„რუსული კვალი“: უკრაინის წინააღმდეგ მასირებული კიბერშეტევა განხორციელდა
კიბერშეტევა უკრაინის წინააღმდეგ
14 იანვრის ღამეს უკრაინაში მასირებული კიბერშეტევა განხორციელდა, რომლის დროსაც ხელისუფლების ცენტრალური და რეგიონული ორგანოების დაახლოებით 70 ვებგვერდი დაზიანდა.
- როგორც უკრაინული ტელეარხი „Громадское“ იტყობინება, დაზიანდა მინისტრთა კაბინეტის, განათლებისა და მეცნიერების, საგარეო საქმეთა, ვეტერანთა საქმეების სამინისტროების, საგანგებო ვითარების სახელმწიფო სამსახურების, ენერგეტიკის სამინისტროსა და ა.შ. ვებგვერდები. მათმა ნაწილმა მუშაობა მალევე განაახლა.
რესურსების მთავარ გვერდზე განთავსებული იყო განცხადებები სამ – რუსულ, უკრაინულ და პოლონურ – ენაზე, რომლებშიც ნათქვამი იყო, რომ „ყველა პირადი მონაცემი საერთო ქსელში იყო ატვირთული.“
- NYT-მა უკრაინის საზღვრებთან რუსული ჯარების კონცენტრაციის ახალი რუკა გამოაქვეყნა
- “ისკანდერები” და კიევის ოკუპაცია. რას ამბობენ უკრაინაში რუსული აგრესიის გეგმებზე
მასირებული კიბერშეტევის ფაქტი საგანგებო ბრიფინგზე დაადასტურა უკრაინის სპეციალური კავშირგაბმულობისა და ინფორმაციის დაცვის სახელმწიფო სამსახურის ხელმძღვანელმა ვიქტორ ჟორამ. მან ღამის კიბერშეტევას ბოლო ოთხ წელიწადში ერთ-ერთი ყველაზე მძლავრი უწოდა. ჟორას სიტყვებით, ხელისუფლებამ, კიბერშეტევების გავრცელების თავიდან ასაცილებლად, ვებგვერდების ნაწილი გათიშა.
ამჟამად, სამართალდამცველები აგროვებენ მტკიცებულებებს და აანალიზებენ ფაილებს, რათა გაიგონ შეტევის რეალიზაციის მთელი ჯაჭვი. ამ დროისთვის ახალი შეტევები არ ფიქსირდება.
„როგორც კი დავრწმუნდებით, რომ სისტემაში უცხო პირები არ არიან და იქ არაა ზიანის მომტანი პროგრამული კოდი, ვებგვერდების მუშაობა აღდგება“, – თქვა ჟორამ.
გარდა ამისა, მან აღნიშნა, რომ შეტევა მოხდა იმ რესურსებზე, სადაც ღია ინფორმაცია ქვეყნდება, მაშინ როდესაც, პერსონალური მონაცემები სახელმწიფო რეესტრებში ინახება.
ჯერჯერობით, სპეციალური კავშირგაბმულობის სახელმწიფო სამსახურებს არ გააჩნიათ ინფორმაცია იმის თაობაზე, რომ რეესტრებში მონაცემები დაზიანდა ან მათი გაჟონვა მოხდა. გარდა ამისა, არ მუშაობს სასამართლო რეესტრების ვებგვერდები. სპეციალისტები ამოწმებენ, ხომ არ შეუტანიათ იქ ყალბი განაჩენები.
![](https://jam-news.net/app/uploads/2022/01/robert-anasch-50vvwcNFFzU-unsplash.jpg)
რუსული კვალი
ვიქტორ ჟორამ თქვა, რომ უკრაინულ ვებგვერდებზე მიტანილი კიბერშეტევის შესახებ, პირველებმა განაცხადეს „სხვა ქვეყნის საინფორმაციო რესურსებმა“, თუმცა მას ეს ქვეყანა არ დაუსახელებია.
სამსახურის ხელმძღვანელმა ასევე დაამატა, რომ უკრაინაში ჰაკერული შეტევები 2014 წელს დაიწყო და ამ შეტევის „დაკავშირება შეიძლება გამუდმებული აგრესიის ფაქტთან.“
ამავე დროს, სახელმწიფო სამსახურში არ ამბობენ, რომ შეტევის უკან რუსეთი დგას. თუმცა, უკრაინის კულტურისა და საინფორმაციო პოლიტიკის სამინისტროსთან არსებულ სტრატეგიული კომუნიკაციების ცენტრში პირდაპირ აცხადებენ რუსულ კვალზე და, კერძოდ, მოჰყავთ კიბერშეტევებზე ახალი ამბების გავრცელების ქრონოლოგია: ჯერ ინფორმაცია გაჩნდა სოციალურ ქსელებში, შემდეგ კი – „საეჭვო“ რუსულ მედიაში.
ცენტრში ასევე ვარაუდობენ, რომ მასიური კიბერშეტევა შესაძლოა დაკავშირებული იყოს დასავლეთსა და რუსეთს შორის ახლახან გამართულ მოლაპარაკებებთან, ვინაიდან მას რუსეთისთვის სასურველი შედეგი არ მოუტანია.
უკრაინის კიბერპოლიცია კიბერშეტევის ფაქტზე გამოძიების დაწყებას გეგმავს.