სუს-ის ფაილები: რას ამბობენ სასულიერო პირები

სუს-ის ფაილები საპატრიაქროზე

საქართველოში სუს-ის საიდუმლო ფაილების გავრცელების კომენტარი გააკეთეს სხვადასხვა სასულიერო პირებმა და მაღალმა იერარქებმა, ხოლო თავად საპატრიარქოს პრესსამსახურში ამბობენ, რომ ეკლესიის ფაქტორით არჩევნებში მანიპულიაციას ცდილობენ, ამის შესახებ საპატრიარქოს საზოგადოებასთან ურთიერთობის სამსახურის უფროსმა, ანდრია ჯაღმაიძემ განაცხადა.

მისი თქმით, საპატრიარქოს ხელი არ მიუწვდება აღნიშნულ მასალებზე. ჯაღმაიძე მედიას მიმართავს, რომ თუ შესაძლებელია, ფაილები გადასცენ.

“სავარაუდო უკანონო მოსმენების, უკანონო გატანის და შემდეგ სავარაუდო უკანონო გასაჯაროების დეტალები, გამოძიებულ უნდა იქნას და როდესაც მეტნაკლები სიცხადე გამოიკვეთება ამ საკითხში, შემდგომ იქნება შესაძლებელი, რაიმე დასკვნების, ან კომენტარების გაკეთება, მანამდე ბევრი რამ ბუნდოვანია და ერთმანეთში აზელილია ტყუილ-მართალი”, – აღნიშნავს ჯაღმაიძე.

პატრიარქის გარემოცვის ერთ-ერთი უახლოესი წევრი და მცხეთის ჯვრის მონასტრის წინამძღვარი, კონსტანტინე ჭინჭარაული ადასტურებს, რომ სუს-ის ფაილები მასსა და მის ძმას, დავით ჭინჭარაულს შორის საუბარს ასახავს. 

ჭინჭარაულის განმარტებით, საუბარი ჯვრის მონასტრის მიმდებარე ტერიტორიაზე პრობლემას ეხებოდა, ხოლო დახმარებისთვის მან ირაკლი კობახიძეს მიმართა, რომელიც მაშინ პარლამენტის თავმჯდომარე იყო.

“უფრო სუს არ არის, უფრო არის სსს – სახელმწიფო საშიშროების სამსახურია. თუ უსმენს ყველა ადამიანს, ეს უსაფრთხოება აღარ არის, საშიშროებაა. სახელმწიფო საშიშროებად არის გადაკეთებული”, – აღნიშნავს სასულიერო პირი.

ვაკის მაცხოვრის ფერისცვალების სახელობის ტაძრის წინამძღვარი, შალვა კეკელია ამბობს, რომ საშინელებაა, როცა ადამიანს მისი ნებართვის გარეშე უსმენენ, თუმცა ამატებს, რომ მისთვის მისაღებია, მის ცხოვრებას დააკვირდნენ:

“ერთადერთი, რასაც ვითხოვ, ის არის, რომ აღსარების დროს არ მოგისმინონ, იმიტომ, რომ ადამიანი სულს გაბარებს და ძალიან მძიმეა, იქ ადამიანმა მოსმენა დაგიწყოს. თორემ ადამიანი ჩემს ცხოვრებას რომ დააკვირდეს, ეს ჩემთვის მიუღებელი არ არის.

ჩემი პირადი რამის გაშუქების არ მეშინია, ერთადერთი – საპირფარეშოში არ გადამიღონ, საძინებელში არ გადამიღონ და აბანოში არ გადამიღონ.”

საქართველოს პატრიარქთან და წმინდა სინოდთან დაპირისპირებული, მღვდელმთავრობიდან განყენებული პეტრე ცაავა ამბობს, რომ სავარაუდოდ, სუს-ის მიერ სასულიერო პირებზე ჩანაწერების მომზადება არჩევნებს უკავშირდება, მისი თქმით, სახელმწიფომ “რეპრესიული მანქანა აამუშავა:

“წინასაარჩევნოდ, გაოგნებული ვიყავი რამდენიმე სასულიერო პირის პოზიციით. ვფიქრობდი, რა დონეზე ჰყავს ხელისუფლებას ალბათ მძევლად, რომ ამას აკადრებინებს, რა დონეზე არიან მძევლად, რომ დუმან ამ უსამართლობის გამო რაც საქართველოში ხდება”, – თქვა მეუფე პეტრემ.

მისი განმარტებით, როდესაც ხელისუფლება გაკოტრდა, განსაკუთრებით 2020 წლის არჩევნების შემდეგ და აბსოლუტური ნდობა დაკარგა, რეპრესიული მანქანა უფრო მეტად ამუშავდა, მათ მოინდომეს თავის უფრო მეტად გადაზღვევა:

“შეიძლება იყო მოთხოვნა, რომ პირადად პატრიარქი გამოსულიყო და განცხადება გაეკეთებინა და ღიად დაეჭირა მხარი ხელისუფლებისათვის. ხელისუფლება და კრემლი ხედავს, რომ ხალხს არ აქვს ნდობა და დაკარგულია მათი დასაყრდენი. ამიტომ ერთადერთი გამოსავალი არის ეკლესია, თუმცა ისიც გაშიშვლებული, გაკოტრებული, მხილებული.”

ახალქალაქისა და კუმურდოს მიტროპოლიტი, მეუფე ნიკოლოზ ფაჩუაშვილი, რომელზეც სუს-ის მასალებში იყო საუბარი – თითქოს ის გარკვეული თანხის სანაცვლოდ რუსეთის სპეცსამსახურებს ლუგარის ლაბორატორიის შესახებ ინფორმაციას აწვდიდა – ამბობს, რომ ამ ყველაფერზე პასუხისმგებელი სახელმწიფოა:

“მე რა ცოდვები მაქვს ჩადენილი და რა დანაშაული მაქვს ჩადენილი, ამას გამოიგონებ, თუ ასეთი ფორმით გაავრცელებ, არავითარი განსხვავება არ არის. შენ შეგიძლია ადამიანს უთხრა ეგეთი რამე, რომ თუ შენ არ ითანამშრომლებ ჩემთან, მე შენ ცუდ რამეს გაგიკეთებ, მოვიგონებ ამას თუ სხვა რამეს ვიზამ, ამას არავითარი მნიშვნელობა არ აქვს”

● ეკლესია და Pfizer-ი: რატომ ჩააგდო საქართველომ ვაქცინაციის კამპანია
● საპატრიარქოს კაპიტალი. რა ქონებას ფლობს ყველაზე გავლენიანი ინსტიტუტი საქართველოში?
● დასავლეთი თუ რუსეთი? საით მიყავს ქვეყანა ქართულ ეკლესიას

13 სექტემბერს საქართველოში სუს-ის საიდუმლო ფაილები გავრცელდა. დოკუმენტებიდან ირკვევა, რომ სახელმწიფო უსაფრთხოების სამსახური უსმენს და უთვალთვალებს სინოდის წევრებს, პატრიარქის მოსაყდრეს, მღვდელმთავრებს, პატრიარქის თანაშემწეებს, ეპისკოპოსებს, მონაზვნებს და მათთან დაკავშირებულ პირებს. 

როგორც აღმოჩნდა, სუს-ი აკონტროლებს სასულიერო პირების გადაადგილებას, საბანკო გადარიცხვებს და პირად ცხოვრებას. ათასობით ფაილში ასევე არის ინფორმაცია იმ ადამიანების შესახებაც, ვისი საშუალებითაც ესა თუ ის სასულიერო პირი უნდა გადაებირებინათ. დოკუმენტებში ინფორმაცია გვხვდება იმ მღვდლებზე, ვინც ნარკოდამოკიდებულია ან კრიმინალებთან მეგობრობს.

ფაილებში ასევე ვკითხულობთ, რომ “ოპერატიული მუშაობის პროცესში გამოვლინდა – 36 არატრადიციული სექსუალური ორიენტაციის მღვდელმსახური, მანდილოსნებთან სექსუალურ ურთიერთობაში შემჩნეული 23 სასულიერო პირი (მათ შორის, მონაზვნები), 21 სასულიერო პირი, რომლებიც მოიხმარენ ნარკოტიკულ საშუალებებს.

მასალების ავთენტიკურობა ამ ეტაპზე დადასტურებული არ არის.