების უფლება იმ შემთხვევაში, თუ წარადგენს ტვირთთან დაკავშირებულ შესაბამის დოკუმენტაციას. ამასთან,
საკმარისია დოკუმენტების ელექტრონული ფორმით (მაგ. ტელეფონზე მიღებული ფოტოსურათი) წარდგენა.
კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.
