სომხეთის თავდაცვის სამინისტროს მრჩევლად აშშ-ს არმიის წარმომადგენელი იმუშავებს
აშშ-ის წარმომადგენელი სომხეთის თავდაცვის სამინისტროში
აშშ-ის არმიის მუდმივი წარმომადგენელი მალე სომხეთის თავდაცვის სამინისტროში მრჩევლად დაიწყებს მუშაობას. პირველი, ვინც ამის შესახებ ისაუბრა, იყო აშშ-ის სახელმწიფო მდივნის მოადგილე სამოქალაქო უსაფრთხოების, დემოკრატიისა და ადამიანის უფლებების საკითხებში, აზრა ზეია. მან ასევე განაცხადა, რომ “სომხეთის წევრობა რუსეთის თავმჯდომარეობით მოქმედ ОДКБ-ში არ არის დაბრკოლება ვაშინგტონთან თავდაცვის ღრმა თანამშრომლობისთვის”.
სომხეთში აშშ-ის საელჩოში აცხადებენ, რომ მრჩეველი სამუშაოს დაწყებას უახლოეს თვეებში დაიწყებს. ერევანს ჯერ არ დაუკონკრეტებია, რა საკითხებზე ელის ამერიკელი მრჩეველის კონსულტაციებს.
შეიარაღებული ძალების რეფორმისთვის აუცილებელია კონსულტაციები, განმარტა თავდაცვისა და უსაფრთხოების საკითხთა საპარლამენტო კომისიის თავმჯდომარემ ანდრანიკ ქოჩარიანმა. მისივე თქმით, მოსალოდნელია კონსულტაციები ბევრ საკითხზე – არმიის მართვის უნარებიდან დაწყებული, ახალი ტიპის იარაღის შეძენამდე. დეპუტატის თქმით, განიხილება საფრანგეთიდან მრჩევლის ჩართულობაც.
“ჯერ ვერ გეტყვით, რა შეთანხმებები იქნა მიღწეული. მაგრამ საქმე იმაშია, რომ საჭიროების შემთხვევაში მრჩევლებს საფრანგეთიდან, აშშ-დან და შესაძლოა დიდი ბრიტანეთიდან შეუძლიათ რჩევების მოცემა. ამას განსაზღვრავს თანამშრომლობის დონე და პერსპექტივა, რომელსაც ის ხსნის ჩვენს შეიარაღებულ ძალებში რეფორმებისთვის“, – ხაზგასმით აღნიშნა ქოჩარიანმა.
„მრჩეველი ხელს შეუწყობს სომხეთის თავდაცვის ინსტიტუტების გაძლიერებას“
ამერიკელი მრჩევლის საქმიანობის შესახებ ჟურნალისტების კითხვაზე, სომხეთში აშშ-ის საელჩომ უპასუხა:
“კონსულტაციების საშუალებით აშშ აპირებს სომხეთს მხარი დაუჭიროს უსაფრთხოების მენეჯმენტის გაუმჯობესებაში, რაც, თავის მხრივ, ხელს შეუწყობს სომხურ-ამერიკული ურთიერთობების განმტკიცებას“.
ასევე ვრცელდება ინფორმაცია, რომ კონსულტანტი სომხეთში იმუშავებს სახელმწიფო დეპარტამენტის გლობალური თავდაცვის რეფორმის პროგრამის ფარგლებში:
”პროგრამა მხარს უჭერს პარტნიორ ქვეყნებს მთელს მსოფლიოში უფრო გამძლე, ეფექტური და ანგარიშვალდებული უსაფრთხოების ინსტიტუტების აშენებაში – სტრატეგიული დონის საკონსულტაციო მხარდაჭერით.”
ამ ინიციატივას დააფინანსებს არა აშშ-ის არმია ან თავდაცვის დეპარტამენტი, არამედ სახელმწიფო დეპარტამენტი.
კომენტარი
მმართველი ფრაქციის “სამოქალაქო ხელშეკრულების“ დეპუტატი, თავდაცვისა და უსაფრთხოების საკითხთა კომისიის თავმჯდომარე ანდრანიკ ქოჩარიანი მრჩევლების ინსტიტუტს უაღრესად მნიშვნელოვანად მიიჩნევს. მან გაიხსენა, რომ “ერთ დროს სომხეთში ОДКБ-ს სამხედრო ბლოკის მრჩევლებიც ჩამოვიდნენ“. თუმცა, ქვეყანამ უკვე გაყინა ამ ორგანიზაციაში სომხეთის ჩართულობა, ამიტომ თავდაცვის სამინისტრო ამ სტრუქტურისგან კონსულტაციებს აღარ იღებს.
ქოჩარიანმა ხაზგასმით აღნიშნა, რომ ერევანი ახორციელებს დივერსიფიკაციის პოლიტიკას, რომლის ფარგლებშიც უნდა განიხილებოდეს მიმდინარე პროცესები – სომხურ-ამერიკული სამხედრო წვრთნების ჩატარება, შეერთებული შტატების მრჩეველის მუშაობა სომხეთში:
“არ ვიცი ვინ იქნება, მაგრამ მე ვიცი, ვინ არის ამჟამად ჩართული მრჩეველთა ინსტიტუტში და რამდენად მნიშვნელოვანია, რომ ეს კონსულტაციები იყოს მიზნობრივი და ემსახურებოდეს იმ რეფორმების მასშტაბებსა და მიმართულებებს, რომელსაც დღეს სომხეთის მთავრობა ახორციელებს“.
კითხვაზე, ვის გაუწევს კონსულტაციას სამხედრო მრჩეველი – თავდაცვის მინისტრს თუ შეიარაღებული ძალების გენერალური შტაბის უფროსს, ქოჩარიანმა მხოლოდ თქვა, რომ რჩევებს მისცემს სხვადასხვა საკითხებში:
“ვერ ხედავთ, რამდენად სერიოზულად სწავლობს დღეს ექსპერტთა საზოგადოება რუსეთ-უკრაინის ომს და აკეთებს დასკვნებს? შეიქმნა ომის შემსწავლელი ინსტიტუტები, რომლებიც ითვალისწინებენ ამა თუ იმ ტიპის იარაღის ეფექტურობას, მის კონტროლს და სხვა საკითხებს.“
ჯერ არ არის ზუსტი ინფორმაცია, როდის დაიწყებს ამერიკელი მრჩეველი მუშაობას. ანდრანიკ ქოჩარიანი ვარაუდობს, რომ ის ერევანში შემოდგომაზე ჩამოვა.
