თებერვლიდან შეზღუდვების ნაწილი მოიხსნება. ძალაში რჩება კომენდანტის საათი

საქართველოს მთავრობამ პირველი თებერვლიდან ქვეყნის გარკვეულ ნაწილში შეზღუდვების შემსუბუქება დააანონსა.

რამდენიმე ქალაქში აღდგება ტრანსპორტი და სწავლა სკოლებში, თუმცა დიდ ქალაქებში, მათ შორის, თბილისში, ქუთაისში და რუსთავში სკოლები და საზ.ტრანსპორტი მარტამდე არ აღდგება.

არ იგეგმება გადაადგილებაზე შეზღუდვის მოხსნაც. მთავრობის გადაწყვეტილებით, კომენდანტის საათის მოხსნა მარტიდან იგეგმება. შესაბამისად, 21:00 საათიდან დილის 5:00 საათამდე გადაადგილებაზე შეზღუდვა ძალაში რჩება. 

სად რა შეზღუდვები შემსუბუქდება და რა დარჩება უახლოეს თვეებში:

• კომენდანტის საათის მოხსნა მთელი საქართველოს მასშტაბით მარტიდან იგეგმება;
• პირველი თებერვლიდან, ბათუმში, თელავში, ზუგდიდში, ფოთსა და გორში აღდგება მუნიციპალური ტრანსპორტის, სკოლების, მაღაზიების და სავაჭრო ობიექტების მუშაობა;
• თუმცა, ამ ხუთ ქალაქში, სადაც სკოლები იხსნება, შაბათ-კვირას არ იფუნქციონირებს საზოგადოებრივი ტრანსპორტი. რესტორნები, კვების ობიექტები და მაღაზიები კი ისევ დისტანციურ რეჟიმში იმუშავებენ;
• თბილისში, რუსთავსა და ქუთაისში აღდგება სავაჭრო ობიექტების მუშაობა. ტრანსპორტის და სკოლების გახსნა პირველ მარტამდე არ იგეგმება. თუმცა, აღდგენის მიუხედავად, თებერვალში თბილისში, ქუთაისსა და რუსთავში სავაჭრო ობიექტები შაბათ-კვირას კვლავ არ იმუშავებენ, რადგან ამ დღეებში მეტია მობილობა.
• ღია და დახურული ბაზრობები საქართველოს ყველა ქალაქში 15 თებერვლიდან განაახლებენ მუშაობას;
• საბავშვო ბაღების, პროფსასწავლებლების და უნივერსიტეტების გახსნა პირველი მარტიდან იგეგმება;
• აჭარაში, პირველი თებერვლიდან დაუშვებენ კვების ობიექტებში, გარე სივრცეებში სტუმრების მიღებას;
• აკრძალული რჩება ქორწილები და ნებისმიერი დიდი წვეულების გამართვა;
• ძალაში რჩება სათხილამურო კურორტებზე დაწესებული შეზღუდვები;
• პირველი თებერვლიდან რეგულარულ ფრენებზე შეზღუდვები უქმდება.ეს ნიშნავს იმას, რომ ყველა ავიაკომპანია შეძლებს რეგულარული ფრენების დაგეგმვას და შესრულებას “გარკვეული სიხშირეებით”;
• აგრარული ბაზრები, სურსათის და ცხოველების საკვების მაღაზიები, აფთიაქები გააგრძელებენ მუშაობას ჩვეულ რეჟიმში, შესაბამისი წესების დაცვით;
• მოსახლეობას ისევ მოეთხოვება პირბადის ტარება;
• ყველა სავაჭრო ობიექტს მოეთხოვება მომხმარებელთა ნაკადებისა და რიგების მართვა, დისტანციის დაცვა.

ვიცე-პრემიერის, მაია ცქიტიშვილის თქმით, დღეიდან ბიზნესს საშუალება ექნება სპეციალურ პორტალზე დარეგისტრირდეს და პირველ მარტამდე სახელმწიფო დაფინანსებით, მისი თანამშრომლები უფასოდ გატესტოს.

“ყველა ტიპის სავაჭრო ობიექტი, 30-ზე მეტი თანამშრომლით, მათ შორის ბაზრობები ვალდებულები იქნებიან 2 კვირაში ერთხელ უზრუნველყონ თანამშრომელთა არანაკლებ 20%-ის ტესტირება.

კვების ობიექტებთან ეს მოთხოვნა არის 2 კვირაში ერთხელ თანამშრომელთა არანაკლებ 50 %-ის ტესტირება. ბუნებრივია სკოლების გახსნასთან ერთად პარალელურად სახელმწიფო უზრუნველყოფს მასწავლებელთა სისტემურ ტესტირებას 2 კვირაში ერთხელ”, – განაცხადა ცქიტიშვილმა.

________________________________

● საქართველოში კოვიდგადატანილ პაციენტებს გამოიკვლევენ. ბევრი ჩივის, რომ ვირუსმა პრობლემები დაუტოვა

● როდის და რა ვაქცინით აცრიან საქართველოს მოქალაქეებს. რა ვიცით ამ დროისთვის

● საქართველო კორონავირუსის მესამე ტალღისთვის ემზადება

________________________________

საქართველოზე მკაცრი შეზღუდვები მსოფლიოს მხოლოდ 7 ქვეყანაშია 

21 იანვარს, Oxford-ის სპეციალური ინდექსის გამოქვეყნების შემდეგ, ცნობილი გახდა, რომ პანდემიასთან დაკავშირებული შეზღუდვების სიმკაცრით საქართველო მსოფლიოში მერვე ადგილზეა. 

ინდექსი შედგენილია შემდეგი კრიტერიუმებით: გადაადგილებაზე დაწესებული შეზღუდვები, კომენდანტის საათი, საგანმანათლებლო დაწესებულებებში სასწავლო პროცესის შეჩერება და ბიზნესისთვის დაწესებული შეზღუდვები.

ინდექსის პირველი ათეული ასე გამოიყურება:

• აზერბაიჯანი – 89.8 ქულა;
• ზიმბაბვე – 87.04 ქულა;
• ერიტრეა – 86.01 ქულა;
• ირლანდია – 85.1 ქულა;
• გერმანია – 85.1 ქულა;
• ისრაელი – 85.1 ქულა;
• ვენესუელა – 84.2 ქულა;
• საქართველო – 84.2 ქულა;
• კვიპროსი – 84.2 ქულა;
• ნიდერლანდები – 84.2 ქულა;