სუს: გამოძიება ტერაქტის მომზადების ფაქტზე მიმდინარეობს - ივანიშვილის მკვლელობას ამზადებდნენ
სუს-ი ივანიშვილის მკვლელობაზე
საქართველოს სახელმწიფო უსაფრთხოების სამსახურის ცნობით, მიმდინარეობს გამოძიება ტერორისტული აქტის მომზადების და სახელმწიფო ხელისუფლების დასამხობად შეთქმულების ფაქტზე.
როგორც უწყებაში განმარტავენ, უსაფრთხოების სამსახური იძიებს უკრაინაში მყოფი, საქართველოს ხელისუფლების ყოფილი მაღალჩინოსნებისა და ძალოვანი უწყებების ყოფილი თანამშრომლების ორგანიზებით და დაფინანსებით, საქართველოში დანაშაულებრივი ქმედებების, “მათ შორის, პარტია ქართული ოცნების საპატიო თავმჯდომარის”, ბიძინა ივანიშვილის მკვლელობის მომზადების ფაქტებს.
“ხსენებული დანაშაულებრივი ქმედებების მიზანია, ქვეყანაში არეულობის მოწყობის და ხელისუფლების დასუსტების ფონზე, დესტრუქციული ძალების მიერ სახელმწიფო ხელისუფლების ძალადობრივი გზით დამხობა.
სისხლის სამართლის საქმეზე მიმდინარეობს აქტიური საგამოძიებო და ოპერატიულ-სამძებრო ღონისძიებები, რომლის ფარგლებში ხდება კონკრეტულ პირთა საგამოძიებო ორგანოში დაბარება მათი მოწმის სახით გამოკითხვის მიზნით.” – აცხადებს სუს-ი.
გამოძიება მიმდინარეობს საქართველოს სსკ-ის 18-323-ე მუხლის პირველი ნაწილით და 315-ე მუხლის პირველი ნაწილით, რაც 10-დან 15 წლამდე თავისუფლების აღკვეთას ითვალისწიმებს.
ირაკლი კობახიძე: “ტერაქტთან დაკავშირებით ევროკომისარმაც გამაფრთხილა”
პრემიერმინისტრმა და მმართველი გუნდის საარჩევნო შტაბის ხელმძღვანელმა ირაკლი კობახიძემ ბრიფინგზე განაცხადა, რომ ტერაქტთან დაკავშირებით ის ევროკომისარმაც გააფრთხილა. მისი თქმით, “კოლექტიური ნაცმოძრაობა” საარჩევნოდ პროვოკაციებს გააგრძელებს.
რა თქმა უნდა, ეს ინფორმაცია ძალიან შემაშფოთებელი, მით უმეტეს, იმ ფონზე, რაც ხდება ზოგადად მსოფლიოში, თქვენ ხედავთ ბოლო პერიოდის განმავლობაში განხორციელდა ორი ტერორისტული აქტი – ერთი სლოვაკეთში, მეორე ამერიკის შეერთებულ შტატებში, ეს არის საერთო ხელწერა, რომელიც ახასიათებს ერთი და იგივე გლობალურ პოლიტიკურ ძალებს.
აქედან გამომდინარე, რა თქმა უნდა, საფრთხეები არსებობს და ეს გამოძიება, რომელიც არის დაწყებული, მიანიშნებს იმაზე, რომ საქართველოსთვისაც ეს საფრთხეები არის აქტუალური.
თქვენ გახსოვთ სატელეფონო საუბარი, რომელიც შედგა ერთერთ ევროკომისართან, მოგვიანებით ევროკომისარმა თავადვე აღიარა, რომ ჰქონდა ერთგვარი გაფრთხილება ტერაქტთან დაკავშირებით, ანუ ჰქონდა ეს აღიარება, მან რომ გამაფრთხილა ტერაქტთან დაკავშირებით, ამაზე იყო რეალურად საუბარი მისი მხრიდანაც, უბრალოდ მან თქვა, პოლარიზაცია იქნებოდა ის, ვინც ისროდა ტყვიას. თქვენ მოგეხსენებათ, რომ პოლარიზაცია ტყვიებს არ ისვრის, ტყვიებს ისვრიან ქილერები.
გაფრთხილებაც არსებობდა, ეს არ იყო, რა თქმა უნდა, პირადად ევროკომისრის გაფრთხილება, ის გამოიყენეს ერთგვარ “მესინჯერად” იმისთვის, რომ მოეწოდებინა შესაბამისი ინფორმაცია ჩვენამდე. რა თქმა უნდა, ეს არის შემაშფოთებელი, ვიღაცებს არ მოსწონთ ის პოზიცია, რომელიც უკავია საქართველოს ომთან მიმართებით, ასეთ პირობებში, რა თქმა უნდა, საფრთხეები არსებობს.” – ამბობს კობახიძე.
გამოხმაურება
სუს-ის სცენარი გადატრიალების შესახებ უცვლელია! – ის, რაც ახლა „ქართული ოცნების” პროპაგანდას ძალაუფლების შესანარჩუნებლად ყველაზე მეტად სჭირდება, შიშის დანერგვაა, – ასე ეხმაურება სახელმწიფო უსაფრთხოების სამსახურის განცხადებას პარლამენტის ოპოზიციონერი წევრი თეონა აქუბარდია.
აქუბარდიას თქმით, 2014 წლიდან მოყოლებული, როდესაც შს მინისტრმა ჭიკაიძემ “საბურავების რევოლუცია” დააანონსა, სახელმწიფო გადატრიალების საქმეზე გამოძიება არაერთხელ დაიწყო, მაგრამ არ დასრულებულა. როგორც აქუბარდიამ აღნიშნა, ასეთი გამოძიება შარშან შემოდგომაზეც დაიწყო.
“მთელმა მსოფლიომ იხილა 2-თვიანი მშვიდობიანი პროტესტი “რუსული კანონის” წინააღმდეგ, ისევე როგორც დღეს მიმდინარეობს მშვიდობიანი მზადება არჩევნების გზით რუსეთის ინტერესების გატარებაში მყოფი მმართველი პარტიის შეცვლისა.
ასევე საგულისხმოა “ოცნების” პროპაგანდა ამ საქმესთან დაკავშირებით გლობალური ომის პარტიასთან დაკავშირებით, რითაც ისინი დასავლეთის მტრობაზე აკეთებენ მორიგად აქცენტს. პრემიერი დაჟინებული აგრძელებს პროპაგანდას ევროკომისრის მიერ მისი სიცოცხლისთვის საფრთხის შექმნის შესახებ, მიუხედავად სუს-ის უფროსის მიერ გაკეთებული განცხადებისა ამ საქმის უსაფუძვლობის შესახებ.
ფაქტი ერთია: – მშვიდობა მოაქვს ევროპულ ოჯახში გაერთიანებას, სადაც ომები არ არის, ხოლო ნგრევა და უბედურება რუსეთს, რომელზეც აკეთებს ფსონს “ქართული ოცნება.” – განაცხადა თეონა აქუბარდიამ.
ბოლო რამდენიმე დღეა, სახელმწიფო უსაფრთხოების სამსახური უკრაინაში მებრძოლ ქართველებსა და ომის ვეტერანებს გამოკითხვაზე იბარებს. გამოკითხულთა შორის ქართული ლეგიონის უკრაინაში მებრძოლი წევრი ნადიმ ხმალაძე, ანტისაოკუპაციო მოძრაობის აქტივისტი ლაშა ჭიღლაძე და ომის ვეტერანები, ბესო ბენდელიანი, ვაჟა ცეცაძე, გელა კახაბრიშვილი და კონსტანტინე ჯღამაია არიან.
23 ივლისს სამთავრობო მედიებიებმა, “POS TV”, “რუსთავი 2”, “იმედი” და “საზოგადოებრივი მაუწყებელი” განაცხადეს, რომ სუს-ში დაწყებული გამოძიება, რომლის ფარგლებშიც უკრაინაში მებრძოლი ქართველები და ვეტერანები იკითხებიან.
მედიების ვარაუდები ეყრდნობა 23 ივლისს, სახელმწიფო უსაფრთხოების სამსახურში გამოკითხვიდან გამოსული ქართველი მებრძოლის, გელა კახაბრიშვილისა და მისი ადვოკატის, მიხეილ რამიშვილის განაცხადებას, რომლის მიხედვით, გამოძიება სუს-ში მათ შორის იმაზე მიმდინარეობს, რომ თითქოს, ბიძინა ივანიშვილისა და “ქართული ოცნების” სხვა ლიდერების წინააღმდეგ ტერორისტული აქტის განხორციელება და ამ გზით ხელისუფლების გადატრიალება იგეგმება.
საბოლოო ჯამში, სუს-ში დაბარებულთა რაოდენობა ბოლო ერთი კვირის განმავლობაში, 10-მდე გაიზარდა.
როგორც უკრაინაში მებრძოლი “ქართული ლეგიონის” მეთაურმა მამუკა მამულაშვილმა გამოცემა The The Insider-ს განუცხადა, საქართველოში უკრაინაში მებრძოლი 300-მდე ადამიანი იძებნება, მისივე თქმით, მათი უმეტესობა ახლა უკრაინაშია. ამასთან, მამულაშვილმა ხაზგასმით აღნიშნა, რომ ხმალაძესა და ჭიღლაძეს არ იცნობს და ისინი, სავარაუდოდ, სხვა დანაყოფების შემადგენლობაში იბრძოდნენ.
“ქართული ოცნების” ფრაქციის თავმჯდომარე მამუკა მდინარაძე ტერორიზმისა და სახელმწიფო გადატრიალების მუხლებით მიმდინარე გამოძიებას გამოეხმაურა და განაცხადა, რომ “თურმე”, გეგმავდნენ ივანიშვილისა და ოცნების ლიდერების მკვლელობას.
