ფუფუნების საფასური: სომხეთში მკვეთრად გაიზარდა უძრავი ქონების გადასახადი
სომხეთში, ქონების გადასახადის სისტემის შეცვლა გადაწყვიტეს. პარლამენტმა მეორე და საბოლოო მოსმენით უკვე მიიღო შესაბამისი ცვლილებები საგადასახადო კოდექსში.
ის ძალაში ეტაპობრივად, 2021 წლიდან შევა. ექვსი წლის განმავლობაში, გადასახადი 5-6-ჯერ გაიზრდება, ძვირადღირებულ ბინებსა და სახლებზე – ათჯერ.
ამ თემას ახლა ყველაზე აქტიურად განიხილავენ სოციალურ ქსელებში. შესწორების მოწინააღმდეგეებმა Facebook-ზე ფლეშმობსაც კი გაუწიეს ორგანიზება. მმართველი ბლოკის დეპუტატები არა მხოლოდ პასუხობენ მის მონაწილეებს სოციალურ ქსელებში, არამედ მათთან პარლამენტში შეხვედრასა და განმარტებების გაკეთებასაც აპირებენ.
ყველა დეტალი – ვინ რამდენს გადაიხდის ახლა და 2026 წელს.
● ვის და რა დახმარებას უწევენ სომხეთში, კორონავირუსის ეკონომიკური შედეგების დასაძლევად
● ბრძოლა კორუფციასთან და ოლიგარქებთან: როგორ შეიცვალა სომხეთი რევოლუციიდან ორი წლის შემდეგ
ცვლილებების შესახებ
ახლა, სომხეთში, ქონების საკმაოდ დაბალი გადასახადია დაწესებული, რომელიც საცხოვრებლის საკადასტრო ფასის მიხედვით გამოითვლება. მიღებული პროექტის თანახმად, უძრავ ქონებაზე გადასახადი ახლებურად დაითვლება – მისი საბაზრო ფასით.
ფინანსთა მინისტრის მოადგილემ, არმან პოღოსიანმა განაცხადა, რომ სომხეთში უძრავი ქონების გადასახადი პოტენციალთან შედარებით 5-7-ჯერ ნაკლებად არის შეფასებული. მისი თქმით, პრობლემა ისაა, რომ საკადასტრო ღირებულებით დადგენილი გადასახადი, საბაზრო ფასთან შედარებით რამდენჯერმე დაბალია. რაც შეეხება გადასახადებს, ის „მოქალაქეებს დაუბრუნდება ხარისხიანი მომსახურების სახით“, რადგან საგადასახადო შემოსავლები ბიუჯეტისკენ იქნება მიმართული, ამტკიცებს მინისტრის მოადგილე.
ხელისუფლება აცხადებს, რომ ახალი სისტემის დანერგვის მეოთხე წელს, ქონების გადასახადისგან მიღებული შემოსავალი თითქმის 5-ჯერ გაიზრდება. ახლა ის 9 მილიარდ დრამს (დაახლოებით 19 მილიონ დოლარს) შეადგენს.
ცვლილებები ეტაპობრივად განხორციელდება – ექვსი წლის განმავლობაში. 2021 წელს, მოსახლეობა გადასახადის 25%-ს გადაიხდის, 2022 წელს – 30%, 2023 წელს – 35%, 2024 წელს – 50%, 2025 წელს – 75% და მხოლოდ 2026 წელს გადაიხდიან მოქალაქეები სრულ თანხას.
მიღებული ცვლილებების შესახებ კომენტარი გააკეთა მმართველი ბლოკის, „ჩემი ნაბიჯის“ წევრმა, არმან ეგოიანმა:
„ქონების გადასახადის ახალ შკალაში, გაანგარიშების საფუძვლად აღებული იქნება ქონების საბაზრო ღირებულების 80%. სხვა სიტყვებით რომ ვთქვათ, თუკი ბინის საბაზრო ფასი 50 მილიონი დრამია (100 ათას დოლარზე მეტი), მაშინ მოგიწევთ გადაიხადოთ 40 მილიონი დრამის ღირებულების ქონების გადასახადი“.
რადგან მიღებულ ცვლილებებს საზოგადოებაში დიდი გამოხმაურება მოჰყვა და სოციალურ ქსელებში ყველაზე განხილვადი თემა გახდა, დეპუტატებმა შკალა წარმოადგინეს, რომლითაც შეიძლება არა მხოლოდ იმის გარკვევა, რა თანხის გადახდა მოგიწევთ საკუთარი ქონებისთვის, არამედ იმის გაგებაც, რამდენი საცხოვრებელია ქვეყანაში და რა ღირს.
არმან ეგოიანმა ადამიანების ყურადღება იმისკენ მიაპყრო, რომ ქვეყანაში არც ისე ბევრი ძვირადღირებული სახლია, რომლისთვისაც დიდი გადასახადის გადახდა მოუწევთ ადამიანებს:
„ბევრი საუბარი იყო ასტრონომიული ღირებულების მქონე საცხოვრებლებზე, რომლებიც მარტოხელა პენსიონერებს ეკუთვნის. როგორ ფიქრობთ, ამ 10 000 ბინიდან (საუბარია იმ საცხოვრებლებზე, რომლებიც 60 მილიონ დრამად და მეტად ფასდება – JAMnews), რამდენი ეკუთვნის მარტოხელა პენსიონერებს და რამდენი დაქირავებულ მუშაკებსა და ბიზნესმენებს, რომელთა საშემოსავლო გადასახადი და მოგების გადასახადი ამ წელს შემცირდა 5 და 1 პროცენტით (და შემცირდება ერთი პროცენტით შემდეგ წელსაც)“.
რას ამბობს ოპოზიცია
მიღებული ცვლილებები მკვეთრად გააკრიტიკა საპარლამენტო ოპოზიციამაც. მათი აზრით, ეს წინადადება, განსაკუთრებით კორონავირუსის პანდემიის პირობებში, მხოლოდ აუარესებს მოქალაქეთა სოციალურ მდგომარეობას.
„შემოთავაზებული ცვლილებების თანახმად, ქონების გადასახადი იზრდება საშუალოდ 3-4-ჯერ და არ იქნება ქონება, რომელზეც ის არ გავრცელდება – გაზრდის თვალსაზრისით. ამას გარდა, კანონში არ არის გათვალისწინებული სოციალური კომპონენტი“, – მიაჩნია ფრაქცია „განათებული სომხეთის“ დეპუტატს, მანე ტანდილიანს.
ფლეშმობი გადასახადების წინააღმდეგ
26 ივნისიდან, Facebook-ის სომხური სეგმენტის მომხმარებლებმა მიღებული ცვლილებების წინააღმდეგ ფლეშმობი წამოიწყეს.
მას შეუერთდნენ ქვეყანაში ცნობილი ჟურნალისტები, მსახიობები და საზოგადო მოღვაწეები.
ფლეშმობის მონაწილეები საკუთარ გვერდზე პირად ფოტოებს აქვეყნებენ და ერთი და იმავე ტექსტს აწერენ:
„ძვირფასო, ძირძველო ერევნელებო, თუკი თქვენ არ ისაუბრებთ საკუთარი უფლებების შესახებ, ხვალ იძულებული გახდებით დაკარგოთ თქვენი ბინები და სახლები. ეს არის უძრავი ქონების გასხვისების ან ექსპროპრიაციის ახალი „ფორმა“, რომელიც მემკვიდრეობით მივიღეთ. იფიქრეთ თქვენი შვილების მომავალზე. შემოუერთდით ამ ფლეშმობს, გამოაქვეყნეთ საკუთარი ფოტოსურათი და ეს ტექსტი ფეისბუკის პირად გვერდზე: „ქონების ახალი გადასახადი საკუთრებას დააკარგვინებს ძირძველ ერევნელებს. მე ძირძველი ერევნელი ვარ და ეს ჩემი ქალაქია“.
ფლეშმობი შეუმჩნეველი არ დარჩენილა. დეპუტატმა მმართველი ფრაქცია „ჩემი ნაბიჯიდან“, ბაბკენ ტუნიანმა მაშინვე მოახდინა მასზე რეაგირება და მისი მონაწილეები პარლამენტში მიიწვია.
Facebook-ის საკუთარ გვერდზე, მან ცვლილებების მონაწილეებს 5-7-კაციანი ჯგუფის შექმნა შესთავაზა, რომელიც საერთო მოსაზრებას წარმოადგენს. ამავდროულად, დეპუტატმა ყველა გააფრთხილა, რომ განხილვა იქნება საჯარო და პატიოსანი:
„მე, პირადად, არ ვყოფ ადამიანებს ძირძველებად და არაძირძველებად: კანონი ყველასთვის ერთნაირია. ჩემი შეთავაზება მიმართულია მათკენ, ვისაც საკუთარი თავი ძირძველ ერევნელად მიაჩნია და ფიქრობს, რომ ამ გარემოებამ რაიმე როლი უნდა შეასრულოს ამ საკითხში“.
