სოსო გოგაშვილი ამბობს, რომ "ოცნებამ" დანიშნა ელჩები, რომლებიც აგენტურულ ბაზაში ირიცხებოდნენ

სოსო გოგაშვილი ამბობს

პატიმრობაში მყოფი სახელმწიფო უსაფრთხოების სამსახურის ხელმძღვანელის ყოფილი მოადგილის, სოსო გოგაშვილის თქმით, მმართველმა პარტიამ “პატრონების” გამო დანიშნა ორი ელჩი, რომლებიც რუსეთის აგენტურულ ბაზაში ირიცხებოდნენ. გოგაშვილის ინფორმაციით, კანდიდატებიდან ერთ-ერთის რეკომენდატორი “ქართული ოცნების” პროპაგანდისტი, რეჟისორი გოგა ხაინდრავა იყო.  

როგორც სუს-ის ყოფილი მაღალჩინოსნის წერილში ვკითხულობთ, დანიშნული ელჩების გადანიშვნის დრო, სავარაუდოდ, მიმდინარე პერიოდშია – გოგაშვილი პრეზიდენტის წარმომადგენელს ან დეპუტატებს, რომელთაც ინფორმაციაზე წვდომა აქვთ, კონკრეტული გვარების მიწოდებას სთავაზობს.  

გოგაშვილის მტკიცებით, მისი სუს-ში მუშაობის პერიოდში, საგარეოდან კონტრდაზვერვაში გადაიგზავნა სტანდარტულად ელჩად დასანიშნი კანდიდატების სია, რომლის გადამოწმების შედეგად აღმოჩნდა, რომ ორი მათგანი ირიცხება აგენტურულ ბაზაში (სუკი). სოსო გოგაშვილის განმარტებით, მან გასცა დავალება შეეჩერებინათ მათი დანიშვნა, დანარჩენების სია კი საგარეო საქმეთა სამინისტროში გადაგზავნა.

“დაბლოკილმა კანდიდატებმა გაჭიანურების შემდეგ მოიკითხეს საგარეო საქმეთა სამინისტროში თუ რა ხდებოდა, სადაც უთხრეს, რომ გოგაშვილმა დაბლოკა ისინი. მათ ბუნებრივია შეაწუხეს თავის “პატრონი”, რომელმაც დიდი აჟიოტაჟი ატეხა, დაურეკა ივანიშვილსა და კვირიკაშვილს. დამიბარა ჩემმა უფროსმა, გომელაურმა და მომთხოვა თუ რა მიზეზით მყავდა დაბლოკილი ელჩობის კანდიდატები. “შეფმა ცალკე დამირეკა და კვირიკაშვილმა ცალკე ამ საქმეზეო” – თქვა გომელაურმა. ერთის რეკომენდატორი ყოფილა გოგა ხაინდრავა და დეტალურად გამირკვიე რა ხდებაო. მე მას ავუხსენი ყველაფერი და გავაცანი ოპერატიული ცნობა აგენტების შესახებ, მან მითხრა, რომ ცნობა დამეხია და ორივეზე გამეშვა თანხმობა საგარეო საქმეთა სამინისტროში, რაც მე შესაბამისად შევასრულე.” – წერს გოგაშვილი.

● პოლიტპატიმარი თუ დამნაშავე? რა ვიცით სოსო გოგაშვილის საქმეზე
● აზერბაიჯანელი ჟურნალისტი საქართველოს “ჩრდილოვანი მმართველის” წინააღმდეგ
● “ვაგროვებთ კომპრომატებს” – გავრცელდა საიდუმლო ფაილები, სადაც სუს-ი მღვდელმთავრებს უსმენს

საქართველოს სახელმწიფო უსაფრთხოების სამსახურის უფროსის ყოფილი მოადგილე, სოსო გოგაშვილი 15 ივლისს, ღამით დააკავეს. დაკავების ამსახველი ვიდეო მისმა ცოლმა გაავრცელა – ვიდეოში ჩანს, როგორ შედის სპეცრაზმი სახლში, გოგაშვილს იატაკზე აწვენს და აკავებს. 

18 ივლისს თბილისის საქალაქო სასამართლომ სოსო გოგაშვილს აღკვეთის ღონისძიებად პატიმრობა შეუფარდა.  

სუს-ის ყოფილ მაღალჩინოსანს სამი ბრალდება აქვს წარდგენილი:

• მოხელის მიერ სამსახურებრივი უფლებამოსილების გადამეტება, რამაც სახელმწიფოს კანონიერი ინტერესის არსებითი დარღვევა გამოიწვია;
• პირადი ინფორმაციის უკანონოდ შენახვა-მოპოვება-გავრცელება;
• ცეცხლსასროლი იარაღის მართლსაწინააღმდეგო შეძენა და შენახვა.

გარდა ამისა, 12 სექტემბერს, გოგაშვილის ოჯახს დაუყადაღეს ქონებაც.

დაკავებამდე გოგაშვილმა განაცხადა, რომ არჩევნების გაყალბების სქემები არასამთავრობო ორგანიზაციებს და დიპლომატიურ კორპუსს გადასცა.

უკვე 21 ივლისს, არასამთავრობო ორგანიზაციებმა გოგაშვილის მიწოდებული მასალები გაასაჯაროვეს. დოკუმენტებში ნათქვამია, რომ კვლევის საფუძველზე გამოიკვეთა მმართველი პარტიის სასარგებლოდ არაკანონიერი გზებით ამომრჩევლის ხმების მობილიზების მასშტაბური სქემა.

გოგაშვილის საქმიანობა სახელმწიფო უსაფრთხოების სამსახურში რამდენიმე გახმაურებულ საქმეს უკავშირდება. მაღალჩინოსანი 2017 წელს პანკისის ხეობაში ჩატარებულ სპეცოპერაციას ხელმძღვანელობდა, რა დროსაც 19 წლის თემირლან მაჩალიკაშვილი მოკლეს.