უკრაინის დაზვერვა: რუსეთი საქართველოს რეექსპორტზე ელაპარაკება. თბილისი განმარტებებს ითხოვს
უკრაინის დაზვერვის ბრალდება საქართველოს
1-ელ მაისს, უკრაინის თავდაცვის სამინისტროს მთავარმა სადაზვერვო სამმართველომ, გაავრცელა ინფორმაცია, რომ რუსეთი საქართველოსთან, სომხეთსა და აზერბაიჯანთან რუსული პროდუქციის საერთაშორისო ბაზარზე რეექსპორტის შესახებ მოლაპარაკებებს აწარმოებს.
უკრაინის დაზვერვას საქართველოში 2 მაისს უპასუხეს. ოფიციალურმა თბილისმა უკრაინისგან განმარტება მოითხოვა, ელჩის მოვალეობის შემსრულებელი კი საგარეო საქმეთა სამინისტროში დაიბარა.
- აბა ომი გინდათ?! – ვინ და რატომ აძლიერებს საქართველოში ომის ბუნებრივ შიშს? ექსპერტების შეფასებები
- “უკრაინა ომს აგებს. ზელენსკიმ ომი ვერ აიცილა”. ვინ დგას საქართველოში რუსული პროპაგანდის უკან
- საქართველოს საპატრიარქო არ აპირებს აღიაროს უკრაინის ეკლესიის ავტოკეფალია. ვის მხარესაა იგი ამ ომში?
უკრაინის დაზვერვის ცნობით, რუსეთი გეგმავს პროდუქციის წარმოებას ქართული, სომხური და აზერბაიჯანული პროდუქციის საფარქვეშ და შემდეგ მათ ექსპორტს მესამე ქვეყნებში. დაზვერვის სამსახურის ცნობით, უკრაინაში ომის დაწყების შემდეგ, ამ მიზნით ჩამოთვლილ ქვეყნებში უკვე 200-ზე მეტი კომპანიაა რეგისტრირებული:
“უკრაინის სამხედრო დაზვერვის მონაცემებით, მოსკოვი ფიქრობს “ОДКБ”-ს ქვეყნების (ბელარუსი, სომხეთი, ყაზახეთი, ყირგიზეთი, ტაჯიკეთი) გამოყენებით აწარმოოს სამხედრო პროდუქცია რუსეთის არმიისთვის და ორმაგი დანიშნულების პროდუქცია, რომლების შესაქმნელადაც საჭიროა უცხოეთიდან შემოტანილი ნაწილები. ამ გზით რუსეთი გაზრდის ამ ქვეყნების ეკონომიკურ დამოკიდებულებას კრემლზე, რაც ყოველთვის იყო რუსეთის ინტერესებში.
სომხეთი ხელსაყრელ პირობებს უქმნის რუსულ ბიზნეს კომპანიებს, პირველ რიგში, IT სექტორში. რუსეთის ფედერაციის ფართომასშტაბიანი აგრესიის დაწყებიდან უკრაინის წინააღმდეგ, დაახლოებით რუსეთის 85 ათასი მოქალაქე და 113 IT კომპანია გადავიდა სომხეთში. რუსეთის მოქალაქეებმა სომხეთის ტერიტორიაზე ათასამდე კერძო საწარმო და 250-ზე მეტი შპს შექმნეს, რომლებიც გადასახადებს გადაიხდიან 2 ქვეყნის – სომხეთის და რუსეთის ბიუჯეტში”, – ნათქვამია დაზვერვის განცხადებაში.
საქართველოს ფინანსთა მინისტრმა, ლაშა ხუციშვილმა, უკრაინის დაზვერვის სამსახურის განცხადებას გაუგებარი უწოდა. მინისტრმა განმარტა, რომ ქვეყნის პოზიცია – არ გახდეს სანქციების გვერდის ავლის ადგილი – მკაფიოა. ეს ეხება როგორც საფინანსო, ასევე კონკრეტულ საქონელთან მიმართებით დაწესებულ სანქციებს:
„ბუნებრივია, როდესაც საუბარი გვაქვს დიდი რაოდენობის საქონლის მოძრაობაზე, მნიშვნელოვანია, რომ დეტალურად იქნეს განმარტებული ყველა სანქცია. საფინანსო სექტორში ეს არის ერთიანი სისტემა, ამ სისტემას მიერთებულია საქართველოს საფინანსო სექტორიც. ეროვნული ბანკის სახით საფინანსო სექტორს ჰყავს მყარი, საიმედო რეგულატორი და ამ მიმართულებით რაიმე სირთულეებს არ ველოდებით“, – განაცხადა ლაშა ხუციშვილმა.
რაც შეეხება საქონლის ბრუნვას, მინისტრის თქმით, ჩამონათვალი, რომელ საქონელს ეხება სანქციები, ხელმისაწვდომია და შეცდომები აქაც გამორიცხულია:
„შესაბამისად, ამ სანქციების აღსრულების ნაწილში ჩვენი პარტნიორების მხრიდან არანაირი კითხვები არ არის. პირადად მქონდა შეხვედრა ძალიან ბევრ ჩემს კოლეგასთან, რეგულატორთან, იმ ქვეყნებისა, რომლებმაც უშუალოდ დააწესეს სანქციები და ისინი არიან სრულად ინფორმირებული იმასთან დაკავშირებით, თუ რას აკეთებს საქართველო“.
საქართველოსთან დაკავშირებით უკრაინის დაზვერვამ მსგავსი ინფორმაცია აპრილშიც გაავრცელა. 4 აპრილს გავრცელებულ განცხადებაში, დაზვერვამ თქვა, რომ რუსეთი საქართველოს გავლით კონტრაბანდის მარშრუტს აყალიბებს.
ლაშა ხუციშვილი ამბობს, რომ საქართველო სახელმწიფო დონეზე მოითხოვს განმარტებებს, რის საფუძველზე კეთდება ასეთი განცხადებები.
ამ განცხადების გამო, დღეს, 2 მაისს, საქართველოს საგარეო საქმეთა სამინისტროში უკრაინის საქმეთა დროებითი რწმუნებული ანდრი კასიანოვი დაიბარეს.
„უკრაინის საქმეთა დროებით რწმუნებულს საქართველოს საგარეო საქმეთა სამინისტრომ უკრაინის თავდაცვის სამინისტროს დაზვერვის სამსახურის მიერ გავრცელებულ ინფორმაციაზე შესაბამისი ფაქტობრივი განმარტებების და მტკიცებულებების დროულად წარმოდგენა სთხოვა „განსაკუთრებით იმის გათვალისწინებით, რომ უკრაინულმა მხარემ ასევე ვერ წარმოადგინა მტკიცებულებები უკრაინის თავდაცვის დაზვერვის ანალოგიური შინაარსის წინა ბრალდებაზე (2022 წ. 5 აპრილს)“, – ნათქვამია სამინისტროს მიერ გავრცელებულ განცხადებაში.
უწყების ინფორმაციით, უკრაინელმა დიპლომატმა საგარეო საქმეთა სამინისტროში გამართულ შეხვედრაზე განაცხადა, რომ მას ამ ეტაპზე არ გააჩნია შესაბამისი პასუხი უკრაინის დაზვერვის სამსახურის მიერ გავრცელებული განცხადების ირგვლივ და აღნიშნა, რომ შესაბამის შეტყობინებას კიევს გადასცემს.
სამინისტროს განცხადებაში ასევე ნათქვამია, რომ შეხვედრაზე, მინისტრის მოადგილემ, თეიმურაზ ჯანჯალიამ კიდევ ერთხელ დააფიქსირა ქართული მხარის უკმაყოფილება მსგავსი შინაარსის ბრალდებების გამო.
“მსგავსი სახის გადაუმოწმებელ ფაქტებზე დაყრდნობით ინფორმაციის გავრცელება აზიანებს ორ ქვეყანას შორის არსებულ პარტნიორულ ურთიერთობას“, – ნათქვამია უწყების განცხადებაში.
უკრაინის დაზვერვის ბრალდება საქართველოს
