თბილისში გარდაცვლილი იპოვეს აზერბაიჯანელი ოპოზიციონერი ბლოგერი. დეტალები

თბილისში გარდაცვლილი იპოვეს აზერბაიჯანელი ოპოზიციონერი ბლოგერი ჰუსეინ ბაკიხანოვი.

ამ ინფორმაციას ბლოგერის აზერბაიჯანელი კოლეგები, მათ შორის ჟურნალისტი აფგან მუხტარლიც ავრცელებს.

ისინი ამბობენ, რომ ახალგაზრდა კაცის ცხედარი იმ ბინაში ნახეს, სადაც იგი ცხოვრობდა.

ამავე დროს, როგორც ბაკიჰანოვის მეგობრები ამბობენ, გარდაცვალების ერთ-ერთ ვერსიად შენობიდან გადმოვარდნაც ვრცელდება.

შსს ამის შესახებ ინფორმაციას ამ დრომდე არ ავრცელებს.

ჰუსეინ ბაკიხანოვი პოლიტიკური მიგრანტი იყო აზერბაიჯანიდან, რომელიც თბილისში ცხოვრობდა და აქ თავშესაფარს ითხოვდა.

გარდაცვალებამდე რამდენიმე დღით ადრე, 12 ივლისს ბაკიჰანოვს საეჭვო ინციდენტი შეემთხვა, რომლის შესახებაც თავად მოჰყვა ვიდეოში, რომელიც იუთუბზე ატვირთა:

ვიდეოს ჰქვია “აზერბაიჯანის ხელისუფლების შეთქმულება თუ შემთხვევითობა” ჰქვია ამ ვიდეოს, სადაც ბაკიხანოვი ჰყვება, როგორ დაესხა მას თბილისის ცენტრში ხუთი აზერბაიჯანელი.

ბაკიჰანოვი ჰყვება, რომ თავდამსხმელები ორი-სამი დღის წინ გაიცნო.

“დღეს მათ მოულოდნელად შეურაცხყოფა მომაყენეს და რომ ვუპასუხე, თავს დამესხნენ,” – ჰყვება ბლოგერი.

ვიდეო სასწრაფო დახმარების მანქანაშია ჩაწერილი. ბაკიხანობვი ჰყვება, რომ თავად დარეკა 112-ში და პოლიცია და სასწრაფო გამოიძახა.

ვიდეოში ბაკიჰანოვი ამბობს, რომ არის დევნილი აზერბაიჯანიდან და სულ რამდენიმე დღე დარჩა, ვიდრე საქართველოში დევნილის ID ბარათს მიიღებს.

ამ ინციდენტს და ინფორმაციას ტელეკომპანია “ფორმულასთან” საუბარში ადასტურებს ბლოგერის ახლობელი ავთანდილ მამედოვი, რომელიც პოლიციაში უკვე იმყოფებოდა დაკითხვაზე.

მამედოვი ასევე არ გამორიცხავს, რომ ბახიკანოვის სიკვდილი აზერბაიჯანის მთავრობის ინტერესებს უკავშირდებოდეს.

როგორც გარდაცვლილის ახლობელი ჰყვება, თბილისში, თავისუფლების მოედანზე მომხდარი ჩხუბის შესახებ საუბრისას ბაკიხანოვი გამოთქვამდა ეჭვს, რომ თავდამსხმელები მას აზერბაიჯანის ხელისუფლებამ მიუგზავნა.  

როგორც მამედოვი ჰყვება, ჰუსეინ ბაკიხანოვი საქართველოში პოლიტიკურ თავშესაფარს ითხოვდა, რადგან აზერბაიჯანის მთავრობა მას სდევნიდა და სამშობლოში დაკავებულიც იყო.

ერთ-ერთი პირველი, ვინც მომხდარზე ინფორმაციას გაავრცელა იყო აზერბაიჯანელი ჟურნალისტი აფგან მუხთარლი, რომელიც ამჟამად გერმანიაში ცხოვრობს.

მუხთარლის ინფორმაციით, ბახიკანოვს აზერბაიჯანული პოლიცია სდევნიდა. მუხტარლი ასევე ჰყვება, რომ 12 ივლისს ბაკიჰანოვი “სცემეს და შემდეგ შინაგანი ორგანოების გამოკვლევაზე უარი უთხრეს”.

„12 ივლისს აზერბაიჯანელთა ჯგუფმა სცემა თბილისში მცხოვრები ემიგრანტი, რომელსაც აზერბაიჯანში პოლიცია დევნიდა. ჰუსეინმა პოლიციას და სამედიცინო შემოწმებას მიმართა. თუმცა, სამედიცინო შემოწმებამ უარი თქვა შინაგანი ორგანოების გამოკვლევაზე. ერთი კვირის განმავლობაში არ იყო სიახლე ჰუსეინისგან.

ჰუსეინ ბაკიხანოვი დააკავეს 7 მაისს ბაქოში გამართული საპროტესტო აქციის დროს. მას 15 დღიანი პატიმრობა მიუსაჯეს. მან გათავისუფლების შემდეგ ჟურნალისტებს განუცხადა, რომ იგი პოლიციამ აწამა. მან ასევე თქვა, რომ მას პოლიცია ემუქრებოდა გაუპატიურებაზე. თბილისში ყოფნისას ის მუდმივად აკრიტიკებდა აზერბაიჯანის მთავრობას, აზერბაიჯანულ მედიაში და საკუთარ არხზე”, – წერს მუხთარლი Facebook-ზე.