თავზეხელაღებულები ომში: ყარაბაღიდან რეზონანსული ვიდეო განხილვის ობიექტად იქცა

სოციალურ ქსელებში გავრცელდა ვიდეო, რომელშიც ორი სამხედრო მოსამსახურე თავს აჭრის მამაკაცს. ამტკიცებენ, რომ ვიდეო ყარაბაღის მეორე ომის დროს არის გადაღებული და მასში, აზერბაიჯანელი მეომრები სომეხ მამაკაცს კლავენ.  

• მოსაზრება: ყარაბაღში მოვლენათა განვითარების სამი სცენარი – ხედვა ბაქოდან 
• მოსაზრება: რა ელის ყარაბაღსა და სომხეთს? 

ვიდეოს დიდი გამოხმაურება მოჰყვა მთელ კავკასიაში, პირველ რიგში, აზერბაიჯანსა და სომხეთში.

რეაქცია აზერბაიჯანში 

ბევრი ამ კადრებს ყალბს უწოდებს, რომელიც სომხურმა მხარემ სპეციალურად მოამზადა აზერბაიჯანის არმიის დისკრედიტაციისთვის.

მაგრამ ბევრია ისეთი, ვინც გმობს იმას, რაც მოხდა და აზერბაიჯანის ხელისუფლებისგან ამ ფაქტის სერიოზულ გამოძიებასა და დამნაშავეების მკაცრად დასჯას მოითხოვს.

სოციალური ქსელების მომხმარებელთა კიდევ ერთი ნაწილი წერს, რომ, თუკი ასეთი რამ მართლაც მოხდა, არ შეიძლებოდა ამის გადაღება და ჩვენება.

აზერბაიჯანის გენერალურმა პროკურატურამ პირობა დადო, რომ გაერკვევა ომის დანაშაულის ყველა ფაქტში, რომელსაც ადგილი ჰქონდა ყარაბაღის მეორე ომის დროს, ორივე მხრიდან. 

სახასიათო კომენტარები სოციალური ქსელების აზერბაიჯანული სეგმენტიდან: 

„ყველა თავზეხელაღებულმა, დამნაწევრებელმა და მათ, ვინც იღებს და ავრცელებს ვიდეოს, სოციალურ ქსელებში მათთვის ტაშის დამკვრელებმა, კანონის წინაშე პასუხი უნდა აგონ. თავდაცვის სამინისტრო, გენერალურო პროკურატურავ – აცნობეთ საზოგადოებას გამოძიების შედეგები“, – დაწერა ცნობილმა ჟურნალისტმა ხადიჯა ისმაილმა.

კიდევ ერთი კომენტარი ეკუთვნის სხვა ცნობილ ჟურნალისტს, აფგან მუხთარლის, რომელიც ახლა დევნილობაში, გერმანიაში ცხოვრობს:

„ჩვენ წილად გვერგო ერთ-ერთი ყველაზე საზარელი ომი. შეურაცხყოფა, სისასტიკე და მკვლელობა ეთნიკურ ომებში ჩვეულებრივი რამ ხდება. ეთნიკური ზიზღი უკან წევს ყველაფერ ადამიანურს. ყველა ბრძოლისა და ცეცხლის შეწყვეტის რეჟიმის დარღვევის შემდეგ, მთავარი საკითხი მოწინააღმდეგის მხრიდან დაღუპულთა რაოდენობა ხდება. 

ჩვენ მოწინააღმდეგის დანაკარგები უფრო გვიხარია, ვიდრე დაბრუნებული მიწები. მტერიც ზუსტად ჩვენსავით ფიქრობს. ეთნიკურ ომებში მთავარი მიზანია, რაც შეიძლება მეტი მტრის მოკვლა. 

ჩვენ უნდა შევაჩეროთ ეს ომი, სინამდვილეში – სამამულო. არმიაში სერიოზული რეფორმები უნდა გატარდეს. არა მხოლოდ შეიარაღებისა და სწავლების მხრივ. ჯარისკაცებმა ფსიქოლოგიური მომზადების კურსი უნდა გაიარონ. 

თუკი ეს არ მოხდება, თავის მოჭრის კიდევ ბევრ სცენას ვნახავთ. არ დავივიწყოთ, რომ კონფლიქტი ჯერ კიდევ არ ამოწურულა და ყარაბაღის მესამე ომი გარდაუვალია“. 

ისეთი ადამიანის კომენტარის მაგალითი, რომელიც უშვებს, რომ ვიდეო შეიძლება ყალბი იყოს:

„ადამიანისთვის თავის მოჭრა – არც ისე მარტივია, როგორც შეიძლება იფიქროთ. ბევრი ისეთი ვიდეო, რომელიც თავის დროზე „ისლამურმა სახელმწიფომ“ გაავრცელა, გაყალბებული აღმოჩნდა. ზოგიერთი კი სპეცსამსახურებმა გადაიღეს, რომლებიც თავს ჯიჰადისტებად ასაღებდნენ. (…) რაც შეეხება „ჩვენს“ ეპიზოდს – ვერავინ ამოიცნო ამ თავზეხელაღებულებში თავისი მეზობელი ან ნათესავი“.

რეაქცია სომხეთში 

სომხეთში, ვიდეოს, დაახლოებით, ერთნაირად აფასებენ როგორც ხელისუფლების, ისე სოციალური ქსელების დონეზე: 

„აზერბაიჯანული მხრიდან არ წყდება სამხედრო ტყვეებისა და მძევლად მყოფი დაკავებული მშვიდობიანი მოსახლეობის წინააღმდეგ არაადამიანური მოპყრობის ფაქტები. მათ სასტიკად აწამებენ და ცოცხლად აჭრიან თავს. ზუსტად ისე, როგორც ახლო აღმოსავლეთში, „ისლამური სახელმწიფო“ ეპყრობოდა ტყვეებს“, – განაცხადა სომხეთის საგარეო საქმეთა მინისტრმა არა აივაზიანმა მოსკოვში, 8 დეკემბერს, რუს კოლეგასთან, სერგეი ლავროვთან გამართული შეხვედრის შემდეგ. 

სომხეთის ომბუდსმენმა არმან ტატოიანმა განაცხადა, რომ უკვე მოამზადა ხუთი ანგარიში ომის დანაშაულთან დაკავშირებით და საერთაშორისო სტრუქტურებისთვის მათ წარდგენას გეგმავს.